އެއް ރިސޯޓުން އަނެއް ރިސޯޓަށް ފަތުރުވެރިން ބަދަލު ކުރުމުގެ ހުއްދަ ދީފި
28 މާރިޗު 2020 | ހޮނިހިރު 12:11އެއް ރިސޯޓުން އަނެއް ރިސޯޓަށް ފަތުރުވެރިން ބަދަލު ކުރެވޭނީ ޓޫރިޒަމް މިނިސްޓްރީގެ ހުއްދަ ހޯދައިގެން
ރާއްޖޭގެ ޓޫރިސްޓް ރިސޯޓެއް
ރާއްޖޭގައި ކޮވިޑް-19 ފެތުރުން ކޮންޓްރޯލް ކުރުމަށް އެޅި ފިޔަވަޅުތަކުގެ ތެރެއިން، ރިސޯޓު ތަކުގެ މެދުގައި ދަތުރު ނުކުރަން ކުރިން އަަންގާފައި ވިޔަސް އެއް ރިސޯޓުން އަނެއް ރިސޯޓަށް ޓޫރިސްޓުން ގެންދަން ޓޫރިޒަމް މިނިސްޓްރީ އަށް ހާއްސަ ހުއްދައެއް ދެއްވައިފި އެވެ.
ހުކުރު ދުވަހުގެ ރޭ ނޭޝަނަލް އިމަޖެންސީ އޮޕަރޭޝަން ސެންޓަރު (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ޑިރެކްޓަރ ޖެނެރަލް ޕަބްލިކް ހެލްތް މައިމޫނާ އަބޫބަކުރު ވިދާޅުވީ، އެއް ރިސޯޓުން އަނެއް ރިސޯޓަށް މީހުން ދަތުރު ނުކުރަން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ކުރިން އަންގާފައި ވިޔަސް، ޓޫރިޒަމް މިނިސްޓްރީގެ ޚާއްސަ ހުއްދައެއްގެ ދަށުން ފަތުރުވެރިން އެއް ރިސޯޓުން އަނެއް ރިސޯޓަށް ގެންދެވިދާނެ ކަމަށެވެ.
ނަމަވެސް އެއްރިސޯޓުން އަނެއް ރިސޯޓަށް ފަތުރުވެރިން ބަދަލުކުރެވޭނީ، އެކަމަށް އެދި ޓޫރިޒަމް މިނިސްޓްރީއަށް ލިޔުމުން ހުށަހެޅައި އެނިސްޓްރީން ހުއްދަ ލިބިގެންކަމަށް ޓޫރިޒަމް މިނިސްޓްރީން ނެރެފައިވާ ސާކިއުލާގައި ބުނެފައި ވެއެވެ.
މައިމޫނާ ވިދާޅުވީ، ރާއްޖޭގައި މިހާރު ފަތުރުވެރިން މަދުވެ، ބައެއް ރިސޯޓުތަކުގައި ތިބި ވަކިވަކި ޓޫރިސްޓުން އެހެން ރިސޯޓުތަކަށް ބަދަލުކުރުމުގެ ހުއްދަ ދިނީ، ހުސްވާ ރިސޯޓުތައް ކަރަންޓީނު ފެސިލިޓީތަކުގެ ގޮތުގައި ބޭނުން ކުރުމަށް ކުރާ މަސައްކަތް ފަސޭހަ ކުރުމުގެ ގޮތުން ކަމަށެވެ.
އެއް ރިސޯޓުން އަނެއް ރިސޯޓަށް ފަތުރުވެރިން ބަދަލު ކުރުމާއި ގުޅޭގޮތުން ބައެއް ރިސޯޓްތަކުގެ މުވައްޒަފުން ގެންދަނީ ނުރުހުން ފާޅުކުރަުން ނެވެ. ރިސޯޓްތަކުގެ ބައެއް މުވައްޒަފުން ބުނަމުންދަނީ، ހުކުރު ދުވަހު، ޕޮޒިޓިވްވި އިޓަލީގެ ދެ ފަތުރުވެރިޔާ ފުރުމުގެ ހުއްދަ، އެމީހުން ކަރަންޓީންގެ 14 ދުވަހުގެ މުއްދަތު ހަމަވިފަހުން، އެމީހުން އެނބުރި ގައުމަށްދިޔުމުގެ މަގުމަތީގައި ވަނިކޮށް، އެ ދެ މީހުންގެ ސާމްޕަލް ޕޮޒިޓީވްވިކަން އެޗްޕީއޭއިން ހާމަކޮށްފައިވާތީ، ކޮވިޑް-19ގެ ބަލި ފެތުރޭ ގޮތުގެ ނުވަތަ ކަރަންޓީން މުއްދަތާމެދު ވެސް ޝައްކު އެފެދޭ ކަމަށްބުނެ އެވެ.
މީގެއިތުރުން، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އިއުލާން ކުރައްވާފައިވާ، އެންމެފަހު ފަތުރުވެރިޔާ އެ ރިސޯޓަކުން ފުރާ ދުވަހުން ފެށިގެން 14 ދުވަސް ފަހުން އެރިސޯޓެއް މުވައްޒަފުންނަށް ރިސޯޓުން ފޭބުމުގެ ހުއްދަ ލިބޭނެކަން އަންގާފައިވަނިކޮށް، އެހެން ރިސޯޓެއްގައި ތިބި ފަތުރުވެރިންތަކެއް، އެގޮތަށް ރިސޯޓްތަކަށް ބަދަލު ކުރުމަކީ އެންމެ ރައްކާތެރި ގޮތެއް ނޫންކަމަށް ބައެއް ރިސޯޓްތަކުގެ މުވައްޒަފުން ދަނީ ބުނަމުން ނެވެ.
