އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއާ ދެކޮޅަށް އެ ގައުމުގައި މުޒާހަރާކޮށްފިއެވެ.

ނަތަންޔާހޫ އާ ދެކޮޅަށް މުޒާހަރާކޮށްފައިވަނީ، ކޮވިޑް-19 އިން ރައްކާތެރިވުމުގެ ގޮތުން ގިނަ މީހުން އެއްވެ އުޅުން އިޒްރޭލުގައި ވެސް މަނާކޮށްފައިވާ ދަނޑިވަޅެއްގައެވެ. މުޒާހަރާކުރި ފަރާތްތަކުން ވަނީ މި ބަލިމަޑިކަމުގެ ނާޖައިޒު ފައިދާ ނަގައިގެން، ބާރުތައް މުށު ތެރެއަށް ލުމަށް ނަތަންޔާހޫ މަސައްކަތްކުރައްވާ ކަމަށް ތުހުމަތުކޮށްފައެވެ.

ކޮވިޑް-19 ގެ ބަލިމަޑުކަމުން ރައްކާތެރިވުމަށް ކަމަށް ވިދާޅުވެ، ނަތަންޔާހޫ ވަނީ އިޒްރޭލުގެ ކޯޓުތައް ބަންދުކޮށް، ގާނޫނު ހަދާ މަޖިލިސް ހަފުތާއެއްގެ މުއްދަތަށް ބަންދުކޮށްފައެވެ. އޭގެ އިތުރުން އާންމުންގެ ފޯން ކޯލްތައް އަޑުއެހުމުގެ ގޮތުން ފޯން ސަރވައިލެންސް ޓެކްނޮލޮޖީ ބޭނުންކުރަން ވަނީ ފަށާފައެވެ.

މުޒާހަރާކުރި ފަރާތްތަކުން ވަނީ، މި ފިޔަވަޅުތަކަކީ ނަތަންޔާހޫގެ މައްޗަށް ކުރެވޭ ކޮރަޕްޝަނުގެ ތުހުމަތުގެ އަޑުއެހުން ފަށަން ގާތެވެފައިވުމާއި ގުޅިގެން، ތުހުމަތުތަކުން ރެކިވަޑައިގަތުމުގެ ގޮތުން ކުރެއްވި ކަމެއް ކަމަށް ތުހުމަތުކޮށް އެކަމާ ދެކޮޅަށް އަޑުއުފުލާފައެވެ. މިހާރު އަޑުއެހުންތައް ބޭއްވޭނެ ކަމަށް ބެލެވެނީ، މި އަހަރުގެ މޭ މަހުގެ ތެރޭގައެވެ.

މިހާތަނަށް އިޒްރޭލުން ކޮވިޑް-19 އަށް ޕޮޒިޓިވްވެފައިވާ މީހުންގެ އަދަދު ވަނީ 600 އަށް ވުރެ އިތުރުވެފައެވެ. އަދި މިހާރު އަޅުއްވަމުން ގެންދަވާ ފިޔަވަޅުތަކަކީ ކޮންމެހެން އަޅަންޖެހިގެން އެޅުއްވި ފިޔަވަޅުތަކެއް ކަމަށް ނަތަންޔާހޫ ވިދާޅުވިއެވެ.

ނަމަވެސް އިދިކޮޅު ފަރާތްތަކުން ބުނަނީ، ނަތަންޔާހޫ މި ވަގުތު މަސައްކަތްކުރައްވަމުން ގެންދަވަނީ ދަނޑިވަޅުގެ ފައިދާ ނަގާ ވެރިކަމުގައި އިތުރު ދައުރެއް ހުންނެވުމަށް ކަމަށެވެ. ނަތަންޔާހޫ މި ވަގުތު ބޮޑުވަޒީރުގެ މަގާމުގައި ހުންނެވީ ވަގުތީ ގޮތުންނެވެ.

ވަގުތީ ގޮތުން ބޮޑުވަޒީރުގެ މަގާމުގައި ނަތަންޔާހޫ ހުންނެވީ، އެންމެ ފަހުން ބޭއްވި ތިން އިންތިހާބުން ވެސް އެއްވެސް ޕާޓީއަކަށް އަގުލަބިއްޔަތު ލިބިފައި ނުވާތީއެވެ. އަހަރެއްހާ ދުވަހުގެ ތެރޭގައި އިޒްރޭލުގައި ވަނީ ތިން އިންތިހާބު ބާއްވާފައެވެ.

އިޒްރޭލުގެ ގާނޫނު ހަދާ މަޖިލީހުގެ ބޭރުގައި މުޒާހަރާކުރި ފަރާތްތަކުން ވަނީ "ކްރައިމް މިނިސްޓަރ" ޖަހާފައި ހުރި ބެނަރތަކެއް ހިފައިގެން، ހުދުމުހުތާރު ވެރިކަމަކަށް ނޫނެކޭ ބުނާކަމަށް ގޮވާ އަޑުއުފުލާފައެވެ. އެއްވެ އުޅުމަށް މަނާކޮށްފައި އޮތް އޮތުމާ ހިލާފުވެފައިވާ ކަމަށް ބުނެ، މުޒާހަރާކުރި ތިން މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.