ލަންކާއިން އަންނަން ބޭނުންވާ ދިވެހިންނަށް ފްލައިޓެއް ބާއްވަނީ

ދުނިޔޭގައި ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) އާ ގުޅިގެން ރާއްޖެ ނާދެވިފައި ސްރީލަންކާގައި ތިބި ދިވެހިން ގެނައުމަށްޓަކައި ޗާރޓަޑް ފްލައިޓެއް ބޭއްވުމުގެ މަސައްކަތް ފަށައިފިއެވެ.

ސްރީލަންކަން އެއާލައިންގެ ޖެނެރަލް ސޭލްސް އެޖެންޓްސް ކަމަށްވާ އޭސް އޭވިއޭޝަންގެ މެނޭޖިން ޑިރެކްޓަރު މުހައްމަދު ފިރާގު އަންގާރަ ދުވަހު "ރާއްޖެއެމްވީ"އަށް ވިދާޅުވީ ލަންކާގައި ތިބި ގިނަ ބަޔަކު އަންނަން އެދެމުންދާ ކަމަށެވެ. އެހެން ކަމުން އެފަރާތްތަށް ގެނައުމަށް ކުރަންޖެހޭ ލިޔެކިޔުމާ ގުޅުންހުރި މަސައްކަތްތައް ކުރަމުންދާ ކަމަށް ފިރާގް ވިދާޅުވިއެވެ.

ފިރާގު ވިދާޅުވީ ލަންކާގައި ތިބި ދިވެހިން ރާއްޖެ ގެނައުމަށް ބާއްވާނީ ޗާރޓަޑް ފްލައިޓެއް ކަމަށާއި ކުރިއަށް އޮތް ހަތަރު ދުވަހުގެ ތެރޭގައި އެކަން ހަމަޖެހިގެންދާނެ ކަމަށް އުއްމީދު ކުރައްވާ ކަމަށެވެ.

މީގެއިތުރުން ފިރާގު ވިދާޅުވީ، ރާއްޖެއައުމަށް ބޭނުންވެގެން ގިނައިން ގުޅަމުންދަނީ އެކިއެކި ބޭނުންތަކަށް ލަންކާއަށްގޮސް، ހޮޓާތަކުގައި ތިބި ފަރާތްތަކުން ކަމަށެވެ.

ލަންކާއަކީ ގިނަ އަދަދެއްގެ ބަޔަކު، ލިބޭ ހަފްތާ ބަންދުތަކުގައި ވެސް ގޮސްއުޅޭ ގައުމެކެވެ. އަދި ލަންކާގައި އެކިއެކި ބޭނުންތަކުގައި، 15،000 އަށްވުރެ ގިނަ ދިވެހިން ދިރިއުޅޭ ކަމަށްވެއެވެ.

ދުނިޔޭގައި ފެތުރެމުންދާ ކޮވިޑް-19 ގެ ރޯގާ ސްރީލަންކާގައި ވެސް ވަނީ ފެތުރިފައެވެ. އޭގަ ސަބަބުން ލަންކާގައި މިވަނީ ކާފިއުވެސް އިއުލާން ކޮށްފައެވެ. އަދި ފްލައިޓްތަކުގެ ދަތުރުތައްވެސް މިވަނީ ވަގުތީ ގޮތުން ހުއްޓާލާފައެވެ.

ކޮވިޑް-19 ރޯގާގެ ސަބަބުން ރާއްޖޭގެ ރިސޯޓްތަކަށް އަންނަ ފަތުރުވެރިން ފިޔަވާ އެންމެން 14 ދުވަހުގެ ކަރަންޓީން ފެސިލިޓީއަކަށް ދާންޖެހޭ ގޮތަށް ވަނީ ހަމަޖައްސާފަ އެވެ. ރާއްޖެ އަންނަ ދިވެހިން ކަރަންޓީންގައި ބޭތިއްބުމަށްޓަކައި 10 ރިސޯޓެއްގެ 2288 އެނދު ކަރަންޓީން ފެސިލިޓީގެ ގޮތުގައި ވަނީ ހަމަ ޖައްސާފައެވެ.

ކޮވިޑް-19 އަށް ރާއްޖެއިންވެސް 13 މީހަކު ވަނި ޕޮޒިޓިވް ވެފަ އެވެ. އޭގެ ތެެރެއިން 5 މީހަކު ރަނގަޅުވެފައިވެއެވެ. ދުނިޔޭގެ ގިނަ ގައުމުތަކަކަށް ކޮވިޑް-19 ފެތުރިފައިވާއިރު މިހާތަނަށް 380،000 އަށް ވުރެ ގިނަ މީހުންނަށް މިވައިރަސް ވަނީ ޖެހިފައެވެ.