ސިއްހީ ކުއްލި ނުރައްކަލުގެ ދަށުން ސިނަމާތަކާއި ތިއޭޓަރުތައްވެސް ހުއްޓާލަން އަންގައިފި
އެ ފިޔަވަޅުތަކަށް އަމަލުކުރުމަށް އިލްތިމާސްކޮށްފައިވޭ
އޮލިމްޕަސް ހޯލް
ރާއްޖޭގައި އިޢުލާނު ކޮށްފައިވާ ޞިއްޙީ ކުއްލި ނުރައްކަލުގެ ޙާލަތުގެ ދަށުން އަޅަމުންދާ ފިޔަވަޅުތަކުގެ ތެރެއިން ސިނަމާތަކާއި ތިއޭޓަރުތައްވެސް ވަގުތީ ގޮތުން ހުއްޓާލުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އަންގައިފިއެވެ.
ކޮވިޑް-19 އާއި ގުޅިގެން ޢާންމު ސިއްޙަތު ރައްކާތެރި ކުރުމުގެ ޤާނޫނުގެ ދަށުން ރާއްޖޭގައި މިހިނގާ މާރޗު މަހުގެ 12 ވަނަ ދުވަހު ޞިއްޙީ ކުއްލި ނުރައްކަލުގެ ޙާލަތު އިޢުލާނު ކުރިފަހުން އެޗްޕީއޭއިން ދަނީ ގިނަ ފިޔަވަޅުތަކެއް އަޅަމުންނެވެ.
އެގޮތުން އާދިއްތަ ދުވަހުގެރޭ އެޗްޕީއޭއިން ކުރި އިޢުލާނެއްގައި ބުނީ، ކުއްލި ނުރައްކަލުގެ ޙާލަތުގެ ދަށުން ޑިރެކްޓަރ ޖެނެރަލް އޮފް ޕަބްލިކް ހެލްތަށް ލިބިގެންވާ ބާރުގެ ދަށުން މިހިނގާ މާރޗު މަހުގެ 30 ވަނަ ދުވަހުން ފެށިގެން ވަކި ގޮތެއް އަންގަންދެން ރާއްޖޭގައި ހިންގާ ސިނަމާތަކާއި ފިލްމު ތިއޭޓަރުތައް ހިންގުން ވަގުތީ ގޮތުން ހުއްޓާލުމަށް އަންގަވާ ކަމަށެވެ.
އަދި އެ ފިޔަވަޅުތަކަށް ޢަމަލުކުރުމަށް ޑިރެކްޓަރ ޖެނެރަލް އޮފް ޕަބްލިކް ހެލްތުން ވަނީ އެންމެހާ ފަރާތްތަކަށް އިލްތިމާސްކޮށްފައެވެ.
ޞިއްޙީ ކުއްލި ނުރައްކަލުގެ ޙާލަތުގެ ދަށުން ޢާންމުން އެއްވެ އުޅުން މަދުކުރުމުގެ ގޮތުން ފާއިތުވި ދުވަސްތަކުގައި ގިނަ ފިޔަވަޅުތަކެއް އަޅާފައިވާއިރު، އޭގެ ތެރޭގައި މާލޭގައި ހިންގާ ޖިމްތައް ބަންދު ކުރުމާއި، ކާބޯތަކެތީގެ ޚިދުމަތްދޭ ބައެއް ތަންތަން ޢާންމުންނަށް ބަންދު ކުރުމާއި، ރާއްޖޭގެ ސުކޫލުތަކާއި ޔުނިވަރސިޓީތައް ބަންދު ކުރުން ހިމެނެއެވެ.
