ކޮވިޑް-19: ހުޅުމާލޭގެ މަގުތައް ވެސް ކްލޮރިން ޖަހައިގެން ސާފުކުރަން ފަށައިފި
ޑިސްއިންފެކްޓް ކުރުމުގެ މަސައްކަތް ކުރަނީ އެމްއެންޑީއެފްއާއި މާލެ ސިޓީ ކައުންސިލުން ގުޅިގެން
ހުޅުމާލެ ޑިސްއިންފެކްޓް ކުރުމުގެ ތެރެއިން
ހުޅުމާލޭގެ މަގުތައް ވެސް ކްލޮރިން ޖަހައިގެން ސާފު ކުރުމުގެ މަސައްކަތް ފަށައިފިއެވެ.
އެގޮތުން މާލެސިޓީ ކައުންސިލާއި މޯލްޑިވްސް ނެޝެނަލް ޑިފެންސް ފޯރސް (އެމްއެންޑީއެފުން) ގުޅިގެން މި މަސައްކަތް ފަށާފައިވަނީ ބުދަ ދުވަހުގެ ހެނދުނުގެ ވަގުތެއްގައެވެ.
ހުޅުމާލޭގެ މަގުތައް ކްލޮރިން ޖަހައިގެން ސާފުކުރަން ފަށާފައިވާއިރު މި މަހުގެ 23 ވަނަ ދުވަހު މާލޭގެ މަގުތައް ވެސް ސާފު ކުރުމުގެ މަސައްކަތް މާލެސިޓީ ކައުންސިލާއި އެމްއެންޑީއެފުން ވަނީ ފަށާފައެވެ.
އެގޮތުން މިކަމުގެ ތަފުސީލުތައް ހިއްސާކުރައްވަމުން މާލެ ސިޓީގެ މޭޔަރ ޝިފާ މުހައްމަދު ވިދާޅުވީ، މިވަގުތު 2 ކަމެއް ކުރަމުންދާ ކަމަށެވެ. އެގޮތުން މާލޭގެ ހުރިހާ ސަރަހައްދެއް ފެންޖަހައި ސާފުކުރުމާއި ގިނައިން ކުނި ޖަމާވެފައި ނުނަގައި ގިނަ ދުވަސްވެފައިވާ ތަންތަން ސާފުކުރުމުގެ މަސައްކަތް ފަށާފައިވާ ކަމަށެވެ. ޝިފާ ވިދާޅުވީ، މި މަސައްކަތުގެ ތެރެއިން ގެތައް ކައިރީ ޖަހާފައި ހުންނަ ޕެލެޓްތައް ނެގުމަށްފަހު ސާފުކުރާނެ ކަމަށެވެ.
މާލެ ސިޓީގެ މޭޔަރު ވިދާޅުވީ، ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރާއްޖެއިން ފެނުމާއި ގުޅިގެން ސިޓީ ކައުންސިލުން ކުރަމުންދާ މަސައްކަތަށް ރައްޔިތުންގެ ފުރިހަމަ އެއްބާރުލުން ބޭނުންވާކަމަށެވެ. އެގޮތުން، ހެލްތު ޕްރޮޓެކްޝަން އޭޖެންސީން އަންގާފައިވާ ގޮތަށް ސާފުތާހިރުކަން ދެމެހެއްޓުމަށްޓަކައި މަގުތަކަށް ކުޅު ނުޖުހުމަށާއި ގެއިން އުކާލާ ކުނި މަގުތަކުގައި ނުބެހެއްޓުމަށް މޭޔަރު ވަނީ އިލްތިމާސްކުރައްވާފައެވެ. ހޯމަ ދުވަހު ފަށާފައިވާ މި މަސައްކަތުގައި، ހޮޓާ ރެސްޓޯރަންޓް ސަރަހައްދުގައި ހަޑިވެފައި ހުންނަ ތަންތަން ސާފުކުރުމާއި، ވަކީން ގޮސް ޕެލެޓް ތަކުގެ ދަށުގައި ކުނި ޖަމާވެފައިވާ ތަންތަން ސާފުކުރުން ހިމެނެއެވެ.
ޝިފާ ވިދާޅުވީ، މަގުތަށް ސާފުކުރުމުގައި އެޗްޕީއޭއިން ލަފާދިފައިވާ މިންގަނޑަށް ކްލޮރިން ޖަހާނެކަމަށާއި މިކަމުން އެއްވެސް އުޅަނދަކަށް ގެއްލުން ނުވާނެކަމަށެވެ. އަދި މި ދަނޑިވަޅުގައި ހުރިހާ ފަރާތްތަކުންވެސް ފަރުދީ ޒިންމާ އަދާކޮށް މަގުމައްޗަށް ކުނި އުކާނުލުމަށް ޝިފާ ވަނީ އިލްތިމާސްކޮށްފައެވެ.
ޑިސްއިންފެކްޓް ކުރުމުގެ މަސައްކަތް ކުރަނީ އެމްއެންޑީއެފްއާއި މާލެ ސިޓީ ކައުންސިލުން ގުޅިގެންނެވެ.
