ޒުވާނުންގެ މަރުކަޒުތަކުގެ މަސައްކަތްތައް ސުކޫލުތަކުގެ ދަށަށް ބަދަލުކުރުމުން، ސުކޫލުތަކުގެ އެކަޑަމިކް ފޯކަސް ގެއްލޭނެ: އާތިޔާ
ޒުވާނުންގެ މަރުކަޒުތަކުގެ ހަރަދުތައް ސުކޫލުތަކުގެ ދަށަށް ބަދަލުކޮށްފައިވަނީ މި މަހުގެ 1 ވަނަ ދުވަހުން ފެށިގެން
ޒުވާނުންގެ މަރުކަޒެއް - އެ މަރުކަޒުތަކުގެ މަސައްކަތްތައް ވަނީ ސުކޫލުތަކުގެ ދަށަށް ބަދަލުކޮށްފައި
ޒުވާނުންގެ މަރުކަޒުތަކުގެ ބަޖެޓް ހަރަދުތަކުގެ މަސައްކަތްތައް ސުކޫލުތަކުގެ ދަށަށް ބަދަލުކުރުމުން ސުކޫލްތަކުގެ އެކަޑަމިކް ފޯކަސް ގެއްލިގެންދާނެ ކަމަށް އަމީނިއްޔާ ސުކޫލްގެ ކުރީގެ ޕްރިންސިޕަލް އާތިޔާ ނަސީރު ވިދާޅުވެއްޖެ އެވެ.
މިނިސްޓްރީ އޮފް ޔޫތު އެންޑް ސްޕޯރޓްސް އިން އަތޮޅު ތެރޭގައި ހިންގަމުންދާ ޒުވާނުންގެ މަރުކަޒުތަކުގެ ބަޖެޓްގެ ޚަރަދުތައް އެ މަރުކަޒުތައް ހުންނަ ރަށެއްގެ ސުކޫލްތަކުން ބަލަހައްޓާ ގޮތަށް ހަމަޖައްސައި، އެޑިއުކޭޝަން މިނިސްޓްރީން ވަނީ މިދޔަ މަހުގެ 30 ވަނަ ދުވަހު ސޫލުތަކަށް އެކަން އަންގާފަ އެވެ. އަދި އެ އެންގުމާއި އެއްގޮތަށް މި މަހުގެ 1 ވަނަ ދުވަހުން ފެށިގެން އަމަލު ކުރަމުންގެންދިއުމަށް އެޑިއުކޭޝަނުން ވަނީ އަންގައިފަ އެވެ.
އެޑިއުކޭޝަން މިނިސްޓްރީގެ އެ ނިންމުމަށް ފާޑުވިދާޅުވެ ތައުލީމީ ދާއިރާގައި ގިނަ ދުވަސްތަކެއްވަންދެން ހިދުމަތް ކުރެއްވި އާތިޔާ ކުރެއްވި ޓުވީޓެއްގައި ވިދާޅުވީ ސުކޫލުތަކުގެ ތެރެޔަށް މުނިސިޕަލް ކަންތައްތައް ވެއްދުމަކީ ސުކޫލްތަކުގެ އެކަޑަމިކް ފޯކަސް ގެއްލޭނެ ކަމެއް ކަމަށެވެ. އަދި އެއީ ވަރަށް ގޯސް ޕްރިސިޑެންޓަކަށް ވެދާނެތީވެ ކަންބޮޑުވެވަޑައިގަންނަވާ ކަމަށް އާތިޔާ ވިދާޅުވި އެވެ.
އެޑިއުކޭޝަން މިނިސްޓްރީގެ އެ އެންގުމުގައިވާގޮތުން ޔޫތު މިނިސްޓްރީން ސޫކުލަށް ބަޖެޓް ޖަމާކުރުމުން، އެ ފައިސާ ފަންޑު އެކައުންޓުގައި ބަލަހައްޓާ، ޒުވާނުންގެ މަރުކަޒުން ފޮނުވާ ހިދުމަތާއި ތަކެތީގެ ރިކުއެސްޓްތަކާ އެއްގޮތަށް ދައުލަތުގެ މާލިއްޔަތުގެ ގަވާއިދާ އެއްގޮތަށް ޚަރަދުކޮށް، އެފަދަ ހިދުމަތްތަކާއި ތަކެތި މަރުކަޒަށް ފޯރުކޮށްދިނުމާއި ޒުވާނުންގެ މަރުކަޒުގެ ބަޖެޓަށް ޖަމާކުރާ ފައިސާގެ ރެކޯޑްތައް ވަކިން ބެހެއްޓުމުގެ އިތުރުން މަހުން މަހަށް ހަރަދު ރިޕޯޓްތައް އެ ސުކޫލްތަކުން ތައްޔާރު ކުރަން ޖެހޭނެ އެވެ. އަދި ޒުވާނުންގެ މަރުކަޒު ހުންނަ ރަށެއްގައި ސަރުކާރުގެ އެއް ސުކޫލަށް ވުރެ އިތުރަށް ސުކޫލެއް ހުރި ނަމަ މަރުކަޒުގެ ބަޖެޓް ހިންގުން ހަވާލު ކުރާނީ އެ މިނިސްޓްރީން އަންގާ ސުކޫލަކާ ކަމަށް ވެސް އެޑިއެކޭޝަން މިނިސްޓްރީގެ އެންގުމުގައި ބުނެފައިވެއެވެ.
