އިނގިރޭސިވިލާތުގައި ކޮވިޑް-19 ފެތުރެމުންދާތީ އެކަން ކޮންޓްރޯލް ކުރުމުގެ ގޮތުން ސްކޫލްތައް ބަންދުކުރާނެކަމަށް އެގައުމުގެ ސަރުކާރުން ބުނެފި އެވެ.
ކޮވިޑް-19 ހަލުވިކަމާއެކު އިނގިރޭސިވިލާތުގައި ފެތުރެމުންދާތީ އެގައުމުގެ މީހުން އަންނަނީ ސުޕަރމާކެޓްތަކުން ގިނަ އަދަދެއްގެ އެއްޗެހި ގަންނަމުންނެވެ. އެއާއެކު ޕައުންޑުގެ ވެލިޔު ވަނީ ފާއިތުވި ތިރީސް އަހަރު ދަށަށްނުދާ މިންވަރަށް ދަށަށްގޮސްފަ އެވެ.
އިނގިރޭސިވިލާތުގައި ކޮވިޑް-19 ފެތުރޭ މިންވަރާ އަޅާބަލާއިރު ފެތުރުން ކޮންޓްރޯލް ކުރުމަށްޓަކައި އަަޅާ ފިޔަވަޅުތަކުގެ ސްޕީޑް ލަސްކަމަށް ބުނެ އެގައުމުގެ ގިނަ ރައްޔިތުންގެ ފާޑުކިޔުންތައް ވަނީ ބޮޑުވަޒީރު ބޮރިސް ޖޯންސަންގެ ސަރުކާރަށް އަމާޒުވެފަ އެވެ. ވަކިން ޚާއްސަކޮށް ޔޫރަޕްގެ އެހެން ގައުމުތައް ކަމަށްވާ ސްޕެއިން، އިޓަލީ އަދި ފްރާންސް ފަދަ ގައުމުތަކުން މުހިންމު ފިޔަވަޅުތަކެއް އަޅާފައިވާއިރު އިނގިރޭސިވިލާތުގެ ސަރުކާރުން އެފަދަ އެއްވެސް ފިޔަވަޅެއް އަޅާފައިނުވާތީ ވަނީ ފާޑުކިޔުންތައް އަމާޒުވެފަ އެވެ.
މިހުރިހާ ކަންތައްތަކެއްގެ ސަބަބުން އިނގިރޭސިވިލާތުގެ އެޑިޔުކޭޝަން ސެކެޓްރީ ގެވިން ވިލިއަމްސަން ވިދާޅުވެފައިވަނީ ވަނީ ހުކުރު ދުވަހު ކިޔަވައިދިނުމަށްފަހު އެގައުމުގެ ސްކޫލްތައް ބަންދުކުރުމަށް ނިންމާފައިވާކަމަށެވެ. ސްކޫލްތައް އަލުން ހުޅުވާނެ ތާރީޚެއް އަދި ކަނޑަނާޅާކަމަށް ވިލިއަމްސަން ވިދާޅުވި އެވެ. އެހެންނަމަވެސް ޗައިލްޑް ކެއަރ ދޭ ބައެއް ތަންތަން ހުޅުވާފައި ބެހެއްޓުމަށް ވަނީ ނިންމާފަ އެވެ. އެއީ ނޭޝަނަލް ހެލްތު ސަރވިސް ސްޓާފުންގެ މަސައްކަތަށް ނިކުންނަންޖެހޭތީ އެމީހުންގެ ދަރިން ބެލުމަށެވެ. އަދި ސޯޝަލް ވޯކަރުން ބަލަހައްޓާ ކުދިންވެސް އެތަންތަނަށް ގެންދިޔުމަށް ހަމަޖެހިފައިވާކަމަށް ވިލިއަމްސަން ވިދާޅުވި އެވެ. މީގެއިތުރުން އިނގިރޭސިވިލާތުގައި މިއަހަރު ޖީސީއެސްއީ އޯ ލެވެލް އަދި އޭލެވް އިމްތިހާން ނޯންނާނެކަމަށްވެސް ވިލިއަމްސަން ވިދާޅުވި އެވެ.
މިނިންމުމާއެކު މަދުން އާމްދަނީ ލިބޭ ކުދިންނަށް ޚާއްސަ ވައުޗަރ ސިސްޓަމެއް އެކުދިންގެ ސްކޫލް މީލް ދިނުމަށް ހަމަޖައްސަމުންދާކަމަށް ވިލިއަމްސަން ވިދާޅުވި އެވެ.
އިނގިރޭސިވިލާތުގެ ސްކޫލްތައް ބަންދުކުރުމަށް ނިންމުމާއެކު އެގައުމުގެ އިގްތިޞާދަށް އޭގެން ނޭދެވޭ އަސަރުތައް ކުރާނެކަމަށް އެގައުމުން ބުނެއެވެ. އެގައުމުގެ 9 މިލިއަން ކުޑަކުދިންގެ ދިރިއުޅުމަށް ބޮޑެތި ބަދަލުތަކެއް އަންނައިރު އެކުދިންގެ ބެލެނިވެރިން މަސައްކަތަށް ނުގޮސް ގޭގައި ތިބެގެން ކުދިން ބަލަން މަޖުބޫރުވެގެންދާނެ އެވެ.
މިހާތަނަށް އިނގިރޭސިވިލާތުން ވަނީ މިވައިރަސް ޖެހިގެން 103 މީހުން މަރުވެފަ އެވެ. އަދި ވައިރަސް ޖެހުނު މީހުންގެ އަދަދު ދެހާހަށްވުރެ މައްޗަށް ވަނީ އަރާފަ އެވެ.
