މާލެ ތެރެއަށް ބޭހެއް ޖަހަން ބަންދުކުރަންއުޅޭ ކަމަށްބުނެ ފަތުރަމުންދަނީ ދޮގު ވާހަކަތަކެއް: މަބްރޫކް
19 މާރިޗު 2020 | ބުރާސްފަތި 21:11މާލޭގެ ތެރޭގައި ދުއްވާ މީހުން ބަންދުކުރަމުންދާނެ ވާހަކަ ވެސް ދޮގުކުރި
ޓާސްކް ފޯހުގެ ތަރުޖަމާނު މަބްރޫކް އަޒީޒް
މާލެ ތެރެއަށް ބޭހެއް ޖަހަން އެންމެން ގޭގައި މަޑުކުރުވަން އުޅޭކަމަށްބުނެ ފަތުރަމުންދަނީ ޙަޤީޤަތާއި ޚިލާފު ދޮގު ވާހަކަތަކެއް ކަމަށް ކޮވިޑް-19 ގެ ޓާސްކް ފޯހުގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.
ކޮވިޑް-19ގެ އެންމެފަހުގެ މަޢުލޫމާތު ހިއްސާކުރުމަށް ބުރާސްފަތި ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ މާލެ ތެރެއަށް ބޭހެއް ޖަހަން މިރޭ ބަންދު ކުރާ ކަމަށާއި، މިކަމާއި ގުޅިގެން އެންމެން ގޭގައި މަޑުކުރުމަށް ސޯޝަލް މީޑިއާގައި ދެކެވޭ ވާހަކައަކީ ދޮގެއް ކަމަށެވެ. މަބްރޫކް ވިދާޅުވީ އެއީ ސްރީލަންކާގައި މިވަގުތު ދެކެވޭ ވާހަކައެއް ކަމަށާއި، އެއީ އެއްވެސް ގޮތަކައް ރާއްޖެއާއި ގުޅުންހުރި ވާހަކައެއް ނޫންކަމަށެވެ.
މީގެ އިތުރުން މަބްރޫކް ވިދާޅުވީ ފުލުހުން ރޯޑް ބްލޮކް ޖަހައިގެން މާލޭގެ ތެރޭގައި ދުއްވާ މީހުން ބަންދުކުރަމުންދާނެ ކަމަށް ބުނެ ފަތުރަމުންދަނީވެސް ދޮގު ވާހަކައެއްކަމަށެވެ. އެއީ މެލޭޝިޔާ ފުލުހުން ދައްކާފައިވާ ވާހަކައެއް ކަމަށާއި، ރާއްޖެއާ ގުޅުން ހުރި ވާހަކައެއް ނޫން ކަމަށެވެ.
މިދެވާހަކަތައް ދޮގުކުރައްވައި މަބްރޫކް ވިދާޅުވީ ރާއްޖެއާ ގުޅުން ނެތް ނަމަވެސް މިދަނޑިވަޅުގައި މީހުން އެއްވެ އުޅޭތަންތަނަށް ނުދިއުމަށާއި، ގޭގައި މަޑުކުރުމަށް އެދޭ ކަމަށެވެ. ކޮވިޑް-19 އިން ރައްކާތެރިވުމަށް އަޅަމުންދާ ފިޔަވަޅުތަކުގެ ތެރެއިން އެއީ ވަރަށް މުހިންމު ކަމެއްކަމަށް މަބްރޫކް ވިދާޅުވިއެވެ.
