މަލީހް މީކާއިލްއަށް: މި ދަނޑިވަޅުގައި ކޮވިޑް-19 އިން ފޯކަސް ގެއްލޭ ކަންކަން ކުރުން ބުއްދިވެރިއެއް ނޫން!
25 މާރިޗު 2020 | ބުދަ 04:41ސަރުކާރުގެ އެސްއޭޕީގައި ވާގޮތަށް ދަނީ އަމަލުކުރަމުން
މިނިސްޓަރ މަލީހް އަދި މެމްބަރު މީކާއިލް
ކޮވިޑް-19 އާ ގުޅިގެން ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާންކޮށްފައިވާ މި ދަނޑިވަޅުގައި އެކަމުން ފޯކަސް ގެއްލޭ ކަންކަން ކުރެއްވުމަކީ ބުއްދިވެރިކަމެއް ނޫންކަމަށް މިނިސްޓަރ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީ މުހައްމަދު މަލީހު ޖަމާލް ވިދާޅުވެއްޖެއެވެ.
މުވާސަލާތީ ހިދުމަތްދޭ ކުންފުނިތަކުން އެކަށީގެންވާ ލުޔެއް ރައްޔިތުންނަށް ނުލިބޭތީ އާއި ކޮމިއުނިކޭޝަންސް އޮތޯރިޓީގެ ޒިންމާ އެންމެ ފުރިހަމައަށް އަދާކުރަމުންނުދަނީ ކީއްވެތޯ ސާފުކުރުމަށް ކޮމިއުނިކޭޝަން އޮތޯރިޓީ އިސްވެރިން ރައްޔިތުންގެ މަޖިލީހުގެ ތަރިކައިގެ ކޮމެޓީއަށް ހާޒިރުކުރުމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އެދިފައިވާ ދަނޑިވަޅުގައި ރާއްޖެއެމްވީއަށް ދެއްވި ހާއްސަ ބަސްދީގަތުމެއްގައި މިނިސްޓަރ ވިދާޅުވީ، ރާއްޖެއިންވެސް ކޮވިޑް-19 ގެ ބަލިމަޑުކަން ފެނިފައިވާ ދަނޑިވަޅެއްގައި އެކަމުން ފޯކަސް ގެއްލޭ ކަންކަން ކުރެއްވުމަކީ ބުއްދިވެރިކަމެއް ނޫންކަމަށެވެ.
މިނިސްޓަރ ވިދާޅުވީ، ސަރުކާރާއި މިނިސްޓްރީގެ މަޝްވަރާތަކާއެކު ކޮވިޑް-19 އާއި ގުޅިގެން މުވާސަލާތީ ހިދުމަތް ދޭ ކުންފުނިތަކުން ރައްޔިތުންނަށް ލުއިތަކެއް ފޯރުކޮށްދިނުމަށް މަސައްކަތް ކުރަމުންދާކަމަށެވެ. އެގޮތުން މިނިސްޓަރ ވަނީ ޕެކޭޖްތަކަށާއި ހިދުމަތް ފޯރުކޮށްދޭ އުސޫލުތަކަށް ލުއި ގެނެސްފައިވާކަން ފާހަގަކުރައްވާފައެވެ. އެންމެން އެއްފަހަރާ އިންޓަނެޓް ބޭނުންކުރާ ވަގުތުތަކުގައި އިންޓަނެޓްގެ ލަސްކަމެއް އޮތް ނަމަވެސް، އެޑިއުކޭޝަން މިނިސްޓްރީއަށްވެސް ޚާއްސަ އިންޓަނެޓް ޕެކޭޖްތަކެއް ތައާރަފްކޮށްފައިވާކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ، ސަރުކާރުގެ ސްޓްރެޓީޖިކް އެކްޝަން ޕްލޭންގައި ވާގޮތަށް އިންޓަނެޓް އަގުހެޔޮކުރުމުގެ މަސައްކަތް ކޮމިއިނިކޭޝަންސް މިނިސްޓްރީއާއި ކޮމިއުނިކޭޝަންސް އެތޯރިޓީއާއި ރައީސް އޮފީހުގެ ޕޮލިސީ އޮފީހާއި ގުޅިގެން ކުރަމުންދާކަމަށާއި ސަރުކާރު ހިންގާ މައި ޕާޓީގެ މެމްބަރަށް އެ މަސައްކަތް ކުރިޔަށް ގޮސްފައިވާ ހިސާބު އެނގިވަޑައިގަންނަވާނެކަމަށެވެ. އަދި ސަރުކާރުން އިންޓަނެޓް ކުރުމަށް ގިނަ މަޝްވަރާތައް ކުރެވުނުކަން ފާހަގަކޮށް މިނިސްޓަރ ވިދާޅުވީ އެންމެ ބޭނުންވާ ހިސާބަށް ކަންކަން ކުރިޔަށް ގެންދިޔުމަށް ޕޮލިސީ އޮފީހުގެ ލަފާގެ މަތީން މަސައްކަތް ކުރަމުންދާކަމަށެވެ.
