އަލްޖީރިއާގައި ގިނަ އަދަދެއްގެ ނޫސްވެރިން ހައްޔަރުކޮށްފި
1 މާރިޗު 2019 | ހުކުރު 02:11ވަނަ އަހަރު ސްޓްރޯކެއް ޖެހުމާއި ގުޅިގެން ހަށިގަނޑުން ވަރު ނެތި، ރައީސް ބޫތެފްލިކާ ދުވަސްތައް ހޭދަކުރައްވަމުން ގެންދަވަނީ ފުރޮޅުލީ ގޮނޑިއެއްގައި
ނޫސްވެރިން ކުރިއަށްގެންދިޔަ އިހުތިޖާޖުގައި ބައިވެރިވި ނޫސްވެރިއަކު ހައްޔަރުކުރަނީ
އަލްޖީރިއާގައި ކުރިއަށްދިޔަ އިހުތިޖާޖެއްގައި ބައިވެރިވި ގިނަ އަދަދެއްގެ ނޫސްވެރިން ހައްޔަރުކޮށްފިއެވެ.
ޕްރިންޓް އަދި ބްރޯޑްކާސްޓް މީޑިއާގައި މަސައްކަތްކުރާ 100 އަށްވުރެ ގިނަ ނޫސްވެރިން އިހުތިޖާޖު ކޮށްފައިވަނީ އަލްޖީރިއާގެ ރައީސް އަބްދުލްއަޒީޒް ބޫތެފްލިކާ ފަސްވަނަ ރިޔާސީ ދައުރަކަށް ކުރިމަތިލެއްވުމާއި ދެކޮޅަށް، އެ ޤައުމުގައި ކުރިއަށްގެންދާ މުޒާހަރާތައް ކަވަރު ކުރުމަށް ހުރަސްއަޅައި، މުޒާހަރާގެ ކަވަރޭޖްތައް ސެންސަރު ކުރާތީއެވެ.
އިހުތިޖާޖުގައި ބައިވެރިވި ނޫސްވެރިން ބުނީ ނޫސްތައް ހިންގާ އިސް ފަރާތްތަކުން ނޫސްވެރިންގެ މަސައްކަތަށް ހުރަސްއަޅަމުންދާ ކަމަށެވެ. މި އިހުތިޖާޖުގައި ދައުލަތާއި އަދި އަމިއްލަ ފަރާތްތަކުން ހިންގާ އެކިއެކި މީޑިއާތަކުގައި މަސައްކަތް ކުރާ ނޫސްވެރިންވެސް ވަނީ ބައިވެރިވެފައެވެ.
ސިއްހީ ހާލުކޮޅު ދެރަ ނަމަވެސް އުމުރުފުޅުން 81 އަހަރުގެ ރައީސް ބޫތެފްލިކާ، ރިޔާސީ ފަސްވަނަ ދައުރަކަށް ކުރިމަތިލައްވަން ގަސްތުކުރައްވާކަން ހާމަކުރެއްވުމާއި ގުޅިގެން ވޭތުވެ ދިޔަ ދުވަސްތަކުގައި އަލްޖީރިއާގައި ދަނީ ވަރުގަދަ މުޒާހަރާތަކެއް ކުރަމުންނެވެ. 2013 ވަނަ އަހަރު ސްޓްރޯކެއް ޖެހުމާއި ގުޅިގެން ހަށިގަނޑުން ވަރު ނެތި، ފުރޮޅުލީ ގޮނޑިއެއްގައި ދުވަސްތައް ހޭދަކުރައްވަން ޖެހިވަޑައިގެންފައިވާ ރައީސް ބޫތެފްލިކާ ވޭތުވެދިޔަ 5 އަހަރެއްހާ ދިވަހު ރައްޔިތުންނަށް ފެނިފައިވަނީ މަދު މުނާސަބަތުތަކެއްގައެވެ.
ޤާނޫނަކުން މުޒާހަރާކުރުން މަނާކޯސްފައިވާ އަލްޖީރިއާގެ އެކި ސަރަޙައްދުތަކުގައި ރައީސް ބޫތެފްލިކާ އާއި ދެކޮޅަށް ވަރުގަދަ މުޒާހަރާތަކެއް ކުރަމުންދާއިރު، މި ހަފްތާގެ އާދީއްތަ ދުވަހު އެމަނިކުފާނު ވަނީ ސްވިޒަލޭންޑަށް ވަޑައިގެންފައެވެ. އަލްޖީރިއާގެ ސަރުކާރުން ހާމަކޮށްފައިވާ ގޮތުގައި ރައީސް ބޫތެފްލިކާގެ މި ދަތުރުފުޅަކީ އޭޕްރީލް މަހުގެ 18 ވަނަ ދުވަހު އޮންނަ އިންތިޚާބުގެ ކުރިން މެޑިކަލް ޗެކްއަޕްއެއް ހެއްދެވުމަށް ކުރައްވާ ދަތުރުފުޅެކެވެ.
