ޖީސީސީ އުވުމުގެ ޒިންމާ ނަގަންޖެހޭނީ ދަތިކުރުމުގެ ފިޔަވަޅު އެޅި ގައުމުތަކުން: ގަތަރު

ގަލްފް ކޯޕަރޭޝަން ކައުންސިލް (ޖީސީސީ) އުވުމުގެ ޒިންމާ ނަގަން ޖެހޭނީ ގަތަރާ ދެކޮޅަށް ދަތިކުރުމުގެ ފިޔަވަޅު އަޅައިގެން ތިބި ގައުމުތަކުން ކަމަށް އެ ގައުމުން ބުނެފިއެވެ.

ގަތަރުގެ ޚާރިޖީ ވަޒީރު ޝެއިޚް މުހައްމަދު ބިން އަބްދުއްރަހްމާން އަލް ޘާނީ މިހެން ވިދާޅުވީ ގަތަރުގެ ވެރިރަށް ދޯހާގައި ބުދަ ދުވަހު އިރާގުގެ ޚާރިޖީ ވަޒީރު އިބްރާހިމް އަލްޖާފަރީއާއެކު ބޭއްވި ނޫސްވެރިންގެ ބައްދަލުވުމެއްގައެވެ.

ޝެއިޚް މުހައްމަދު ވިދާޅުވީ ބައިނަލްއަގްވާމީ މުޖުތަމައުއިން ޓެރެރިޒަމާ ދެކޮޅަށް ކުރާ ހަނގުރާމައާ އަދި މައްސަލަ ހައްލުކުރުމަށް ކުރާ މަސައްކަތަކަށް، ގަތަރާ ދެކޮޅަށް ދަތިކުރުމުގެ ފިޔަވަޅު އެޅި ގައުމުތަކުގެ ގޮތްދޫނުކުރުމުގެ ސަބަބުން އަސަރުކޮށްފައިވާ ކަމަށެވެ.

އިރާގުގެ ޚާރިޖީ ވަޒީރު ވިދާޅުވީ ދެބަސްވުން ހައްލުކުރުމަށް އޮތް އެންމެ ރަނގަޅު މަގަކީ ވާހަކަ ދެއްކުން ކަމަށާއި ގައުމެއް އެކަހެރި ކުރުމާ އިރާގުން ދެކޮޅު ކަމަށެވެ.

އިރާގާއި ޤަތަރުން މި ބައްދަލުވުން ބާއްވާފައިވަނީ ދެ ގައުމުގެ ގުޅުން ބަދަހިކުރުމާއި އައިއެސް ބަލި ކުރުމަށްފަހު އިރާގް އަލުން އާރާސްތު ކުރާނެ ގޮތާބެހޭ ބެހޭ ގޮތުން މަޝްވަރާކުރުމަށެވެ.

ޖޫން މަހުގެ 5 ވަނަ ދުވަހު ސައުދީ އަރަބިއްޔާ އާއި ޔުނައިޓެޑް އަރަބް އެމިރޭޓްސްއާ، މިސްރާއި،ބަހްރެއިން އިން ވަނީ ގަތަރާއެކު އޮންނަ ޑިޕްލޮމެޓިކް ގުޅުމާއި ދަތުރުފަތުގެ ގުޅުން ކަނޑާލައި އެ ގައުމަށް ދަތިކުރުމުގެ ފިޔަވަޅު އަޅާފައެވެ.

ގަތަރާމެދު ފިޔަވަޅު އެޅި ގައުމުތަކުން ޖޫން މަހުގެ 22 ވަނަ ދުވަހު ވަނީ 13 ނުކުތާއެއްގެ މައްޗަށް ހިމެނޭ ޑިމާންޑްތަކެއް ހުށަހަޅާފައެވެ. އޭގެ ތެރޭގައި އަލްޖަޒީރާ ބަންދުކުރުމާއި އީރާނާ ގުޅުން ކަނޑާލުން ވެސް ހިމެނޭއިރު ގަތަރުން ވަނީ އެ ޑިމާންޑްތަކަށް ދެކޮޅު ހަދާފައެވެ.