ރާއްޖޭގައި އިއުލާންކޮށްފައިވާ ސިއްހީ ކުއްލި ނުރައްކަލުގެ ހާލަތުގެ މުއްދަތު އިތުރުކުރުމާއި މެދު އާދިއްތަ ދުވަހުގެ ކުރިން ގޮތެއް ނިންމާނެ ކަމަށް ހެލްތް މިނިސްޓަރު އަބްދުﷲ އަމީން ވިދާޅުވެއްޖެއެވެ.

ބުރާސްފަތި ދުވަހުގެރޭ ނޭޝަނަލް އެމެޖެންސީ ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ރާއްޖެ.އެމްވީ އިން ކުރި ސުވާލަކަށް ޖަވާބު ދެއްވަމުން ހެލްތް މިނިސްޓަރު އަމީން ވިދާޅުވީ، ސިއްހީ ކުއްލި ނުރައްކަލުގެ ހާލަތު އިތުރު ކުރުމާއި ގުޅޭ މަޝްވަރާތައް ކުރެވެމުންދާ ކަމަށެވެ. އަދި އާއްމުންގެ ތެރޭގައި ބަލި ފެތުރިއްޖެނަމަ ރާއްޖޭގެ ހާލަތު ބަދަލުވެދާނެ ގޮތުގެ އިތުރުން ''ކޮމިއުނިޓީ ސްޕްރެޑެއް'' އޮއްތޯ ބެލުމުގެ ދިރާސާއެއް ވެސް ކުރިޔަށްދާ ކަމަށެވެ.

ކޮވިޑް-19 ގެ ކޭސްތަކެއް ރާއްޖެއިން ފެނުމާއި ގުޅިގެން ގާނޫނު ނަމްބަރު 7/2012 އާއްމު ސިއްހަތު ރައްކާތެރިކުރުމުގެ ގާނޫނުގެ 33 ވަނަ މާއްދާއިން ހެލްތް މިނިސްޓަރަށް ލިބިގެންވާ ބާރުގެ ދަށުން، ފުރަތަމަ ފަހަރަށް ދިވެހިރާއްޖޭގެ ހުރިހާ ސަރަހައްދަކަށް އާއްމު ސިއްހަތުގެ ކުއްލި ނުރައްކަލުގެ ހާލަތު އިއުލާން ކޮށްފައިވަނީ މާޗް މަހުގެ 12 ވަނަ ދުވަހުއެވެ. ކުއްލި ނުރައްކަލުގެ ހާލަތު އިއުލާން ކޮށްފައިވާ މުއްދަތު ހަމަވާނީ އޭޕްރީލް މަހުގެ 12 ވަނަ ދުވަހުއެވެ.

ސިއްހީ ކުއްލި ނުރައްކަލުގެ ހާލަތު އިއުލާން ކުރައްވަމުން މިނިސްޓަރު އަމީން ވިދާޅުވެފައިވަނީ، އެ ފިޔަވަޅަކީ ސަރުކާރުން އަވަހަށް ނިންމަންޖެހޭ ނިންމުންތައް ނިންމުމުގައި ހުރި ހުރަސްތައް ނައްތާލުމުގެ ގޮތުންއެޅި ފިޔަވަޅެއް ކަމަށެވެ. އަދި މިހާރު ބަލީގެ ހާލަތު އިތުރަށް ގޯސްވެފައިނުވާކަމަށާއި، ނަމަވެސް ރައްކާތެރިކަމުގެ ގޮތުން އަޅަންޖެހޭ ހުރިހާ ފިޔަވަޅުތަކެއް އެޅުމުގެ ގޮތުން ނިންމި ނިންމުމެއް ކަމަށެވެ. މިއީ ރާއްޖޭގެ ތާރީހުގައި ވެސް ސިއްހީ ކުއްލި ނުރައްކަލުގެ ހާލަތު އިއުލާންކުރި ފުރަތަމަ ފަހަރެވެ.