ހުއްދަ ނުހޯދައި މިސްކިތްތައް ބަންދުނުކުރަން އަންގައިފި
8 އެޕްރީލު 2020 | ބުދަ 14:01މަރާމާތަކަށް ބަންދުކުރަން ބޭނުންވިޔަސް މިނިސްޓްރީގެ ހުއްދަ ހޯދަންޖެހޭ
ރާއްޖޭގައި ހުރި އެންމެ ދުވަސްވީ އެއް މިސްކިތްކަމަށްވާ މާލޭގެ ހުކުރު މިސްކިތް
އިސްލާމިކް މިނިސްޓްރީގެ ހުއްދަ ނުހޯދައި މިސްކިތްތައް ބަންދު ކުރަމުން ގެންދާ ކަމުގެ މައުލޫމާތު ލިބިފައިވާ ކަމަށާއި އެކަން އެގޮތަށް ނުކުރުމަށް އިސްލާމިކް މިނިސްޓްރީން އަންގައިފިއެވެ.
އިސްލާމިކް މިނިސްޓްރީން ބުދަ ދުވަހު ނެރުނު ބަޔާނެއްގައި ބުނެފައިވާގޮތުގައި، ހުއްދަ ނެތި މިސްކިތްތައް ބަންދުކުރާކަމުގެ މައުލޫމާތު ލިބެމުން އަންނަކަމަށާއި އެކަމަކު މިސްކިތާއި މިސްކިތުގެ ގޯތިތެރެ ބޭނުންކުރުމާއި މިސްކިތުގެ ގޯތި ތެރޭގައި ތަނެއް މަރާމާތުކުރަން ބަންދުކުރިޔަސް މިނިސްޓްރީގެ ހުއްދަ ހޯދަން ޖެހޭ ކަމަށެވެ.
މީގެ އިތުރުން މިސްކިތުގައި ބޭނުންކުރުމަށް ބަހައްޓާ ލިޔުންތައް މިސްކިތުގައި ބަހައްޓާނީ އެ މިނިސްޓްރީން ބަލައި ޗެކްކޮށް އަދި މިނިސްޓްރީން ފާސްކޮށް ތައްގަނޑު ޖަހާފައިވާ ލިޔުންތައް ކަމަށްވެސް އިސްލާމިކް މިނިސްޓްރީން ވަނީ ބުނެފައެވެ.
އިސްލާމިކް މިނިސްޓްރީން ބުނެފައިވާތުގައި، މިސްކިތުގައި ހުންނަ ސައުންޑް ސިސްޓަމް ބޭނުންކުރަންޖެހޭނީ ބަންގި ގޮވުމަށާއި އެމިނިސްޓްރީން ހުއްދަދީގެން އަންގާ އެންގުންތައް ކިޔުން ކިޔުމަށް ކަމަށެވެ. އެނޫން އެހެންކަމަކަށް ބޭނުންކުރާނަމަ މިނިސްޓްރީގެ ހުއްދަ ހޯދުމަށްވެސް މިނިސްޓްރީން ވަނީ އަންގާފައެވެ.
ކޮވިޑް-19 ރޯގާ، ރާއްޖޭގައި ފެތުރަނު ނުދިނުމަށް ނޭޝަނަލް އިމަޖެންސީ އޮޕަރޭޝަން ސެންޓަރުން ގެންދަނީ އެކިއެކި ފިޔަވަޅުތައް އަޅައި އަންގަންޖެހޭ އެންގުންތައް އަންގަމުން ނެވެ. އެގޮތުން، ރާއްޖޭގެ އެންމެ ބައިބޯ، މާލޭ ސިޓީ ސަރަހައްދުގައި ވަނީ ޖަމާއަތުގައި ނަމާދުކުރުން ވަގުތީ ގޮތުން މެދުކަނޑާލާފަ އެވެ. އެހެންނަމަވެސް ކޮންމެ ނަމާދު ވަގުތަކު މިސްކިތްތަކުން ބަންގި ގޮވުމުން ދެއެވެ.
