މަތީ ތައުލީމް ހާސިލު ކުރުމަށް ދޫކޮށްފައިވާ ސްޓޭޑަންޓް ލޯން ދެއްކުން 6 މަސްދުވަހަށް ފަސްކުރުމަށް ނިންމައިފިއެވެ.
މިކަން އިއުލާނުކުރެއްވީ ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ރައިސުލްޖުމްހޫރިއްޔާ އިބްރާހިމް މުހައްމަދު ސާލިހުއެވެ.
" ސަރުކާރުން މިހާރު ނިންމާފައިވަނީ މި ދެންނެވި ސްޓޫޑަންޓް ލޯނު އަނބުރާ ދެއްކުން 6 މަސްދުވަހަށް ފަސްކޮށްދިނުމަށް. މިހާރު އޮތް ސްޓޫޑެންޓް ލޯނު ސްކީމް ކަނޑައެޅިފައި އޮތް ގޮތަށް ކުރިއަށް ދާނެ "
ރައީސް ވިދާޅުވީ ސަރުކާރުން މިހާރު ނިންމާފައިވަނީ ސްޓޫޑަންޓް ލޯނު އަނބުރާ ދެއްކުން 6 މަސްދުވަހަށް ފަސްކޮށްދިނުމަށްކަމަށެވެ. އަދި މިހާރުވެސް 4000 އަށް ވުރެ ގިނަ ފަރާތްތަކުން މި ލޯނު ދައްކަން ޖެހޭ ކަން ފާހަގަކުރައްވާ ރައީސް ވިދާޅުވީ މިހާރު އޮތް ސްޓޫޑެންޓް ލޯނު ސްކީމް ކަނޑައެޅިފައި އޮތް ގޮތަށް ކުރިއަށް ދާނެކަމަށެވެ.
ސަރުކާރުން މިގޮތަށް ނިންމާފައިވާއިރު މި ލޯނު ސްކީމްގެ ދަށުން 550 ފަރާތަކަށް 151 މިލިއަން ރުފިޔާގެ ލޯނު ދޫކުރުމަށް ވަނީ ނިންމާފައެވެ. އދި ލޯނު ދޫކުރާއިރު، އެފަރާތްތައް ކަނޑައެޅުމުގައި މާލީ ތަނަވަސްކަން ނެތް ފަރާތްތަކަށް އިސްކަން ދެއްވާނެ ކަމަށް ހަޔަރ އެޑިއުކޭޝަން މިނިސްޓްރީން ވަނީ ބުނެފައެވެ.
ހަޔަރ އެޑިއުކޭޝަން މިނިސްޓްރީން މިދިއަ އަހަރު ތިން ބުރަކުން 140 މިލިއަން ރުފިޔާ ލޯނުގެ ގޮތުގައި ދޫކޮށްފައިވެއެވެ. އަދި މިއަހަރުގެ ފުރަތަމަ ބުރުގައިވެސް 151 މިލިއަން ރުފިޔާގެ ލޯނު ދޫކުރުމަށް ނިންމާފައިވާއިރު، އިތުރު ބުރެއް އޮންނާނެ ކަމަށްވެސް މިނިސްޓްރީން ވަނީ ބުނެފައެވެ.
