ކޮވިޑް-19: ކުޅުދުއްފުށީގައި ދިރިއުޅޭ ބިދޭސީންގެ ދަފްތަރު އަދާހަމަކުރުމުގެ މަސައްކަތް ފަށައިފި

ކޮވިޑް-19 އާއި ގުޅިގެން ކުޅުދުއްފުށި ސިޓީގައި މަސައްކަތް ކުރާ އަދި ދިރިއުޅޭ ބިދޭސީންގެ ދަފްތަރު އަދާހަމަކުރުމުގެ މަސައްކަތް ފަށައިފިއެވެ.

ކުޅުދުއްފުށި ސިޓީ ކައުންސިލުން ބުނީ ކުޅުދުއްފުށީގައި މަސައްކަތް ކުރާ އަދި ދިރިއުޅޭ ބިދޭސީންގެ ދަފްތަރު އެއިދާރާއިން ބަލަހައްޓަމުންދާ ކަމަށެވެ. ނަމަވެސް މި ދަފްތަރުގައި ބިދޭސީ މުވައްޒަފުން ރަޖިސްޓްރީނުކޮށް ބައެއް ފަރާތްތަކުން ގެންގުޅޭކަން ފާހަގަކުރެވިފައިވާ ކަމަށެވެ.

Advertisement

ކައުންސިލުން ބުނީ ކޮވިޑް-19 ގުޅިގެން ރަށުގައި ދިރިއުޅޭ ބިދޭސީންނާއި އެމީހުން ދިރިއުޅޭ ތަންތަނާއި އަދި އެފަރާތްތަކާއި ހަވާލުވެ ހުރި ފަރާތްތަކުގެ ސައްޙަ މައުލޫމާތު ކަމާގުޅުންހުރި އިދާރާތަކަށް އެނގުން ވަރަށް މުހިންމު ކަމުގައި ކުޅުދުއްފުށީގައި ކޮވިޑް-19 ރޯގާއާއި ގުޅިގެން އުފަދާފައިވާ ޓާސްކް ފޯސްއިން ވަނީ އިރުޝާދު ދީފައިވާ ކަމަށެވެ. މިފަދަ މައުލޫމާތުތަކަކީ ބިދޭސީ މަސައްކަތްތެރިއެއްގެ ފަރާތުން ބަލީގެ އަލާމާތެއް ފެނިއްޖެނަމަ އެފަރާތް ކަރަންޓީނު ކުރުމަށާއި އެހީ ފޯރުކޮށްދިނުމަށް އަދި ކޮންޓެކްޓް ޓްރޭސިންގ ހެދުމަށް މުހިންމު މައުލޫމާތު ތަކެއް ކަމަށް ވާތީ ދަފްތަރު އަދާހަމަކުރުމުގެ މަސައްކަތް ކައުންސިލްއިން ހާއްސަ ސަމާލުކަމެއްދީގެން ކުރަމުންދާ ކަމަށް ކައުންސިލުން ބުނެއެވެ.

މީގެ އިތުރުން ކައުންސިލުން ބުނީ މުޖުތަމައުގެ އެންމެންގެ ރަށްކަލަށް ބިދޭސީ މަސައްކަތްތެރިން ގެންގުޅޭ ފަރާތްތަކުން ބިދޭސީންގެ ދަފްތަރު އަދާހަމަކުރުމަށް ކައުންސިލްއިން ފަށާފައިވާ މަސައްކަތަށް އެއްބާރުލުން ދިނުމަށް އެދޭ ކަމަށެވެ.

ކައުންސިލުން ބުނީ ބިދޭސީން ގެންގުޅޭ ފަރާތްތަކުން ވީ އެންމެ އަވަހަކަށް އެފަރާތްތަކުގެ މައުލޫމާތު ކައުންސިލްއާއި ހިއްސާކޮށް ދަފްތަރު ކުރުމުގެ މަސައްކަތް ކުރިއަށް ގެންދިއުމަށްދޭ ކަމަށެވެ. އަދި ދަފްތަރު ކުރުމަށްޓަކައި މިކައުންސިލަށް ބޭނުންވާ ބިދޭސީންނާއި ގުޅޭ މައުލޫމާތު އަދި ހަވާލުވެހުރި ފަރާތުގެ މައުލޫމާތު ބަޔާންކުރާ ފޯމާއި ދަފްތަރު ކުރައްވަން ޢަމަލު ކުރައްވަންވީ ގޮތުގެ އިރުޝާދު މި ކައުންސިލްގެ ވެބްލިންކުން ލިބޭނެ ކަމަށެވެ.

ކައުންސިލުން ބުނީ 23 މާރިޗު 2020ވާ ހޯމަ ދުވަހުގެ ނިޔަލަށް ދަފްތަރުކޮށް ނިންމުމަށްއެދޭ ކަމަށާއި، މިގޮތަށް އަމަލު ނުކުރާ ފަރާތްތަކާއިމެދު ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ގާނޫނުގެ 143 މާއްދާގެ ދަށުން ފިޔަވަޅު އަޅަމުން ގެންދާނެ ކަމަށެވެ.

މިކަމާއި ގުޅޭގޮތުން އިތުރު މައުލޫމާތު ސާފުކުރުމަށް ބިދޭސީންގެ ދަފްތަރު އަދާހަމަކުރުމާއި ގުޅޭ ހޮޓްލައިންއަށް 9531312 އަށް ގުޅައި މައުލޫމާތު ސާފުކުރުމަށް ވެސް ކައުންސިލުން ވަނީ އެދިފައެވެ.

ރާއްޖޭގައި މަސައްކަތް ކުރާ ބިދޭސީންގެ ރަޖިސްޓްރީއެއް ސަރުކާރުން ބެލެހެއްޓުމަށް، ރާއްޖޭގައި މީހުން ދިރިއުޅޭ ކޮންމެ ރަށެއްގައި އެ ރަށެއްގެ ރަށު ކައުންސިލް ނުވަތަ ސިޓީ ކައުންސިލްގައި "ބިދޭސީން ރަޖިސްޓްރީ ކުރާ ދަފްތަރެއް" އޮންނަންވާނެ ކަމުގައި ވަޒީފާ އަދާކުރުމަށް ދިވެހިރާއްޖެއަށް ބިދޭސީން ގެނައުމުގެ ގަވާއިދުގެ 24ވަނަ މާއްދާގައި ބަޔާންކޮށްފައިވެއެވެ.