މަތިއުތުރު ރަށެއްގައި ކުޑަ ކުއްޖަކަށް ޖިންސީ ގޯނާ ކުރި މައްސަލާގައި 20 އަހަރުގެ ޒުވާނެއް ހައްޔަރުކޮށްފި
20 މާރިޗު 2020 | ހުކުރު 17:59ޖިންސީ ގޯނާ ލިބުނީ 15 އަހަރުގެ ފިރިހެން ކުއްޖަކަށް
ކުޑަކުދިންނާ ގުޅުން ހުރި މައްސަލަތައް ފުލުހުން ސީރިއެސް މައްސަލައެއްގެ ގޮތުގައި ތަހުގީގު ކުރާނެ
ހއ، ހދ، އަދި ށ އަތޮޅު ހިމެނޭ ރަށެއްގައި ކުޑަ ފިރިހެން ކުއްޖަކަށް ޖިންސީ ގޯނާކުރި މައްސަލާގައި ތުހުމަތުކުރެވޭ މީހާ ހައްޔަރުކޮށްފިއެވެ.
ފުލުހުން ބުނީ 15 އަހަރުގެ ފިރިހެން ކުއްޖަކަށް ޖިންސީ ގޯނާ ކުރި މައްސަލައެއް މިމަހުގެ 18 ވަނަ ދުވަހު 17:04 އެހައިކަންހާއިރު ހުށަހަޅާފައިވާ ކަމަށެވެ.
ފުލުހުން ބުނީ މިމައްސަލާ ގުޅިގެން ކޯޓުއަމުރެއްގެ ދަށުން 20 އަހަރުގެ މީހަކު ހުކުރު ދުވަހު ހައްޔަރުކޮށްފައިވާ ކަމަށެވެ. އަދި އެއީ ދިވެހި ފިރިހެނެއްކަމަށް ފުލުހުން މައުލޫމާތުދެއެވެ.
މީގެ އިތުރުން ފުލުހުން ބުނީ ކުއްޖާގެ އައިޑެންޓިޓީ ރައްކާތެރި ކުރުމުގެ ގޮތުން ކުއްޖާގެ އަތޮޅާއި ރަށް ހާމަ ނުކުރާނެ ކަމަށާއި، ކުޑަކުދިންނާ ގުޅުން ހުރި މައްސަލަތައް ސީރިއެސް މައްސަލައެއްގެ ބަލަމުންދާ ކަމަށެވެ.
މިމައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
