ކޮވިޑް-19: ކުށްވެރިންގެ މުއްދަތު ޖެހުން ވީޑިއޯ ކޮންފަރެންސް ކޯލް މެދުވެރިކޮށް ކުރިއަށް ގެންދަން ނިންމައިފި
24 މާރިޗު 2020 | އަންގާރަ 06:36ވީޑިއޯ ކޮންފަރެންސް ކޯލް މެދުވެރިކޮށް އަޑުއެހުން ބާއްވާފައިވަނީ މިދިޔަ ހަފްތާގައި
ވީޑިއޯ ކޮންފަރެންސް ކޯލް މެދުވެރިކޮށް އެންމެ ފުރަތަމަ ބޭއްވި އަޑުއެހުން
ކުށްވެރިންގެ މުއްދަތު ޖެހުން ވީޑިއޯ ކޮންފަރެންސް ކޯލް މެދުވެރިކޮށް ކުރިއަށް ގެންދަން ނިންމައިފިއެވެ.
ފުލުހުން ބުނީ މިގޮތަށް ނިންމާފައިވަނީ ކޮވިޑް-19 އިން ރައްކާތެރިވުމަށް އަޅަމުންދާ ފިޔަވަޅުގެ ތެރެއިން ކަަމަށެވެ. އަދި މިއަދުން ފެށިގެން ފުލުހުންގެ ބަންދުގައި ތިބޭ މީހުންގެ މުއްދަތު ޖެހުން ކުރިއަށްދާނީ ކްރިމިނަލް ކޯޓާއި މޯލްޑިވްސް ޕޮލިސް ސަރވިސްއާ ދެމެދު ކުރެވޭ ވީޑިއޯ ކޮންފަރެންސް ކޯލް މެދުވެރިކޮށް ކަމަށެވެ.
ފުލުހުން އިތުރަށް ބުނީ މި އަޑުއެހުންތަކުގައި ޤާނޫނީ ވަކީލުން ދޫނިދޫ ނުވަތަ ކްރިމިނަލް ކޯޓުގެ ވީޑިއޯ ކޮންފަރެންސްގައި ބައިވެރިވުމުގެ އިންތިޒާމުތައް ހަމަޖެހިފައިވާ ކަމަށެވެ.
ޕްރޮސެކިއުޓަރ ޖެނެރަލް (ޕީޖީ) އޮފީހުގެ ގާނޫނީ ވަކީލުން ކްރިމިނަލް ކޯޓަށް ހާޒިރުވުމުގެ ބަދަލުގައި، ވީޑިއޯ މެދުވެރިކޮށް، އަޑު އެހުމެއް ފުރަތަމަ ފަހަރަށް ބާއްވައިފައިވަނީ މިދިޔަ ހަފްތާގައެވެ.
ޝަރީއަތުގެ މަރުހަލާގެ ކުރިން ބާއްވާ އަޑުއެހުންތަކަށް ދައުލަތުން ސީދާ ހާޒިރުވުމުގެ ބަދަލުގައި ވީޑިއޯ ކޮންފަރެންސް ކޯލު މެދުވެރިކޮށް ބާއްވަން ޖިނާއީ އިޖުރާއަތުގެ ގާނޫނު ތަންދެއެވެ.
