ކޮވިޑް-19: ޔޫރަޕްގެ ގައުމުތަކުން އެންމެ ބޮޑަށް އަސަރު ކުރަމުންދަނީ އިޓަލީ އަދި ސްޕެއިންއަށް

މުޅި ދުނިޔޭގެ އެކި ހިސާބުތަކުގައި ހަލުވިކަމާއެކު ފެތުރެމުން އަންނަ ނުރައްކާތެރި ކޮވިޑް-19 ގެ ބަލިމަޑުކަމުގެ ހޮނިހޮރި ދުވަހުގެ ނިޔަލަށް އިޓަލީން އެކަނި 10،023 މީހުން މަރުވެއްޖެއެވެ.

އިޓަލީގެ ކަމާބެހޭ އިދާރާތަކުން ހާމަކޮށްފައިވާގޮތުން ހޮނިހުރު ދުވަހުގެ ނިޔަލަށް އެގައުމުން ވަނީ 92،472 މީހަކު ކޮވިޑް-19 އަށް ޕޮޒިޓިވްވެފައެވެ. އަދި މި ވައިރަސް ޖެހުނު މީހުންގެ ތެރެއިން 12،384 މީހަކު ވަނީ ރަނގަޅުވެފައެވެ.

އިޓަލީގައި ހަލުވިކަމާއެކު ފެތުރެމުންދާ ކޮވިޑް-19 އާއި ގުޅިގެން އެގައުމުގެ ބޮޑުވަޒީރު ޖުސެއްޕެ ކޮންތެ ވިދާޅުވީ ހޮނިހިރު ދުވަހު އެކަނި 1400 މީހުން ބަލިން ރަނގަޅުވެފައިވާ ކަމަށެވެ. އަދި މިއީ އެއްދުވަހަކަ އެންމެ ގިނަ މީހުން ރަނގަޅުވި ދުވަސް ކަމަށް ކޮންތެ ވިދާޅުވިއެވެ. ހޮނިހިރު ދުވަހު 1400 މީހުން ރަނގަޅުވި އިރު އެދުވަހު އެކަނި ވެސް 889 މީހަކު ވަނީ ވައިރަސްގެ ސަބަބުން މަރުވެފައެވެ.

ކޮންތެ ވިދާޅުވީ މުނިސިޕަލް ޕްރޮގްރާމްގެ ދަށުން 4.8 ބިލިއަން އެމެރިކާ ޑޮލަރު ނަގާފައިވާ ކަމަށާއި، އޭގެ ދަށުން ލޮކްޑައުންގެ ސަބަބުން އަސަރު ކުރަމުންދާ އާމްދަނީ މަދުން ލިބޭ މީހުންނާއި ފަގިރުންނަށް ފުޑް ވައުޗާ ދީ، ދިމާވަމުންދާ ގޮންޖެހުންތަކުން އަރައިގަތުމަށް ސިޓީތަކުގެ މޭޔަރުންނާއެކު މަސައްކަތް ކުރަން ފަށާފައިވާ ކަމަށެވެ.

އިޓަލީ ލޮކްޑައުންކުރުމާއެކު ގިނަ އަދަދެއްގެ ކާރުހާނާތައް ބަންދުކޮށް އެގައުމުގެ ރައްޔިތުންނަށް ލިބެމުންދާ އާމްދަނީ ވަނި ބޮޑުތަނުން ކުޑަވެފައެވެ.

މީގެ އިތުރުން ފަންޑު ބޭނުންކުރެވޭ އެހެން ކަންކަމުގެ ތެރޭގައި ބޭސް ފޯރުކޮށްދިނުމާއި އެހެނިހެން ޒަރޫރީ ތަކެތި ހިމެނެއެވެ.

ކޮންތޭ ވިދާޅުވީ މިހާރު ލިބިވަޑައިގެންނެވި ތަފާސްހިސާބުތަކަށް ބައްލަވާއިރު ކޮވިޑް-19 ޖެހޭ މިންވަރު ދަށްވަމުންދާ ކަމަށާއި، މިގޮތަށް ދާނަމަ ހުކުރު ދުވަހު ސްކޫލްތައް ހުޅުއްވާނެ ކަމަށެވެ.

ސްޕެއިންގެ ހެލްތް މިނިސްޓްރީން ވަނި ހޮނިހިރު ދުވަހު 832 މީހަކު މަރުވިކަން ހާމަކޮށްފައެވެ. އަދި މިއާއެކު އެގައުމުގައި މަރުވި މީހުންގެ ޖުމްލަ އަދަދު ވަނީ 5690 އަށް ހޮނިހިރު ދުވަހު އަރާފައެވެ. މިއީ އިޓަލީއަށްފަހު މަރުވި މީހުންގެ އަދަދު ދެން އެންމެ ގިނަ ގައުމެވެ.

އެގައުމުގެ ސިއްހީ އިދާރާތަކުން ބުނެފައިވަނީ މި އައުޓްބްރޭކްގެ އެންމެ ނުރައްކާތެރި ހިސާބަށް ގޮސްފައިވާ ކަމަށެވެ. އަދި މިއާއެކު ހޮސްޕިޓަލްތަކުގެ ޖާގަ އިތުރުކޮށްފައިވާ ކަމަށެވެ. ނަމަވެސް އަދިވެސް ޕޮޒިޓިވްވާ މީހުންގެ އަދަދު އިތުރުވަމުން އަންނަ ކަމަށް އެގައުމުން ވަނީ ހާމަކޮށްފައެވެ. އަދި މިއާއެކު ފަރުވާ ދިނުމުގައި ހަރަކާތްތެރިވާ ސިއްހީ އެހީތެރިން އެކަމަޑޭޓް ކުރާނެ އެހެން ގޮތްތަކެއް މިހާރު ހޯދަން ޖެހިފައިވާ ކަމަށް ސިއްހީ އިދާރާތަކުން ވަނީ ހާމަކޮށްފައެވެ.

ހޮނިހިރު ދުވަހުގެ ނިޔަލަށް ފްރާންސްގައި 37،757 މީހަކު ވަނީ ކޮވިޑް-19 އަށް ޕޮޒިޓިވްވެފައެވެ. އަދި ފާއިތުވި 24 ގަޑިއިރުގެ ތެރޭގައި 319 މީހަކު މަރުވެފައިވާ ކަމަށް އެގައުމުން ވަނީ ހާމަކޮށްފައެވެ.