އިންޑިއާގެ މަޝްހޫރު ޓެނިސް ކުޅުންތެރިޔާ ސާނިޔާ މިރްޒާގެ ބައޯޕިކް ކުޅޭނެ ތަރިއަކާއި މެދު ވަނީ މަޝްވަރާ ކުރެވިފައެވެ.
ރޮނީ ސްކްރޫވާލާ ޕްރިޑިއުސް ކުރާ މި ފިލްމްގައި ސާނިޔާގެ ރޯލް އަދާކުރާނީ އޭނާގެ ބެސްޓް ފްރެންޑް ޕަރިނީތީ ޗޯޕްރާ ކަމަށް ސާނިޔާ ކުރިން ވަނީ ބުނެފައެވެ.
ދާދި ފަހުން "ޕިންކްވިލާ" އަށް ދިން އިންޓަވިއުއެއްގައި ސާނިޔާ ބުނެފައިވަނީ ޕަރިނީތީއަށް އޭނާގެ ބައޯޕިކް ނުކުޅެވޭނެ ކަމަށެވެ. ސަބަބަކީ ޕަރީ މި ވަގުތު ދަނީ ބެޑްމިންޓަން ކުޅުންތެރިޔާ ސައިނާ ނެހްވާލްގެ ބައޯޕިކްގައި މަސައްކަތް ކުރަމަށް ތައްޔާރު ވަމުންދާތީ ކަމަށެވެ.
އިތުރަށް ސާނިޔާ ބުނެފައިވަނީ އޭނާގެ ރޯލް އަދާކުރާނެ ކުޅަދާނަ އެތައް ތަރިންނެއް އެބަ ތިބި ކަމަށެވެ. އެގޮތުން ސާނިޔާ ވަނީ އާލިއާ ބަޓް، އަނުޝްކާ ޝަރްމާ، ދިޕިކާ ޕަދުކޯން އަދި ސާރާ އަލީ ޚާންގެ ނަން ފާހަގަކޮށްފައެވެ.
މިވަގުތު ދަނީ ފިލްމްގެ ޕްރީ ޕްރޮޑަކްޝަންގެ މަސައްކަތްތައް ކަމަށާއި ފިލްމަށް ޑައިރެކްޓަރެއް ހޯދުމުގެ މަސައްކަތް ކުރަމުންދާ ކަމަށް ސާނިޔާ ވަނީ ބުނެފައެވެ.
