ބޯޑަރ ކޮންޓްރޯލް ފިޔަވަޅު ތަކުގެ ދަށުން ދެކުނު ކޮރެއާގެ 27000 މީހުން ސެލްފް-ކަރަންޓީންގައި

ދެކުނު ކޮރެއާގައި ކޮވިޑް-19 ފެތުރުން ކޮންޓްރޯލް ކުރުމަށް އެ ޤައުމުގައި އަޅާފައިވާ ފިޔަވަޅުތަކުގެ ދަށުން އެ ޤައުމުގެ 27،000 މީހުން ސެލްފް-ކަރަންޓީން ވެއްޖެއެވެ.

ދެކުނު ކޮރެއާގެ މީޑިއާތަކާ ޙަވާލާދީ އަލްޖަޒީރާގައި ރިޕޯޓްކޮށްފައިވާ ގޮތުން ކޮވިޑް-19 ފެތުރުން ކޮންޓްރޯލް ކުރުމަށް އެ ޤައުމުގައި އަޅާފައިވާ ބޯޑަރ ކޮންޓްރޯލް ފިޔަވަޅުތަކުގެ ދަށުން އެ ޤައުމުގައި 27،000 މީހުން 14 ދުވަހަށް ކަރަންޓީން ވެފައިވާއިރު، މިއީ އެހެން ޤައުމުތަކުން އެ ޤައުމަށް ވައިރަސް އެތެރެވުން ހުއްޓުވުމަށް އެޅި ފިޔަވަޅެކެވެ.

ދެކުނު ކޮރެއާގެ މިނިސްޓްރީ އޮފް އިންޓީރިއާރ އެންޑް ސޭފްޓީއާ ޙަވާލާދީ ރިޕޯޓްތައް ބުނާގޮތުން އެ ޤައުމުން ސެލްފް ކަރަންޓީން ކުރުމަށް އަންގާފައިވާ ފަރާތްތަކުގެ ތެރެއިން 19،567 މީހުންނަކީ ދާދި ފަހުން އެހެން ޤައުމުތަކުން އެނބުރި އެ ޤައުމަށް އައި މީހުންނެވެ. އަދި އޭގެ ތެރެއިން 7499 މީހުންނަކީ ވައިރަސް ޖެހިފައިވާ މީހުންނާއި ކޮންޓެކްޓް ވުމުގެ ސަބަބުން ކަރަންޓީން ކޮށްފައިވާ މީހުންނެވެ.

ދެކުނު ކޮރެއާއިން މިހާތަނަށް 10،000 އަށްވުރެ ގިނަ މީހުން ވައިރަސްއަށް ޕޮޒިޓިވްވެފައިވާއިރު، އޭގެ ތެރެއިން 174 މީހުން ވައިރަސްގައި މަރުވެފައިވެއެވެ. އެގޮތުން މީގެ ކުރިން ސައުތު ކޮރެއާއިން ދުވާލެއްގެ މައްޗަށް 800 އެއްހާ ކޭސް ރިޕޯޓް ކުރެވުނު ނަމަވެސް އެ ޤައުމުން ހަރުދަނާ ފިޔަވަޅުތަކާއެކު ވައިރަސް ފެތުރުން ކުރިއަށްވުރެ ކޮންޓްރޯލް ކޮށްފައިވާކަމަށް ބުނެ ދުނިޔޭގެ ސިއްޙަތު ޖަމިއްޔާއިންވެސް ވަނީ އެ ޤައުމަށް ތައުރީފު ކޮށްފައެވެ.