ދުނިޔޭގައި މިހާރު ހަލުވިކަމާއެކު ފެތުރެމުންދާ ކޮވިޑް-19 އާ ގުޅިގެން ސްރީލަންކާގައިވެސް އެބަލި ފެތުރެމުންދާތީ، ގައުމުން ބޭރުގައި ތިބި ލަންކާ މީހުން، ތިބި ތަނެއްގައި އިހަށް މަޑުކުރުމަށް ލަންކާގެ ރަައީސް ގޮތަބަޔާ ރާޖަޕަކްސާ އެދިވަޑައިގެންފި އެވެ.

ލަންކާގެ ރައީސް ގޮތަބަޔާ ކުރެއްވި ޓްވީޓެއްގައި ވިދާޅުވެފައިވަނީ، ސްރީލަންކާގައި މިހާރު ފެތުރެމުންދާ ކޮވިޑް-19ގެ ހާލަތު ކޮންޓްރޯލް ކުރެވެންދެން، ސްރީލަންކާއިން ބޭރުގައި ތިބި އެގައުމުގެ މީހުން، އެމީހަކު ހުރިތަނެއްގައި މަޑުކޮށްލަން އެދޭ ކަމަށެވެ.

މީގެއިތުރުން، ގޮތަބަޔާ ވިދާޅުވީ، ލަންކާއިން ކޮވިޑް-19 ފެތުރުން ހުއްޓުމަކަށް ގެނައުމަށްޓަކައި ލަންކާގެ އެއަރޕޯޓް ވެސް އޮތީ ބަންދު ކުރެވިފައި ކަމަށެވެ. އަދި ދުނިޔޭގެ ގިނަ ގައުމުތަކުންވެސް ވައިގެ ދަތުރުފަތުރުތައް މަޑުޖައްސާލާފައިވާ ކަމަށެވެ.

ސްރީލަންކާގައި މިހާތަނަށް ކޮވިޑް-19 އަށް 113 މީހަކު ވަނީ ޕޮޒިޓިވް ވެފަ އެވެ. ލަންކާއިން ކޮވިޑް-19 ޖެހިގެން މިހާތަނަށް މަރުވީ އެންމެ މީހެކެވެ. އެމީހާ މަރުވީ ހޮނިހިރު ދުވަހު އެވެ. ލަންކާއިން ކޮވިޑް-19 ޖެހިގެން މިހާތަނަށް 9 މީހަކު ވަނީ ރަނގަޅު ވެފަ އެވެ. އަދި ފަރުވާ ދެމުންދަނީ 103 މީހަކަށެވެ.