ހުޅުމާލޭގައި އުޅޭ ފަރާތްތައް، އޮންލައިންކޮށް، ނުވަތަ ގުޅައިގެން ވިޔަފާރި ކުރުމަށް އެދެފި
ފިހާރަތަކުގެ ނަމާއި ގުޅޭނެ ނަމްބަރު ހިމެނޭ ވެބްސައިޓް ލިންކެއް ވަނީ ތައާރަފް ކޮށްފަ
ހުޅުމާލެ
ހުޅުމާލޭގައި އުޅޭ ފަރާތްތަކުން ފިހާރަތަކަށް ދިއުމުގެ ބަދަލުގައި، އޮންލައިންކޮށް ނުވަތަ ގުޅައިގެން ވިޔަފާރި ކުރަން ހައުސިންގ ޑިވެލޮޕްމަންޓް ކޯޕަރޭޝަނުން (އެޗްޑީސީ) އެދިއްޖެއެވެ.
ހުޅުމާލެ ބަލަހައްޓަމުންދާ އެޗްޑީސީން ނެރުނު ނޫސްބަޔާނެއްގައި ބުނީ ކޮވިޑް-19 އިން ރައްކާތެރިވުމުގެ ގޮތުން ކަމާބެހޭ އިދާރާތަކުން ގޭގައި ތިއްބެވުމަށް އިލްތިމާސްކޮށްފައިވާތީ އެ ކޯޕަރޭޝަނުގެ އެދުމަކީ ހުޅުމާލޭގައި ދިރިއުޅެމުން އަންނަ ފަރާތްތަކުން އޮންލައިންކޮށް ނުވަތަ ފޯނުން ގުޅައިގެން ތަކެތި ގަތުން ކަމަށެވެ.
އެގޮތުން އެޗްޑީސީން ވަނީ އެކަމަށް ހާއްސަ ވެބްސައިޓެއް ވެސް ތައާރަފުކޮށްފަ އެވެ. އެ ވެބްސައިޓުން ހުޅުމާލޭގެ ޗާޓާއެކު ފިހާރަތައް ފާހަގަކޮށް، ފިހާރަތަކުގެ ނަމާއި ގުޅޭނެ ފޯނު ނަންބަރު ފެންނަން ހުންނާނެ ކަމަށް އެޗްޑީސީން ބުނެއެވެ.
ވެބްސައިޓް ލިންކް:https://my.hdc.com.mv/gmap/index.html
އެޗްޑީސީން ބުނީ، ހުޅުމާލޭގައި ގާއިމުކޮށްފައިވާ ފިހާރަތަކުން ހުޅުމާލޭގެ ރައްޔިތުންނަށް ޑެލިވަރީގެ ހިދުމަތް ފޯރުކޮށް ދިނުުމަށް އެދޭ ކަމަށާއި އެ ވެބްސައިޓުން އެފަރާތެއްގެ ފިހާރަ، ރެސްޓޯރެންޓް ނުވަތަ ކެފޭގެ ނަން ނުފެންނަ ނަމަ އެޗްޑީސީއަށް ހިއްސާކޮށްދެއްވުން އެދޭ ކަމަށެވެ.
މައުލޫމާތު ހިއްސާ ކުރެއްވުމަށް މި ލިންކް ބޭނުންކުރައްވާ:http://tiny.cc/gfvolz
އެޗްޑީސީން ބުނީ ކޮވިޑް-19 އިން ރައްކާތެރިވުމުގެ ގޮތުންނާއި، އެބަލި ފެތުރުން ކޮންޓްރޯލު ކުރުމަށް ސަރުކާރާ ގުޅިގެން އެ ކޯޕަރޭޝަނުން ގިނަގުނަ މަސައްކަތްތަކެއް ކުރަމުންދާ ކަމަށެވެ.
އެގޮތުން، ހުޅުމާލޭގައި ގާއިމުކޮށްފައިވާ ބަސް ހުއްޓިތަކާއި، އިޖްތިމާއީ ބޯހިޔާވަހިކަމުގެ ދަށުން ދޫކޮށްފައިވާ ފުލެޓުތައް ހިމެނޭ އެއްމެދު އިމާރާތުގެ އާއްމު ސަރަހައްދުތަކާއި، ސިޑީގެ ރެއިލިން ފަދަ ތަންތަން ގަވައިދުން ޑިސްއިންފެކްޓް ކުރަމުންދާ ކަމަށް ވެސް އެޗްޑީސީން ބުނެއެވެ. އަދި ހާއްސަ ސަމާލުކަމެއްދީގެން ހުޅުމާލޭ ބީޗް ސަރަހައްދު ސާފުކުރުމުގެ މަސައްކަތް ކުރަމުންދާ ކަމަށްވެސް އެޗްޑީސީން ބުނެއެވެ.
