ގެވެށި އަނިޔާގެ އެއްވެސް އަމަލެއް ހިނގާނަމަ 3328393 އަށް ގުޅުމަށް އިލްތިމާސްކޮށްފި
25 މާރިޗު 2020 | ބުދަ 07:47ކުޑަ ކުއްޖަކާއި މެދު އަނިޔާގެ އެއްވެސް އަމަލެއް ހިންގާނަމަ އެކަމަށް ހާއްސަ ކުރެވިފައިވާ 1412 އަށް ގުޅުމަށްވެސް ވަނީ އެދިފައި
ކުޑަކުދިންނަށް ކުރާ އަނިޔާ އާ ދެކޮޅަށް ކުރިޔަށްގެންދިޔަ އެއްވުމުގެ ތެރެއިން
ގެވެށި އަނިޔާގެ މައްސަލަތަކަކީ ރާއްޖޭގައި އާންމު މައްސަލަތަކަށްވާއިރު މިދުވަސްވަރަކީ ކޮވިޑް-19 އާއި ގުޅިގެން އާންމުންގެ ގިނަ ބަޔަކު ގިނަ ވަގުތު ގޭގައި ތިބޭ ދުވަސްވަރެކެވެ.
އެހެންކަމުން ޖެންޑަރ މިނިސްޓްރީން ވަނީ ގެވެށި އަނިޔާގެ އެއްވެސް އަމަލެއް ހިނގާނަމަ އެމިނިސްޓްރީއަށް ރިޕޯޓްކުރުމަށް އެދިފައެވެ. ޖެންޑަރ މިނިސްޓްރީން ކޮށްފައިވާ ޓްވީޓްތަކެއްގައި ބުނެފައިވަނީ އެފަދަ އެއްވެސް ޢަމަލެއް ހިނގާނަމަ 3328393 އަށް ގުޅާ ރިޕޯޓްކުރުމަށެވެ.
އަދި އެހެން މީހަކާއި މެދު ގެވެށި އަނިޔާގެ އަމަލެއް ހިންގާ މަންޒަރު ފެންނަ ފަރާތަކުން ވެސް މި ނަމްބަރަށް ގުޅައި އެކަން ރިޕޯޓްކުރުމަށްވަނީ އެދިފައެވެ.
މީގެއިތުރުން ޖެންޑަރ މިނިސްޓްރީން ވަނީ ކުޑަ ކުއްޖަކާއި މެދު އަނިޔާގެ އެއްވެސް އަމަލެއް ހިންގާނަމަ އެކަމަށް ހާއްސަ ކުރެވިފައިވާ 1412 އަށް ގުޅައި އެކަން ރިޕޯޓްކުރުމަށް އިލްތިމާސްކޮށްފައެވެ.
ޖެންޑަރ މިނިސްޓްރީން އެންމެފަހުން އާންމުކޮށްފައިވާ ޖެނުއަރީ މަހުގެ ތަފާސްހިސާބުތައް ދައްކާގޮތުން ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާގެ 34 މައްސަލަ ވަނީ އެމަސްތެރޭގައި އެމިނިސްޓްރީއަށް ހުށަހަޅާފަ އެވެ. އަދި ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 121 މައްސަލަ ވަނީ ރިޕޯޓުކޮށްފައެވެ.
