ގާސީމްގެ ކުންފުނީގެ ހާލަތު ގޯސް، އެކަމަކު ގާސިމްއަކީ ހާލުގައި ޖެހޭ ވަގުތު އެހީވުމުގައި ނަމޫނާއެއް: ޖޭޕީ
އިޤްތިޞާދީ ގޮތުން ގާސިމްގެ ކުންފުނީގެ ޙާލަތު އިންތިހާއަށް ގޯސް
ޖުމްހޫރީ ޕާޓީގެ ލީޑަރ އަދި މާމިގިލީ ދާއިރާގެ މެމްބަރު ގާސިމް އިބްރާހިމް
ރައްޔިތުންގެ މަޖިލީހުގެ މާމިގިލީ ދާއިރާ މެމްބަރު އަދި މަޝްހޫރު ވިޔަފާރިވެރިޔާ ގާސިމް އިބްރާހިމަކީ ހާލުގައި ޖެހޭ ވަގުތު އެހީވުމުގައި ނަމޫނާއެއްކަމަށް ޖުމްހޫރީ ޕާޓީން ބުނެފިއެވެ.
ދުނިޔޭގައި ހަލުވިކާމާއެކު ފެތުރެމުން ދާ ކޮވިޑް-19 ރާއްޖެއިން ފެނުމާއި ގުޅިގެން، ރާއްޖޭގައި ޓޫރިސްޓު ރިސޯޓު ހިންގާ ވިލާ ހޮޓެލްސް އެންޑް ރިސޯޓްސްގެ ޕެރެޑައިޒް އައިލެންޑް ރިސޯޓު ފިޔަވާ އެހެން ހުރިހާ ތަނެއް ވަގުތީގޮތުން ބަންދުކުރާ ޚަބަރު ފެތުރުމާއިއެކު އަދި ވިލާ ޝިޕިން އެންޑް ޓްރޭޑިން ކޮންޕެނީ ޕްރައިވެޓް ލިމިޓެޑުން ހިންގަމުންދާ ހުރިހާ ރިސޯޓެއްގެ މުއައްޒަފުންގެ މުސާރަ ކުޑަ ކުރަން ނިންމިމުމާއި ގުޅިގެން ގާސިމް އިބްރާހިމް އަށް ވަރަށް ބޮޑަށް ފާޑުކިޔުން އަމާޒުވިއެވެ.
އެގޮތުން ގާސިމް އިބްރާހިމް ލީޑަރުކަން ކުރައްވަމުން ގެންދަވާ ޕާޓީ، ޖުމްހޫރީ ޕާޓީން ނެރުނު ބަޔާނެއްގައި ބުނެފައިވަނީ، މުޅި ދުނިޔެއަށް ހަލުވިކަމާއެކު ފެތުރެމުންދާ ކޮރޯނާ ވައިރަސް (ކޮވިޑް 19) ދުނިޔޭގެ ހުރިހާބައްރަކަށް ފެތުރި، މި ދިވެހިރާއްޖެއަށް ވެސް ފޯރާފައިވާ މި ހިތްދަތި ދަނޑިވަޅުގައިވެސް ބައެއް ފަރާތްތަކުން ދައްކަމުންދާ ޙަޤީގަތާ އިންތިހާޔަށް ދުރު ވާހަކަތަކާ ސިޔާސީ ބޭނުމެއްގައި ވިޔަސް އެއްވެސް ސިފައެއްގައި އެއްވެސް ފަރާތަކުން ޢަމަލުކޮށްގެން ނުވާނެ ފަދަ ދަށުދަރަޖައިގެ ޢަމަލުތައް މަދުން ނަމަވެސް ފެންނަކަމީ ހިތާމަހުރިކަމެއްކަމަށެވެ.
ބަޔާނުގައި ބުނެފައިވަނީ، ޕާޓީގެ ލީޑަރު ޤާސިމް އިބްރާހީމްގެ ނަންފުޅު ކިލަނބު ކުރުމުގެ ބޭނުމުގައި އަދިބަޔަކު ސިޔާސީ މަންފާއެއް ހޯދުމުގެ ބޭނުމުގައި ދައްކާ ޙަޤީގަތާ އެއްވެސް ގުޅުމެއްނެތް ވާހަކަތައް މިޕާޓީން ކުށްވެރި ކުރާކަމަށާއި ތެދުބަހުން ވާހަކަދައްކާ އަދި ޙަޤީގަތް ހާމަކުރުމަށް ފަސްނުޖެހޭ ކޮންމެ ދިވެއްސަކު، ތަކްލީފެއްޖެހިގެން އެހީތެރިކަމަކަށް އެދި ދިއްކޮށްލި ހަމަކޮންމެ އަތެއްގައި، ޤާސިމް އިބްރާހީމް ހަތުރަކަށް މިތުރަކަށް ބެލުމެއްނެތި، ވެވަޑައިގެން އެންމެ ރަނގަޅަކަށް ދީލަތިކަމުގެ އަތަކުން ހިއްޕަވާ ބޭފުޅެއްކަމަށް ގަބޫލުކުރައްވާނެކަމަށެވެ
ޖޭޕީން އިތުރަށް ބުނެފައިވަނީ އިޤްތިޞާދީ ގޮތުން ގާސިމްގެ ކުންފުނީގެ ޙާލަތު އިންތިހާއަށް ގޯސްވެފައިވާ މިދަނޑިވަޅުގައި އިންސާނިއްޔަތަށްޓަކައި ލާމަސީލު މިސާލުތައް ދައްކަވަމުންދާކަމަށެވެ.
ޒާތީ ތަޢައްސުބާއި ސިޔާސީ ވާދަވެރިކަންދޫކޮށް އެންމެން އެކަތިގަނޑަކަށްވެ، އެއްބައިވަންތަކަމާއި އެއްބައެއްވަންތަކަން އިސްކޮށް ދިވެހި އުންމަތަށް ދިމާވެފައިވާ މުސީބާތުން ސަލާމަތްވުމަށް ކުރެވެން އޮތް މަސައްކަތެއް ކުރުމަށް ޖޭޕީން ވަނީ ގޮވާލާފައެވެ.
