ބަތަލާ ރިސޯޓުން ޕޮޒިޓިވްވެގެން އައިޖީއެމްއެޗްގައި ފަރުވާދިން 2 މީހުން ދޫކޮށްލައިފި
އެ 2 މީހުން ޑިސްޗާޖް ކުރެވުނީ މިއަދު އެމީހުން ފުލައިޓުން ފުރައިގެން ދާ ގޮތަށް
އައިޖީއެމްއެޗް ލެބޯޓަރީ
ސޭންޑީޒް ބަތަލާ ރިސޯޓުން ކޮވިޑް-19 އަށް ޕޮޒިޓިވްވި 2 މީހުންނަށް ފަރުވާ ދިނުމަށްފަހު އައިޖީއެމްއެޗުން ދޫކޮށްލާފައިވާ ކަމަށް ސަރުކާރުން ހާމަކޮށްފިއެވެ.
ނެޝަނަލް އެމަރޖެންސީ އޮޕަރޭޝަން ސެންޓުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، ކޮވިޑް-19 ޓާސްކް ފޯހުގެ ތަރުޖަމާނު މަބްރޫކް އަޒީޒު ވިދާޅުވީ އެ ދެ މީހުން ދޫކޮށްލާފައިވަނި ހުކުރު ދުވަހު ކަމަށެވެ.
މި 2 މީހުންނަކީ ބިދޭސީ ދެމީހުންނެވެ. އެންމެ ފުރަތަމަ ކުރެއްދޫ ރިސޯޓުގައި 2 މީހަކު ޕޮޒިޓިވްވި ފަހުން ދެވަނަ އަށް އިތުރު 2 މީހަކު ޕޮޒިޓިވްވީ ބަތަލާ ރިސޯޓުންނެވެ. މަބްރޫކް ވިދާޅުވީ އެމީހުން ހޮސްޕިޓަލުން ދޫކޮށްލާފައިވަނީ ވަގުތުން ފުރައިގެންދާ ގޮތަށް ކަމަށެވެ.
އެމީހުން މިއަދު ހޮސްޕިޓަލުން ދޫކޮށްލި ނަމަވެސް އެ ދެމީހުން ކޮވިޑް-19 އިން ރަނގަޅުވިތާ ދުވަސްތަކެއްވަނީ ވެފައެވެ. އެމީހުން އެންމެ ފުރަތަމަ ޓެސްޓްކުރީ، މާރޗް މަހުގެ 18 ވަނަ ދުވަހު އެވެ. އަދި އޭގެ ފަހުން ދެވަނަ ފަހަރަށް ޓެސްޓްކުރީ އެޕްރީލް މަހުގެ 1 ވަނަ ދުވަހުއެވެ.
ހޮސްޕިޓަލުން އެ ދެމީހުން ދޫކޮށް ފުރުމުގެ ހުއްދަ ދީފައިވަނީ ޓެސްޓް ނަތީޖާ ޑަބަލް ނެގެޓިވް ވުމުންނެވެ. އަދި އައިސޮލޭޝަންގެ މުއްދަތު ވެސް ހަމަވިފަހުންނެވެ. އެ ދެމީހުން ފުރުމަށް ހަމަޖެހިފައިވަނީ ހޮނިހިރު ދުވަހުގެ ފުލައިޓަކުންނެވެ.
މަބްރޫކް ވިދާޅުވީ މިހާތަނަށް ޕޮޒިޓިވް ކޭސްއަކަށް ބަދަލުއައިސްފައި ނުވާ ކަމަށެވެ. އަދި ޕޮޒިޓިވްވި 19 މީހުންގެ ތެރެއިން 13 މީހަކު ރަނގަޅުވެފައިވާ އިރު މިހާރު ފަރުވާ ދެމުން އަންނަނީ ޔޫކޭއިން އައި 4 ދިވެހިންނަށެވެ. އިތުރު ދެ މީހަކު ވަނީ ފުރައިގެން ގޮސްފައެވެ. މަބްރޫކް ވިދާޅުވީ ރާއްޖޭގައި ފަރުވާ ދެމުންދާ 4 މީހުންގެ ހާލުވެސް ރަނގަޅު ކަމަށެވެ.
މަބްރޫކް ވިދާޅުވީ މިހާތަނަށް 1434 ސާމްޕަލްއެއް ހުކުރު ދުވަހުގެ ހަވީރު 4:00 އާ ހަމަޔަށް ނެގިފައިވާ ކަމަށެވެ. އަދި މީގެ ތެރެއިން 1364 ނެގެޓިވްވެފައިވާ ކަމަށާއި، 51 ސާމްޕަލް ނަތީޖާ ނުލިބޭ ކަމަށެވެ.
އައިސޮލޭޝަން ފެސިލިޓީގައި މިހާރު ތިބީ ވެލިދޫގައި ތިބި 11 މީހުންނެވެ. އަދި ކަރަންޓީންގައި މިހާރު ތިބީ 881 މީހެކެވެ.
