ކޮވިޑް-19: ލޮކްޑައުން މުއްދަތުގައި ވިސާ ހަމަވެފައިވާ ދިވެހިންނަށް މެލޭޝިޔާއިން ފުރައިގެން ދެވޭނެ
މުއްދަތު ހަމަނުވާ ޕާސްޕޯޓެއް އޮތްނަމަ މެލޭޝިޔާއިން ފުރޭނެ
މެލޭޝިއާ
ކޮވިޑް-19 އާއި ގުޅިގެން މެލޭޝިއާ "ލޮކްޑައުން" ކޮށްފައިވާއިރު، އެ މުއްދަތުގައި ވިސާ ހަމަވެފައިވާ ދިވެހިންނަށް މެލޭޝިޔާއިން ފުރައިގެން ދެވޭނެ ކަމަށް މެލޭޝިޔާގައި ހުންނަ ދިވެހި ރާއްޖޭގެ ހައިކޮމިޝަނުން ބުނެފިއެވެ.
މެލޭޝިޔާގައި ހުންނަ ދިވެހި ރާއްޖޭގެ ހައިކޮމިޝަނުން ނެރުނު ބަޔާނުގައި ވަނީ މެލޭޝިޔާ ސަރުކާރުން އިޢުލާންކޮށްފައިވާ "ލޮކްޑައުން" މުއްދަތުގެ ތެރޭގައި، އެޤައުމުގައި ދިރިއުޅެމުންދާ ދިވެހިންނަަށް މުއްދަތު ހަމަނުވާ ޕާސްޕޯޓެއް އޮތްނަމަ މެލޭޝިޔާއިން ފުރޭނެކަމަށެވެ.
އަދި މިވަގުތު މެލޭޝިޔާގައި ތިބި ދިވެހި ރައްޔިތުންގެ ސަމާލުކަމަށް މެލޭޝިޔާގައި ހަލުވިކަމާއެކު ފެތުރެމުންދާ ކޯވިޑް-19 ވައިރަސް އާގުޅިގެން މެލޭޝިޔާގެ ސަރުކާރުން އަޅާފައިވާ ފިޔަވަޅުތަކާ ގުޅިގެން ހައި ކޮމިޝަނުން ބުނެފައިވަނީ މި މުއްދަތުގެ ތެރޭގައި ވިސާ ހަމަވާ ފަރާތްތަކަށް އިތުރު ސްޕެޝަލް ޕާސް" އަކާނުލާ، މުއްދަތުހަމަނުވާ ޕާސްޕޯޓެއް އޮތްނަމަ މެލޭޝިޔާއިން ފުރައިގެން ދެވޭނެކަން މެލޭޝިޔާގެ އިމިގްރޭޝަން ޑިޕާޓްމަންޓުން އަންގާފައިވާކަމަށެވެ.
އަދި ފުރައިގެން ދިއުމުގައި ދިމާވެދާނެ މައްސަލަތައް ހައްލުކޮށްދިނުމަށް އެހީތެރިކަން ފޯރުކޮށްދިނުމަށްޓަކައި ހައިކޮމިޝަންގެ އީމެއިލް އަށް ޕާސްޕޯޓްގެ ޑޭޓާ ޕޭޖާއި މުއްދަތުހަމަވެފައިވާ ވިސާޕޭޖުގެ ފޮޓޯއެއް ފޮނުވައިދެއްވުމަށް ވެސް ވަނީ އެދިފައެވެ.
