ޗައިނާ ގައި ކުއްތާ މަސް ނުކެއުމަށް އަންގައިފި

ކުއްތާ އަކީ އޮޅުކޮށްގެން ގެންގުޅެން ޖެހޭ އެއްޗެއް ކަމަށާއި، އޭގެ މަސް ނުކެއުމަށް ޗައިނާ ގެ ކަމާބެހޭ ފަރާތްތަކުން ފުރަތަމަ ފަހަރަށް އަންގައިފި އެވެ.

ކޮވިޑް-19 އާއި ގުޅިގެން ޗައިނާ ގައި އަޅަމުންދާ ފިޔަވަޅުތަކުގެ ދަށުން އެ ޤައުމުގައި ވަލު ޖަނަވާރު ކެއުމާއި، އޭގެ ވިޔަފާރި ކުރުން ވަގުތީ ގޮތުން މަނާކޮށްފައިވާ އިރު، އެ ޤައުމުގެ ހުރިހާ ސަރަހައްދެއް ގައި ވެސް ވަލު ޖަނަވާރު ގެ މަސް ވިއްކާ ފިހާރަތަކާއި މާރުކޭޓުތައް ހުރެ އެވެ.

އެގޮތުން މި ވައިރަސް ފެތުރިގެންދިޔައީ ޗައިނާގައި ވަލު ޖަނަވާރުގެ ވިޔަފާރި ކުރާ "ވެޓް" މާރުކޭޓަކުން ކަމަށް އަޑުފެތުރިފައިވެ އެވެ. ނަމަވެސް ވައިރަސް ފެތުރިފައިވަނީ، ސީދާ ވަލު ޖަނަވާރުން ކަމެއް ކަށަވަރުވެފައެއް ނުވެ އެވެ.

ބުދަ ދުވަހު އެ ޤައުމުގެ މިނިސްޓްރީ އޮފް އެގްރިކަލްޗަރ އެންޑް ރޫރަލް އެފެއާޒުން އާންމުކުރި ޑްރާފްޓެއް ގައި ބުނެފައި ވަނީ، ކުއްތާ އަކީ ވެސް އޮޅުކޮށްގެން ގެންގުޅެންޖެހޭ އެއްޗެއް ކަމަށާއި، އޭގެ މަސް ކައިގެން ނުވާނެ ކަމަށެވެ. އަދި ދުނިޔޭ ގެ އެހެނިގެން ޤައުމުތަކުން ވެސް ކުއްތާގެ މަސް ވިއްކައި، އެއިން ވިޔަފާރި ނުކުރާ ކަމަށާއި، ޗައިނާއިން ވެސް އެކަން ހުއްޓާލަން ޖެހޭ ކަމަށް އެ ބަޔާނުގައި ބުނެފައިވެ އެވެ.

އެއާއެކު މިނިސްޓްރީން ވަނީ، ވިއްކާ ވިޔަފާރީގެ ކުރުމު ގެ އިތުރުން، އެހެނިހެން ބޭނުންތަކަށް ގެންގުޅެވޭނެ ޖަނަވާރުތަކުގެ ލިސްޓެއް ވެސް އާންމުކޮށްފައެވެ. އަދި މި ޑްރާފްޓް ވަނީ އަންނަ މޭ މަހުގެ 8 ވަނަ ދުވަހު ގެ ނިޔަލަށް އާންމުން ގެ ހިޔާލަށް ހުޅުވާލާފައެވެ.

ޗައިނާގެ ރިޕޯޓްތައް ބުނާގޮތުން އެ ޤައުމުގައި ކޮންމެ އަހަރަކުވެސް 10 މިލިއަނަށް ވުރެ ގިނަ ކުއްތާ ވިޔަފާރީގެ ބޭނުމަށް މަރާލެވެ އެވެ. ނަމަވެސް އެ ޤައުމު ގެ އާބާދީ ގެ ބޮޑު ނިސްބަތަކުން ގޮވާލަމުން ދަނީ ޗައިނާ ގައި ކުއްތާ ގެ މަސް ކެއުމާއި، ވިޔަފާރި ކުރުން މުޅިން މަނާ ކުރުމަށެވެ.

މިނިސްޓްރީން އެކުލަވާލި ޑްރާފްޓް ފާސްވެއްޖެ ނަމަ އެ ޤައުމުގައި ޖަނަވާރުންގެ ޙައްޤުތަކަށް ގޮވާލާ ފަރާތްތަކަށް އިތުރު އުއްމީދެއް ލިބިގެންދާނެ ކަމަށް ރިޕޯޓްތައް ބުނެއެވެ.