ދެކުނުއިރުމަތީ އޭޝިއާއިން އެންމެ ގިނައިން މީހުން މަރުވާ ޤައުމަކަށް އިންޑޮނޭޝިއާ

ކޮވިޑް-19 ޖެހިގެން ދެކުނުއިރުމަތީ އޭޝިއާއިން އެންމެ ގިނަ އަދަދަކަށް މީހުން މަރުވާ ޤައުމަކަށް އިންޑޮނޭޝިއާ ވެއްޖެއެވެ.

އަލްޖަޒީރާގައި ރިޕޯޓްކޮށްފައިވާ ގޮތުން މާރޗު މަހުގެ 2 ވަނަ ދުވަހު އިންޑޮނޭޝިއާއިން ފުރަތަމަ ކޭސް ރިޕޯޓް ކުރެވުނު ފަހުން މިއަދާ ހަމައަށް އައިއިރު 1980 އަށްވުރެ ގިނަ މީހުން ވައިރަސްއަށް ޕޮޒިޓިވްވެފައިވާއިރު، 181 މީހުންގެ މަރު ވަނީ ރިޕޯޓް ކުރެވިފައެވެ. އެއާއެކު އިންޑޮނޭޝިއާ ވެގެންގޮސްފައިވަނީ މުޅި ދެކުނުއިރުމަތީ އޭޝިއާއިންވެސް ކޮވިޑް-19 ގައި އެންމެ ގިނަ އަދަދެއްގެ މީހުން މަރުވި ޤައުމަށެވެ.

އެގޮތުން ހުކުރު ދުވަހަށް ބަލާއިރުވެސް އިންޑޮނޭޝިއާގައި މަރުވި މީހުންގެ ރޭޓް ވަނީ ދުނިޔޭގެ ނިސްބަތުން 9.1 އިންސައްތައިގައި ހިފެހެއްޓިފައެވެ. އެއާ އަޅާކިޔާއިރު ފިލިޕީންސްގައި މަރުވި މީހުންގެ ރޭޓް އޮތީ 4.1 އިންސައްތައިގައެވެ. އަދި މެލޭޝިއާގައި މި މުއްދަތުގައި 1.6 ރޭޓްގައި މަރުވި މީހުންގެ އަދަދުތައް ހިފެހެއްޓިފައިވާއިރު، އެ ދެ ޤައުމަކީވެސް އިންޑޮނޭޝިއާއާ އަޅާބަލާއިރު، ގިނަ އަދަދެއްގެ ކޭސްތަކެއް ރިޕޯޓް ކުރެވުނު ދެ ޤައުމެވެ.

އެގޮތުން އެ ދެ ޤައުމުންވެސް 3000 އަށްވުރެ ގިނަ މީހުން ވައިރަސްއަށް ޕޮޒިޓިވް ވެފައިވެއެވެ. އިންޑޮނޭޝިއާއިން މި ވައިރަސްގެ އަސަރު އެންމެ ބޮޑަށް ކޮށްފައިވަނީ ވެރިރަށް ޖަކާޓާއަށެވެ. އެގޮތުން ޖަކާޓާއިން 95 ސިއްހީ އެހީތެރިންވެސް ވައިރަސްއަށް ޕޮޒިޓިވްވެފައިވާއިރު، 13 މީހަކު މަރުވެފައިވެއެވެ.