ވާރކް ވިސާ ފިޔަވައި، އެހެނިހެން ވިސާތަކުގައި ތިބި މީހުން ސަރުކާރު ހުޅުވާތާ 10 ދުވަސް ތެރޭގައި ވިސާ އާ ކުރަންޖެހޭ: އިމިގްރޭޝަން
27 މާރިޗު 2020 | ހުކުރު 04:38ވާރކް ފީ ދެއްކިފައިނުވާ ފަރާތްތައް އެމައުލޫމާތު ހިއްސާކޮށްދިނުމަށް ވަނީ އެދިފައި
އިމިގްރޭޝަން މުވައްޒަފުން
ވާރކް ވިސާ ފިޔަވައި، އެހެނިހެން ވިސާތަކުގައި ރާއްޖޭގައި ތިބި ފަރާތްތަކުގެ ތެރެއިން، ސަރުކާރު ބަންދު މުއްދަތުގެ ތެރޭގައި ވިސާގެ މުއްދަތު ހަމަވާ ފަރާތްތައް، ރަސްމީކޮށް ސަރުކާރުގެ އިދާރާތަކުން މަސައްކަތް ކުރަންފަށާ ދުވަހުންފެށިގެން 10 ދުވަހުގެ ތެރޭގައި ވިސާ އައުކުރަން ހުށަހަޅަންޖެހޭ ކަމަށް މޯލްޑިވްސް އިމިގްރޭޝަނުން ބުނެފިއެވެ.
އިމިގްރޭޝަނުން ބުނީ ވާރކް ވިސާ އަދި އެހެނިހެން ވިސާ ތަކުގައި ރާއްޖެ އެތެރެވެފައިވާ ފަރާތްތަކާއި ގުޅޭ ރާއްޖޭގައި ކޮވިޑް-19 ފެތުރުން ކޮންޓްރޯލްކޮށް، އާންމު ރައްޔިތުންގެ ސަލާމަތާއި ރައްކާތެރިކަމަށްޓަކައި19 މާރޗް 2020 އިން ފެށިގެން ސަރުކާރު އިދާރާތަށް ބަންދުކޮށްފައިވުމާއެކު، ޚިދުމަތްތަކަށް ބަދަލުގެނެވިފައިވާ ކަމަށެވެ.
އެގޮތުން އައު އެމްޕްލޯއިމަންޓް އެޕްރޫވަލްގެ ދަށުން 01 މާރޗް 2020ގެ ފަހުން ރާއްޖެ އެތެރެވެފައިވާ ފަރާތްތަކުގެ ތެރެއިން، އެކިއެކި ސަބަބުތަކާހުރެ، ވާރކް ފީ ދެއްކިފައިނުވާ ފަރާތްތައް ރަސްމީކޮށް ސަރުކާރުގެ އިދާރާތަކުން މަސައްކަތް ކުރަން ފަށާ ދުވަހުން ފެށިގެން 10 ދުވަހުގެ ތެރޭގައި އެފަރާތްތަކުގެ މަޢުލޫމާތު މުވައްސަސާއަށް ހިއްސާކުރަންޖެހޭ ކަމަށެވެ. އަދި ވާރކް ވިސާ ފިޔަވައި، އެހެނިހެން ވިސާތަކުގައި ރާއްޖޭގައި ތިބި ފަރާތްތަކުގެ ތެރެއިން، ސަރުކާރު ބަންދު މުއްދަތުގެ ތެރޭގައި ވިސާގެ މުއްދަތު ހަމަވާ ފަރާތްތައް، ރަސްމީކޮށް ސަރުކާރުގެ އިދާރާތަކުން މަސައްކަތް ކުރަންފަށާ ދުވަހުން ފެށިގެން 10 ދުވަހުގެ ތެރޭގައި ވިސާ އައުކުރުމަށް ހުށަހަޅަންޖެހޭ ކަމަށް އިމިގްރޭޝަނުން ބުނެއެވެ.
މީގެ އިތުރުން އިމިގްރޭޝަނުން ބުނީ ސަރުކާރުގެ އިދާރާތައް ރަސްމީކޮން ބަންދުކުރަން ނިންމާފައިވާ މުއްދަތުގެ ތެރޭގައި، އެމްޕްލޯއިމަންޓް އެޕްރޫވަލް ލިބި ވިސާ އައު ނުކުރެވިވާ ފަރާތްތަކާއި، އެހެނިހެން ވިސާ ތަކުގައި ރާއްޖޭގައި އުޅޭ ފަރާތްތަކުގެ ތެރެއިން ސަރުކާރު ބަންދު ދުވަސްތަކުގައި ވިސާ ހަމަވާ ފަރާތްތައް ރާއްޖެއިން ފުރައިގެން ދިއުމަށް ބޭނުންވާނަމަ، އެފަރާތްތައް ސްޕޮންސަރ ކޮށްފައިވާ ފަރާތުން IM34 ނަންބަރު ފޯމާ 'އެޕްލިކޭޝަން ފޯރ އިމަރޖެންސީ ޑިޕަރޗަރ' (ވެބްސައިޓްwww.immigration.gov.mv) ފުރިހަމަކުރުމަށް އެދޭ ކަމަށެވެ. އަދި މި ފޯމާއެކު ބޭނުންވާ ލިޔެކިއުން ހަމަކޮށް އެއަރޕޯރޓަށް ދިއުމުން ކަނޑައެޅިފައިވާ އުސޫލުގެ ތެރެއިން ފުރުވާލުމުގެ އިންތިޒާމް ހަމަޖެހިގެންދާނެ ކަމަށް އިމިގްރޭޝަނުން ބުނެއެވެ.
އިމިގްރޭޝަނުން ބުނީ މިގޮތުގެ މަތިން އަމަލުކުރާ ފަރާތްތަކަށް ޖޫރިމަނާ ފައިސާއާއި ނުލައި، ހަމަޖެހިފައިވާ އުސޫލުގެ ތެރެއިން ވިސާ އަދި ވިސާ ފީގެ އެންމެހައި ކަންތައްތައް ކުރިއަށް ގެންދިއުމަށް ވެސް ހަމަޖެހިފައިވާ ކަމަށެވެ.
