ކޮވިޑް-19 އަށް ޝައްކު ކުރެވޭ އަލާމާތްތަކެއް ހުރެގެން ތިން ރިސޯޓަކުން ސާމްޕަލް ނެގި މީހުންގެ ޓެސްޓްތަކުގެ ނަތީޖާ ނެގެޓިވް ކަމަށް އެޗްޕީއޭއިން ބުނެފިއެވެ.

ހޯމަ ދުވަހުގެރޭ އެޗްޕީއޭ އިން ކޮށްފައިވާ ޓްވީޓެއްގައި ވަނީ ކޮވިޑް-19 އަށް ޝައްކުކުރެވޭ އަލާމާތްތައް ހުރެގެން ސޭންޑީޒް ބަތަލާ، އަނަންތަރާ ދިގު އަދި ކްލަބް މެޑް ކަނިފޮނިޅުން ނެގި ސާމްޕަލްތަކުގެ ޓެސްޓުގެ ނަތީޖާ ނެގެޓިވް ވެފައިވާ ކަމަށެވެ. އަދި އެ ރަށްތައް މޮނިޓަރިންގގެ ހާލަތުން ނެގިފައިވާ ކަމަށް އެޗްޕިއޭއިން މައުލޫމާތު ދެއެވެ.

ރާއްޖެ އިން މިހާތަނަށް ކޮވިޑް-19 އަށް ޕޮޒިޓިވް ވެފައިވަނީ 13 މީހެކެވެ. އަދި މީގެ ތެރެއިން ފަސް މީހަކު ވަނީ ވައިރަސް އަށް ނެގެޓީވް ވެފައެވެ.

އެޗްޕީއޭއިން އިއުލާން ކޮށްފައިވާގޮތުން ކަރަންޓީން ފެސިލިޓީސްގައި މިވަގުތު ތިބީ 496 މީހުންނެވެ. އައިސޮލޭޝަން ފެސިލިޓީސްގައި ތިބީ 22 މީހުންނެވެ.