އެކްސްޕެޓް އޮންލައިން ސިސްޓަމް މެދުވެރިކޮށް ބިދޭސީންނަށް ދޭ ޚިދުމަތްތަކުގެ މުއްދަތު އިތުރުކޮށްފި
27 މާރިޗު 2020 | ހުކުރު 06:25އެމްޕްލޯއިމަންޓް އެޕްރޫވަލްގެ ކޯޓާގެ މުއްދަތު އިތުރުކުރުމުގެ ޚިދުމަތް ލިބޭނެ
ރާއްޖޭގައި މަސައްކަތް ކުރާ ބިދޭސީންތަކެއް
ސަރުކާރު ބަންދު ކުރެވިފައިވާ މުއްދަތުގައި އެކްސްޕެޓް އޮންލައިން ސިސްޓަމް މެދުވެރިކޮށް ބިދޭސީންނަށްދޭ ޚިދުމަތްތަކުގެ މުއްދަތު އިތުރުކޮށްފިއެވެ.
ކޮވިޑް-19 އާ ގުޅިގެން ރައްކާތެރިކަމުގެ ގިނަ ފިޔަވަޅުތަކެއް ރާއްޖެއިން ވަނީ އަޅާފައެވެ. އެގޮތުން ސަރުކާރުގެ އޮފީސްތައް ވަނީ ބަންދުކޮށްފައިވާތީ، އެކްސްޕެޓް އޮންލައިން ސިސްޓަމް ދެމުން އައި ބައެއް ޚިދުމަތްތައް މެދުކަނޑާލިއެވެ.
ނަމަވެސް އިކޮނޮމިކް މިނިސްޓްރީން ބުނީ ސަރުކާރު ބަންދު ކޮށްފައިވާ މުއްދަތު 2020 އޭޕްރީލް 2 ވަނަ ދުވަހުގެ ނިޔަލަށް އިތުރުކުރައްވާފައިވާތީ، މިނިސްޓްރީން އެކްސްޕެޓް އޮންލައިން ސިސްޓަމް މެދުވެރިކޮށް ދެމުންގެންދާ ޚިދުމަތަކުގެ ތެރެއިން، އެމްޕްލޯއިމަންޓް އެޕްރޫވަލްގެ މުއްދަތު އިތުރު ކުރުމަށް ބޭނުންވާ ކޯޓާގެ މުއްދަތު އިތުރުކުރުމުގެ ޚިދުމަތާއި އެމްޕްލޯއިމަންޓް އެޕްރޫވަލްގެ ޚިދުމަތްތައް ލިބޭނެ ކަމަށެވެ.
އެގޮތުން ހަފްތާ ބަންދު ފިޔަވައި ކޮންމެ ދުވަހަކު، 2020 މާރިޗް 29 ވަނަ ދުވަހުން ފެށިގެން 2020 އޭޕްރިލް 2 ވަނަ ދުވަހުގެ ނިޔަލަށް ހެނދުނު10:00އިން މެންދުރު 12:00 އަށް އެކްސްޕެޓް އޮންލައިން ސިސްޓަމް މެދުވެރިކޮށް އެޕްލިކޭޝަން ހުށަހެޅުމުގެ އިންތިޒާމް ހަމަޖެހިފައިވާ ކަމަށެވެ.
އެކްސްޕެޓް އޮންލައިން ސިސްޓަމަކީ ދިވެހި ރާއްޖެއަށް ބިދޭސީ މީހަކު ގެންނަން ބޭނުންވާ ވަޒީފާދޭ ފަރާތްތަކުން ރަޖިސްޓަރ ކުރެވި މައުލޫމާތު ހިމަނާފައިވާ ސިސްޓަމެކެވެ.
އޮންލައިން ރަޖިސްޓްރޭޝަން އަކީ ބިދޭސީ މީހުން ގެނައުމުގެ ގޮތުން އެކްސްޕެޓް ސިސްޓަމް ގައި ރަޖިސްޓްރީ ކުރެވި، އޮންލައިން އެޕްލިކޭޝަން ހުށައަޅައި އަދި ކޯޓާ އާއި އެންޕްލޮއިމަންޓް އެޕްރޫވަލް އަށް އެޕްލައި ކުރުމުގެ ގޮތުން ހަދާފައިވާ ސިސްޓަމެކެވެ.
