ކޮވިޑް-19 އާ ގުޅިގެން ޖަޕާނުގެ އިގްތިސާދަށް އައިސްފައިވާ ހީނަރުކަމުން އަރައިގަތުމަށް ޓްރިލިއަން ޑޮލަރާ ގާތްކުރާ އަދަދެއްގެ ސްޓިމިއުލަސް ޕެކޭޖެއް އިއުލާންކުރަން ތައްޔާރުވެއްޖެއެވެ.

ރޮއިޓަރޒްގައިޝާއިއުކޮށްފައިވާ ހަބަރެއްގައި ވަނީ، ޖުމްލަ 990 ބިލިއަން ޑޮލަރުގެ ސްޓިމިއުލަސް ޕެކޭޖެއް އިއުލާންކުރުމުގެ ފަހުގެ ތައްޔާރީތައް އެ ގައުމުގެ ސަރުކާރުން ކުރަމުން އަންނަ ކަމަށެވެ. މިއީ ޖަޕާނުގެ އިގްތިސާދީ އުފެއްދުންތެރިކަމުގެ 20 އިންސައްތައެވެ.

ޖަޕާނު ސަރުކާރުން އިއުލާންކުރާ ސްޓިމިއުލަސް ޕެކޭޖްގެ ތެރެއިން ގޭބިސީތަކަށާއި ކުދި ވިޔަފާރިތަކަށް ފައިސާގެ އެހީ ދިނުމަށް 55.13 ބިލިއަން ޑޮލަރު ކަނޑައަޅާފައިވެއެވެ. 238.96 ބިލިއަން ޑޮލަރަކީ އިޖްތިމާއީ ރައްކާތެރިކަމަށާއި ދައުލަތަށް ދައްކާ ޓެކްސް ފައިސާ ދިނުން ފަސްކުރުމަށް ކަނޑައަޅާފައިވާ އަދަދެކެވެ.

އޭގެ އިތުރުން، ސަރުކާރުގެ މާލީ ސިޔާސަތު ހަރުދަނާކޮށް އިތުރު އިންވެސްޓްމަންޓްތައް ކުރުމަށް 358 ބިލިއަން ޑޮލަރަށް ވުރެ ގިނަ އަދަދެއް ވަނީ ކަނޑައަޅާފައެވެ. މި ސްޓިމިއުލަސް ޕެކޭޖަށް ރުހުން ހޯދުމަށް، އަންގާރަ ދުވަހު ކެބިނެޓް ބައްދަލުވުމެއް ބާއްވާނެ ކަމަށް ރޮއިޓަރޒް ގެ ހަބަރުގައި ވެއެވެ.

ސްޓިމިއުލަސް ޕެކޭޖާއެކު ޖަޕާނުގެ 6 ސަރަހައްދެއްގައި ސިއްހީ ކުއްލި ނުރައްކަލުގެ ހާލަތު އިއުލާންކުރާނެ ކަން ބޮޑުވަޒީރު ޝިންޒޯ އަބޭ ވަނީ އިއުލާންކުރައްވާފައެވެ. ނަމަވެސް، އެހެން ގައުމުތަކުގައި އަޅާފައިވާ ލޮކްޑައުން ފިޔަވަޅުތައް އެ ގައުމުން ނާޅާނެކަމަށް ވިދާޅުވިއެވެ.

އަބޭ ވިދާޅުވި ގޮތުގައި ސިއްހީ ކުއްލި ނުރައްކަލުގެ ހާލަތު އެ ގައުމުގައި އިއުލާންކުރަނީ، އިތުރަށް ބަލި ފެތުރުން ހުއްޓުވުމުގެ ގޮތުންނާއި، އިގްތިސާދީ ހަރަކާތްތަކަށް ހުއްޓުމެއްނެތި ކުރިއަށް ދާނެކަން ކަށަވަރުކުރުމުގެ ގޮތުންނެވެ. ފާއިތުވި ދުވަސްތަކުގައި އެ ގައުމުން ކޮވިޑް-19 އަށް ޕޮޒިޓިވްވި މީހުންގެ އަދަދު ވަނީ އިތުރުވެފައެވެ.

މަސް ދުވަހުގެ މުއްދަތަށް ދިގު ދެމިގެންދާ ކުއްލި ނުރައްކަލުގެ ހާލަތާއި ގުޅިގެން، ގޭގައި ތިބުމަށް އެންގުމާއި ވިޔަފާރިތައް ބަންދުކުރަން އެންގުމުގެ ބާރު ގަވަރުނަރުންނަށް ލިބިގެން ދާނެއެވެ. ނަމަވެސް، އެ ގައުމުން މަދު ހާލަތްތަކެއްގައި މެނުވީ، އެއްވެސް އިތުރު ޖޫރިމަނާއެއް ނުވަތަ އަދަބެއް ދިނުމަށް ކަނޑައަޅާފައެއް ނުވެއެވެ.