މި ސީޒަން ގެއްލިދާނެ ކަމުގެ ބިރު އެބައޮތް: ޔުއެފާގެ ރައީސް
29 މާރިޗު 2020 | އާދީއްތަ 02:03ޔޫރަޕުގެ ބޮޑު ފަސް ލީގުގެ ކުޅުން ވަނީ މެދު ކަނޑާލާފައި
އިނގިރޭސި ޕްރިމިއާ ލީގުގެ މެޗެއްގެ ތެރެއިން
ޔޫރަޕުގައި މިހާރު ހަލުވިކަމާއިއެކު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން މެދުކަނޑާލާފައިވާ ލީގުތައް ނުފެށި ލަސްވާނަމަ, މި ސީޒަން ގެއްލިދާނެ ކަމުގެ ބިރު އެބައޮތް ކަމަށް ޔުއެފާގެ ރައީސް އަލެކްސެންޑަ ސެފެރިން ވިދާޅުވެއްޖެއެވެ.
ސެފެރިން މިހެން ވިދާޅުވިއިރު ޔޫރަޕުގެ ބޮޑު ފަސް ލީގާއި ޔުއެފާ ޗެމްޕިއަންސް ލީގުގެ އިތުރުން ޔުއެފާ ޔޫރޮޕާ ލީގުގެ ކުޅުން ވަނީ މެދު ކަނޑާލައިފައެވެ.
ސެފެރިން ވިދާޅުވީ މެދު ކަނޑާލާފައިވާ ލީގުތައް ފެށުމަށް ހަދާފައިވާ ޕްލޭނާއި އެއްގޮތަށް ކަންކަން ނުގޮސްފިނަމަ، ސީޒަން އަތުން ދޫވުމުގެ ބިރު އެބައޮތް ކަމަށެވެ.
އިޓަލީގެ މީޑިއާއަކަށް ދިން އިންޓަވިއުއެއްގައި ސެފެރިން އިތުރަށް ވިދާޅުވީ ސީޒަން ކުރިޔަށް ގެންދާނެ ގޮތަކާމެދު ގައުމުތަކުގެ ފުޓްބޯޅަ އިދާރާތަކާއި، ފީފާއިން އަދި ޔުއެފާއިން މަޝްވަރާ ކުރަމުން އަންނަ ކަމަށާއި، ސީޒަން އަތުން ގެއްލި ނުދާން ކުރެވެން ހުރި ކަންކަމުގެ މައްޗަށް ބަލަމުން އަންނަ ކަމަށެވެ. އަދި ސަޕޯޓަރުން ނުވައްދާ ލީގުތައް ނިންމަން ޖެހިއްޖެ ހާލަތުގައި އެކަން ކުރަން ވެސް އޮތީ ތައްޔާރަށް ކަމަށް ސެފެރިން ވިދާޅުވިއެވެ.
މުޅި ދުނިޔޭގައި ހަލުވިކަމާއެކު ފެތުރެމުން އަންނަ ކޮވިޑް-19 ގެ ސަބަބުން މިއަހަރުގެ ހޫނު މުސުމަށް ތާވަލުކޮށްފައިވާ ޔޫރޯ ފުޓްބޯޅަ މުބާރާތާއި ކޮޕަ އެމެރިކާ ފުޓްބޯޅަ މުބާރާތް ވަނީ އަންނަ އަހަރަށް ފަސްކޮށްފައެވެ. އެހެންކަމުން މެދުކަނޑާލާފައިވާ ލީގުތަކުގެ ކުޅުން ހޫނު މޫސުމުގައި ކުރިއަށް ގެންދެވޭނެ ކަމަށް ބެލެވެއެވެ.
