ރަޝިއާގައި ތިބި ދިވެހި ކިޔަވާކުދިންގެ ތެރެއިން ކޮވިޑް-19 އަށް ޝައްކުކުރެވޭ އަލާމަތްތައް ފެނިގެން ޓެސްޓުކުރި ދެކުއްޖެއްގެ ނަތީޖާ ނެގެޓިވް ކަމަށް ސަރުކާރުން ބުނެފި އެވެ.

އެންމެފަހުގެ މަޢުލޫމާތު ހިއްސާކުރުމަށް ހުކުރު ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ކޮވިޑް-19 ޓާސްކް ފޯސްގެ ތަރުޖަމާނު މަބްރޫކް އަޒީޒް ވިދާޅުވީ ރަޝީޔާގައި މިވަގުތު ތައުލީމު ހާސިލްކުރަމުންދާ ރާއްޖޭގެ ކުދިންގެ ތެރެއިން ވައިރަސްއަށް ޝައްކުކުރެވޭ އަލާމަތްތައް ފެނިގެން ޓެސްޓުކުރި ތިން ކުދިންގެ ތެރެއިން ދެކުއްޖެއްގެ ނަތީޖާ ނެގެޓިވް ކަމަށެވެ. އަނެއް ކުއްޖާގެ ނަތީޖާ ނުލިބޭ ކަމަށް މަބްރޫކް ވިދާޅުވިއެވެ.

މީގެއިތުރުން މަބްރޫކް ވިދާޅުވީ އެކުދިންގެ ކަރަންޓީނުގެ މުއްދަތު 10 ދުވަހަށް އިތުރުކުރެވިފައިވާ ކަމަށާއި، އެކުދިންގެ ހާލަތު ވަރަށް ގާތުން ބަލަމުންދާ ކަމަށެވެ.

މުޅި ދުނިޔެއަށް ކޮވިޑް-19 ފެތުރެމުންދާއިރު، މިހާތަނަށް ރަޝިޔާގައި 253 މީހަކު ވަނީ މިވައިރަސްއަށް ޕޮޒިޓިވްވެފައެވެ. އަދި އެކަކު ބަލީގައި މަރުވެފައިވެއެވެ.

ރަޝިޔާގެ އިތުރުން ރާއްޖޭގެ ބޭރުގެ އެހެން ގައުމުތަކުގައި ތައުލީމް ހާސިލްކުރާ ދިވެހި ދަރިވަރުންނާއި ދިރިއުޅޭ އާއިލާތަކުން އެގައުމެއްގެ ސަރުކާރުން ނެރޭ އިރުޝާދުތަކާ އެއްގޮތަށް އަމަލުކުރުމަށާއި، ފޮރިން މިނިސްޓްރީގައާއި އެންމެ ކައިރީގައި ހުންނަ ރާއްޖޭގެ ޑިޕްލޮމެޓިކް މިޝަނެއްގައި ރެޖިސްޓަރ ކުރުމަށް ފޮރިން މިނިސްޓްރީން ވަނީ އިލްތިމާސްކޮށްފައެވެ. އަދި މިދަނޑިވަޅުގައި ކޮންމެހެން ކުރަންޖެހޭ ދަތުރުތައް ފިޔަވައި، އެހެން ދަތުރުތައް ނުކުރުމަށަށް ވެސް ފޮރިން މިނިސްޓްރީން އިލްތިމާސްކުރެއެވެ.