ކޮވިޑް-19: ޔޫއޭއީ ގައި ކާފިއު އިއުލާންކޮށް މުޅި ގައުމު ޑިސްއިންފެކްޓްކުރަން ފަށައިފި

ކޮވިޑް-19 ފެތުރުން ކޮންޓްރޯލްކުރުމަށް ޔުނައިޓެޑް އަރަބް އެމިރޭޓްސް (ޔޫއޭއީ) ގައި ރޭގަނޑު ގަޑީގައި ކާފިއުހިންގާ މުޅި ގައުމު ޑިސްއިންފެކްޓް ކުރުމުގެ މަސައްކަތް ފަށައިފި އެވެ.

ގަލްފް ސަރަހައްދުގައި ވައިރަސް ޖެހުނު މީހުންގެ އަދަދު 2،600 ށް ވުރެ މައްޗަށް އެރުމާއެކު އެގައުމުގައި އަންނަނީ ރައްކާތެރިކަމުގެ ފިޔަވަޅުތައް ވަރުގަދަ ކުރަމުންނެވެ. އެގޮތުން ބުރާސްފަތި ދުވަހުން ފެށިގެން އާދިއްތަ ދުވަހާ ހަމައަށް ރޭގަނޑު ގަޑީގައި އެގައުމުގައި ކާފިއު ހިންގާނެ ކަމަށް ޔޫއޭއީގެ ކަމާބެހޭ ފަރާތްތަކުން ވަނީ ބުނެފައެވެ. ރޭގަނޑު 8 ން ހެނދުނު 6 އާ ހަމައަށް ކޮންމެ ރެއަކުވެސް ކާފިއު ކުރިޔަށްދާނެ އެވެ.

މިގަޑީގެ ތެރޭގައި ބޭރަށް ނިކުމެ އުޅެވޭނީ ކޮންމެހެން ދޭންޖެހޭ ޚިދުމަތްތައް ދިނުމުގައި ހަރަކާތްތެރިވާ ފަރާތްތަކަށްކަމަށާއި އެހެން ފަރާތްތަކުން ބޭރުގައި އުޅޭނަމަ ޖޫރިމަނާ ކުރާނެކަމަށް އެގައުމުން ބުނެއެވެ. ބުރާސްފަތި ދުވަހު އޮތް ނޫސްވެރިންގެ ބައްދަލުވުމެއްގައި އެގައުމުގެ ކަމާބެހޭ ފަރާތްތަކުން ހާމަކޮށްފައިވަނީ ޕަބްލިކް ޓްރާންސްޕޯޓްވެސް އެވަގުތުތަކުގައި މެދުކެނޑޭނެކަމަށެވެ.

ބުދަ ދުވަހު އެގައުމުގެ ޕްރައިވެޓް ސެކްޓަރގައި މަސައްކަތްކުރާ ފަރާތްތަކުން ގޭގައި ތިބެގެން މަސައްކަތްކުރުމަށް ވަނީ އަންގާފަ އެވެ. އަދި ބުރާސްފަތި ދުވަހުން ފެށިގެން ސަރުކާރު މުވައްޒަފުންނާއި ޕްރައިވެޓް ސެކްޓަރ ތަކުގައި މަސައްކަތްކުރާ ތަންތަނުންވެސް މަސައްކަތް ކުރުމަށް އެތަނެއްގެ 30 އިންސައްތަ މުވައްޒަފުން ނެރުމަށް ވަނީ އަންގާފަ އެވެ.

ބުރާސްފަތި ދުވަހު ސައުދީ އަރަބިއްޔާގައި ކޮވިޑް-19 ޖެހުނު މީހުންގެ އަދަދު ވަނީ 1000 އަށް ވުރެ މަތިވެފަ އެވެ. އަދި މަދީނާގައި ދިރިއުޅޭ ތިން މީހަކު މިވައިރަސް ޖެހިގެން މަރުވެފައިވާކަމަށް އެގައުމުން ވަނީ ހާމަކޮށްފަ އެވެ. އެއާއެކު މަދީނާ އާއި މައްކާ އަދި ރިޔާޒު ވަނީ ލޮކްޑައުންކޮށްފަ އެވެ. މީގެއިތުރުން ކުވައިތް، ބަހުރެއިން އަދި ގަތަރުންވެސް ވަނީ އައު މީހުންނަށް ވައިރަސް ޖެހިފައެވެ. ހަ ގައުމު ހިމެނޭ ގަލްފު ސަރަހައްދުން މިހާތަނަށް އާއިރު 9 މީހަކު ވަނީ ވައިރަސް ޖެހިގެން މަރުވެފަ އެވެ.

ގަލްފު ގައުމުތަކުގެ ތެރެއިން އެންމެ ބޮޑެތި ފިޔަވަޅުތައް އަޅަމުން އަންނަނީ ކުވައިތު އަދި ސައުދީ އަރަބިއްޔާއިންނެވެ. އޭގެތެރޭގައި ކާފިއު ހިންގުމާއި ސަރުކާރާއި ޕަބްލިކް ސެކްޓަރގެ މަސައްކަތްތައް މެދުކަނޑާލުން ހިމެނެއެވެ.