ކޮވިޑް-19: ޗައިނާގެ އޮފިޝަލުން މައުލޫމާތު ހިއްސާ ކުރި ވީޑިއޯ ކޮންފަރެންސްގައި ރާއްޖެއިން ބައިވެރިވެއްޖެ
ކޮންފަރެންސްގައި ޔޫރޭޝިއާ އަދި ދެކުނު އޭޝިއާގެ ގައުމުތަކުން 200 އަށް ވުރެ ގިނަ އިސް އޮފިޝަލުން ބައިވެރިވި
ީވީޑިއޯ ކޮންފެރެސްގައި ރާއްޖެއިން ބައިވެރިވަނީ
ކޮވިޑް-19 ފެތުރުން ހުއްޓުވުމާ ބެހޭގޮތުން ޗައިނާގެ ސިއްހީ ދާއިރާގެ އޮފިޝަލުންގެ ތަޖުރިބާއާއި މައުލޫމާތު ހިއްސާ ކުރުމަށް ބޭއްވި ވީޑިއޯ ކޮންފަރެންސެއްގައި ރާއްޖެއިން ބައިވެރިވެއްޖެ އެވެ.
މިކޮންފެރެންސް ބާއްވާފައިވަނީ ހުކުރު ދުވަހު އެވެ. ރާއްޖޭގައި ހުންނަ ޗައިނާގެ އެމްބަސީން މިކޮންފެރެންސާ ގުޅޭގޮތުން ބުނެފައިވަނީ މި ވީޑިއޯ ކޮންފަރެންސްގައި ޗައިނާގެ ސެންޓަރ ފޮރ ޑިޒީސް ކޮންޓްރޯލްގެ ޑިރެކްޓަރ ޖެނެރަލް ގާއޯ ފޫ އާއި، އެ ސެންޓަރުގެ ޗީފް އެޕިޑީމިއޮލޮޖިސްޓު ޕްރޮފެސަރ ވޫ ޒުންޔޫ، ޕެކިން ޔުނިވަރސިޓީގެ ޑިޕާޓްމެންޓް އޮފް ރެސްޕިރޭޓަރީ މެޑިސިންގެ ޑިރެކްޓަރު ޕްރޮފެސަރ ވަން ގްއަންފާ އަދި އެ ގައުމުގެ ސިއްހީ ދާއިރާގެ އެހެނިހެން އިސް އޮފިޝަލުން މައުލޫމާތު ދީފައިވެ އެވެ.
މި ކޮންފަރެންސްގައި ޔޫރޭޝިއާ އަދި ދެކުނު އޭޝިއާގެ ގައުމުތަކުން 200 އަށް ވުރެ ގިނަ އިސް އޮފިޝަލުން ބައިވެރިވި ކަމަށް އެމްބަސީން ބުނެއެވެ. ރާއްޖޭގެ ފަރާތުން ހެލްތު މިނިސްޓްރީގެ ސްޓޭޓް މިނިސްޓަރު ޑރ. ޝާހު މާހިރުގެ އިތުރުން އެޗްޕީއޭގެ ޑޮކްޓަރުން މި ކޮންފެރެންސްގައި ބައިވެރިވެވަޑައިގެންނެވިއެވެ.
މި ކޮންފަރެންސްގައި ޗައިނާއިން ވައިރަހާ ދެކޮޅަށް ކުރި މަސައްކަތާ ގުޅޭގޮތުން މައުލޫމާތު ދިނުމުގެ އިތުރުން އެހެން ގައުމުތަކުގެ އޮފިޝަލުން ކުރި ސުވާލުތަކަށް ޗައިނާގެ އޮފިޝަލުން ވަނީ ޖަވާބު ދެއްވާފައެވެ.
ހަތަރު ގަޑިއިރަށް ކުރިޔަށްދިޔަ ކޮންފެރެންސްގައި އެކިގައުމުތަކުގެ އޮފިޝަލުން ކޮށްފައިވާ 80 އަށްވުރެ ގިނަ ސުވާލުތަަކަށް ޗައިނާގެ އޮފިޝަލުން ޖަވާބު ދީފައިވެއެވެ. ކޮށްފައިވާ ސުވާލުތަކުގެ ތެރޭގައި ހިމެނެނީ ޝައްކު ކުރެވޭ މީހުން ދެނެގަތުމާއި، މީހުން އެކަހެރިކުރުމާއި ކަރަންޓީނު ކުރުމާއި، ބަލި ޖެހިފައިވާ މީހުންނަށް ފަރުވާ ދިނުމާ ގުޅޭ ސުވާލުތައްކަމަށް ޗައިނާގެ އެމްބަސީން ބުނެއެވެ.
ކޮވިޑް-19 އެންމެ ފުރަތަމަ ފެނުނީ ޗައިނާގެ ވޫހާން ސިޓީންނެވެ. ވައިރަސް އިން ރައްކާތެރިވުމަށް ޗައިނާއިން އެޅި ވަރުގަދަ ފިޔަވަޅުތަކާއެކު މިއަދު ޗައިނާއިން ވަނީ ވަރަށް ބޮޑަށް މިވައިރަސް ކޮންޓްރޯލްކޮށްފަ އެވެ. އެގޮތުން ފާއިތުވި 24 ގަޑިއިރު މުޅި ޗައިނާއިން އަލަށް ރިޕޯޓު ކޮށްފައިވަނީ 41 ކޭސް އެވެ.
މިވަގުތު ވައިރަސް އެންމެ ބޮޑަށް ފެތުރެމުން ދަނީ އިޓަލީ، ސްޕެއިން އަދި އެމެރިކާގައެވެ. އެ ގައުމުތަކަށްވެސް ޗައިނާއިން ދަނީ ލަފާ ދެމުންނެވެ. އަދި އިޓަލީގައި ޗައިނާގެ ޓީމުތައް ދަނީ ހަރަކާތްތެރިވަމުންނެވެ.
