މާލެއިން ކޮވިޑް-19 ކޭސްއެއް ފެނިއްޖެ ނަމަ އަމަލުކުރާނެގޮތުގެ އެކްސަސައިޒެއް ހިންގައިފި

ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 އާ ގުޅިގެން، ރާއްޖޭގެ އެއްވެސް ރަށަކުން ހާއްސަކޮށް، ގްރޭޓަރ މާލެ އޭރިއާއިން ކޮވިޑް-19 އަށް ޕޮޒިޓިވް ކޭސްއެއް ފެނިއްޖެނަމަ އަމަލުކުރާނެ ގޮތުގެ އެކްސަސައިޒެއް ބާއްވައިފި އެވެ.

ނޭޝަނަލް އިމަޖެންސީ އޮޕަރޭޝަން ސެންޓަރ (އެންއީއޯސީ) އަންގާރަ ދުވަހުގެ މެންދުރު ބޭއްވި ނޫސްވެރިންގެ ބައްދަލުވުމުގައި ބައިވެރިވެވަޑައިގެން، ޗީފް އޮފް ޑިފެންސް ފޯސް، މޭޖަރ ޖެނެރަލް ޢަބްދުﷲ ޝަމާލް ވިދާޅުވީ، ދައުލަތުގެ ކަމާބެހޭ އިދާރާތަކާއެކު ގާއިމުކޮށްފައިވާ ނޭޝަނަލް އިމަޖެންސީ އޮޕަރޭޝަން ސެންޓަރުން ގްރޭޓަރުން މާލެ އޭރިއާއިން ކޮވިޑް-19 އަށް ޕޮޒިޓިވް ކޭސްއެއް ފެނިއްޖެހާލަތެއްގައި އަމަލު ކުރާނެ ގޮތުގެ އެކްސަސައިޒެއް ބާއްވާފައިވާ ކަމަށާއި މިފަދަ ހާލަތެއް ކުރިމަތި ވެއްޖެނަމަ، އެންއީއޯސީން ކަނޑައަޅާފައިވާ ގޮތުގެ މަތިން އަމަލު ކުރަމުންދާނެ ކަމަށެވެ.

ޝަމާލް ވިދާޅުވީ، ކޮވިޑް-19 އާ ގުޅިގެން ކޮރަންޓީން ފެސިލިޓީތަކާއި އައިސޮލޭޝަންތައް ގާއިމު ކުރެވިފައިވާއިރު، އެތަންތަން މެނޭޖްކުރުމުގައި ވެސް އެންއީއޯސީން ކަނޑައަޅާފައިވާ ގޮތުގެމަތިން ސަލާމަތީ ހިދްމަތްތަކުގައި ހިމެނޭ ސިފައިންނާއި ފުލުހުން ވެސް ހަރަކާތްތެރިވަމުންދާ ކަމަށެވެ.

ޝަމާލް ވިދާޅުވީ ދިވެހި ސިފައިން ތިބީ ތައްޔާރީ ހާލަތުގައި ކަމަށެވެ. އަދި މިކަމުގައި ކޮމާންޑަރ އިން ޗީފް، ރައީސުލް ޖުމްހޫރިއްޔާ އިބްރާހީމް މުހައްމަދު ޞާލިހު އާއި ޑިފެންސް މިނިސްޓަރު މާރިޔާ އަހުމަދު ދީދީ ކަނޑައަޅުއްވާފައިވާ ސިޔާސަތުތައް ތަންފީޒު ކުރުމުގައި ސިފައިންގެ އެހީތެރިކަން މެދުނުކެނޑި ލިބެމުންދާނެ ކަމަށެވެ.

ޝަމާލް ވިދާޅުވީ، އެންއީއޯސީން މިހާރު މިހިންގާ ހަރަކާތަކީ މިހާތަނަށް ރާއްޖޭގައި ހިންގޭ އެންމެބޮޑު އަދި ވަރަށް ރޭވުންތެރިކަމާއެކު ހިންގޭ ހަރަކާތެއް ކަމަށެވެ. އެންއީއޯސީގެ މައިގަނޑު ފޯކަލް ޕޮއިންޓަކީ ނޭޝަނަލް ޑިސާސްޓަރ މެނޭޖްމަންޓް އޮތޯރިޓީއެވެ.

ނޭޝަނަލް އިމަޖެންސީ އޮޕަރޭޝަން ސެންޓަރަކީ ރައީސުލްޖުމްހޫރިއްޔާގެ އޮފީހާއި ހެލްތް މިނިސްޓްރީއާއި ހެލްތް ޕްރޮޓެކްޝަން އެޖެންސީ (އެޗްޕީއޭ) އާއި ނޭޝަނަލް ޑިސާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) ގެ އިތުރުން ކަމާބެހޭ ގިނަ އިދާރާތައް ހިމެނެއެވެ.

ކޮވިޑް-19 އަށް ރާއްޖެއިން މިހާތަނަށް 13 މީހަކު ޕޮޒިޓީވްވެފައިވާއިރު، އެއީ މުޅިންވެސް ބިދޭސީން ނެވެ. އަދި މިކޭސްތައް ފެނިފައިވަނީ ވެސް ރިސޯޓްތަކުންނާއި ސަފާރީންނެވެ.

މިހާތަނަށް ރާއްޖޭގައި މީހުން ދިރިއުޅޭ އެއްވެސް ރަށަކުން މިފަދަ ކޭސްއެއް ފެނިފައެއް ނުވެއެވެ. ނަމަވެސް ކޮންޓެކްޓް ޓްރޭސިންގގެ ދަށުން މީހުންގެ ސާމްޕަލްތައް ނަގައި މޮނީޓަރިންގ ހާލަތަށް ބައެއް ރަށްރަށާއި ތަންތަން ގެނެސްފައި ވެއެވެ.

ރާއްޖެއިން ކޮވިޑް-19 އަށް ޕޮޒިޓިވްވި 13 މީހުންގެ ތެރެއިން 5 މީހަކު މިހާރު ވަނީ ރަނގަޅުވެފައެވެ.