ކޮވިޑް-19: އިޤްތިސާދީ ކޮމިޓީން ތިން މިނިސްޓްރީއަކާ ސުވާލުކުރަނީ
17 ކަމެއް ވަނީ ހަވާލުކުރެވިފައި
މަޖިލީހުގެ އިގްތިސާދީ ކޮމިޓީގެ ބައްދަލުވުމެއްގެ ތެރެއިން
ކޮވިޑް-19 އާ ގުޅިގެން ރައްޔިތުންގެ މަޖިލީހުގެ އިގްތިސާދީ ކޮމިޓީއަށް ފިޝަރީޒް މިނިސްޓްރީ، ޓޫރިޒަމް މިނިސްޓްރީގެ އިތުރުން އިކޮނޮމިކް މިނިސްޓްރީގެ އިތުރުން ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އާ ސުވާލުކުރަން ފާސްކޮށްފިއެވެ.
އެ ވުޒާރާތަކާއި ސުވާލުކުރުމަށް އިގްތިސާދީ ކޮމިޓީން ނިންމާފައިވަނީ ހޮނިހިރު ދުވަހު ވީޑިއޯ ކޮންފަރެންސް މެދުވެރިކޮށް ބޭއްވުނު ކޮމިޓީގެ ބައްދަލުވުމުގައި ބައިވެރިވެ ވަޑައިގެންނެވި މެމްބަރުންގެ އިއްތިފާގުންނެވެ.
އެ ބައްދަލުވުމަކީ، ކޮވިޑް-19 ފެތުރުނަ ނުދިނުމަށް އަޅާ ފިޔަވަޅުތަކުގެ ސަބަބުން އާއިލާތަކާއި ވިޔަފާރިތަކުގެ އާމްދަނީއަށް އަންނަ ނުރަނގަޅު ބަދަލުތަކުން އަރައިގަތުމަށް، ސަރުކާރުން ހިންގުމަށް ނިންމާފައިވާ ޕްރޮގްރާމު ތަންފީޒު ކުރުމަށް މަޖިލީހުން ދެކޭގޮތް ކަނޑައެޅުމަށް ހުށައަޅާފައިވާ މައްސަލަ ދިރާސާކޮށް ރިޕޯޓްތައް އެކުލަވައިލުމަށް ކޮމިޓީތަކުން ކުރާނެ މަސައްކަތުގެ ތެރެއިން އިގްތިސާދީ ކޮމިޓީއަށް ހަވާލުކުރެވިފައިވާ މަސައްކަތެވެ.
އިގްތިސާދީ ކޮމިޓީ އަށް މަތިކުރެވިފައިވަނީ 17 މައްސަލައެއް ބެލުމަށެވެ.
އެ ކޮމިޓީއަށް ހުށައެޅިފައިވާ މައްސަލަތައް ބެލުމަށް ސަބް ކޮމިޓީއެއް އެކުލަވައިލުމަށް ވަނީ ނިންމާފައެވެ.
