ފަތުރުވެރިން ތިއްބަސް ރިސޯޓުން ބޭރުވެވޭ ގޮތަށް އެޗްޕީއޭގެ ސަރކިއުލަރއަށް ބަދަލު ގެނެސްފި

ފަތުރުވެރިން ރިސޯޓު ނުވަތަ ސަފާރީތަކުގައި ތިބި ނަމަވެސް، ބަލީގެ އެއްވެސް އަލާމާތެއް ހުރި މީހަކު ނުފެންނަނަމަ، އެ ތަންތަނުން ފޭބުމުގެ ހުއްދަ ލިބޭ ގޮތަށް ހުއްދަ ދޭން އެޗްޕީއޭއިން ނިންމައިފި އެވެ.

އެޗްޕީއޭއިން ކުރިން ނެރުނު ސަރކިއުލަރ ބާތިލުކޮށް، އަލުން ގެޒެޓްކުރި ސަރކިއުލަރ ގައި ވަނީ އެންމެ ފަހު ފަތުރުވެރިޔާ އައިތާ 14 ދުވަސް ވެފައި ބަލީގެ އަލާމާތެއް ނުފެންނަތާ 14 ދުވަސް ވެފައިވާނަމަ، ރިސޯޓުތަކާއި ސަފާރީތަކުން ފޭބުމުގެ ހުއްދަ ލިބޭނެ ކަމަށެވެ. މީހުން ފޭބުމުގެ ކުރިން އެޗްޕީއޭއަށް ފޮނުވަން ޖެހޭ އިގްރާރު ފޯމު ފުރިހަމަ ކުރުމަށްފަހު ފޮނުވަން ޖެހެ އެވެ.

Advertisement

އެޗްޕީއޭއިން ކުރިން ނެރުނު ސަރކިއުލަރ އަށް ބަދަލުގެނެސްފައި ވަނީ، ދިވެހިރާއްޖެ އަށް ފަތުރުވެރިިން އެތެރެވުމަށްޓަކައި ދެވޭ އޮންއެރައިވަލް ވިސާ ދިނުން ހުއްޓާލުމާއި ގުޅިގެންނެވެ. ރާއްޖެއިން އޮންއެރައިވަލް ވިސާ ދިނުން ހުއްޓާލާފައި ވަނީ މާޗް މަހުގެ 27 ވަނަ ދުވަހު އެވެ.

އަަލަށް ގެނައި ބަދަލުތަކުގެ ތެރޭގައި، ރިސޯޓު ނުވަތަ ސަފާރީ މޮނީޓަރިންގ ހާލަތަށް ގެނައިތާ 14 ދުވަސްވާ ފަހުން އެ ތަންތަނުގައި ތިބި ފަރާތްތަކަށް ވެސް ފޭބޭ ގޮތަށް ހުއްދަ ދޭން އެޗްޕީއޭއިން ވަނީ ނިންމާފަ އެވެ. ނަމަވެސް، މި މުއްދަތުގެ ތެރޭގައި ބައްޔަށް ޝައްކުކުރެވޭ މީހަކު ފެނިފައި ނުވުމާއި، ބަލީގެ އަލާމާތެއް ހުރި މީހަކު ހުރެއްޖެ ނަމަ ހުއްދަ ނުދޭން އެޗްޕީއޭއިން ވަނީ ނިންމާފަ އެވެ.

އޭގެ އިތުރުން، އެންމެފަހުން ޕޮޒިޓިވްވި މީހަކު ފެނުނުތާ 14 ދުވަސް ވެފައި، މި 14 ދުވަހުގެ ތެރޭގައި ބަލީގެ އަލާމާތެއް ހުރި މީހަކު ފެނިފައިވާނަމަ، ބަލީގެ އަލާމާތްތައް ހުރި މީހަކު އެންމެ ފަހުން ފެނުނުތާ 14 ދުވަސް ފުރިހަމަ ވެފައި ވުމާއި، ރިޒޯޓުން ނުވަތަ ސަފާރީން މީހުން ފައިބާއިރު ބަލީގެ އަލާމާތެއް ހުރި މީހަކު ރިޒޯޓުގައި ނުވަތަ ސަފާރީގައި ނެތުމާއި، ފުރިހަމަ ކުރަންޖެހޭ އެގްޒިޓް ފޯމު ފުރަން ޖެހޭނެ ކަމަށް އެޗްޕީއޭގެ ސަރކިއުލަރގައި ވެއެވެ.

ޕޮޒިޓިވްވެފައިވާ މީހަކު ފެނި، އެ މީހެއްގެ ފަރާތުން އެ ރިސޯޓެއްގައި ނުވަތަ ސަފާރީގައި އެހެން މީހަކަށް ބަލި ޖެހިފައިވާނަމަ، ފޭބުމުގެ ހުއްދަ ލިބެނީ 28 ދުވަސް ފަހުންނެވެ. އަދި ބަލީގެ އަލާމާތެއް ހުރި މީހަކު އެ 28 ދުވަހުގެ މުއްދަތުގެ ތެރޭގައި ފެނިއްޖެނަމަ، އިތުރު 14 ދުވަސް ފުރިހަމަވާން ޖެހެ އެވެ.

ޕޮޒިޓިވް ކޭސްއެއް ފެނިފައިވާ ރިސޯޓުތަކުގައި ތިބި ފަރާތްތައް، 28 ދުވަހުގެ ތެރޭގައި އިތުރު މީހެއްގެ ފުށުން ބަލީގެ އަލާމާތެއް ނުފެންނަ ނަމަ، 28 ދުވަސް ވުމުން ރިސޯޓުތަކުން ފޭބުމުގެ ހުއްދައަށް އެދި ހުށައެޅޭނެ އެވެ. ނަމަވެސް މި ހާލަތުގައި އެ ރިޒޯޓުގައި ނުވަތަ ސަފާރީގައި ތިބި މީހުން ކޮވިޑް-19 އަށް ޓެސްޓްކުރާނެ އެވެ.

ދިވެހިރާއްޖޭގައި ކޮވިޑް-19 ފެތުރުން ކޮންޓްރޯލްކޮށް، އާންމު ރައްޔިތުންގެ ޞިއްޙަތާއި ރައްކައުތެރި ކަމަށްޓަކައި، ޢާންމު ޞިއްޙަތު ރައްކާތެރިކުރުމުގެ ޤާނޫނުގެ ދަށުން އަޅަންޖެހޭ ޚާއްޞަ ފިޔަވަޅުތައް އެޅުމަށް މަގުފަހިކުރުމުގެ ގޮތުން، އާންމު ޞިއްޙަތުގެ ކުއްލި ނުރައްކަލުގެހާލަތު އިއުލާނުކޮށްފައިވަނީ 12 މާރިޗު 2020 ގައެވެ.