ޗެނަލަކުން ދޮގު ހަބަރު ފެތުރި މައްސަލައެއް ބްރޮޑްކޮމްއަށް
ކޮވިޑް-19 އަށް ރާއްޖެ މީހަކު ޕޮޒިޓިވްވެފައިވާ ކަމަށް ޗެނަލް 13 ގެ ''މަޑިސީލަ'' ޕްރޮގްރާމްގައި ވަނީ ބުނެފައި
ބްރޮޑްކާސްޓިން ކޮމިޝަންގެ ޖަލްސާއެއްގެ ތެރެއިން
ރައްޔިތުންގެ ތެރޭގައި ބިރުވެރިކަން އުފެދޭގޮތަށް ޓީވީ ޗެނަލަކުން ދޮގު ހަބަރު ފެތުރި މައްސަލައެއް ފުލުހުންނަށް ހުށައެޅިފައިވާތީ، އެ މައްސަލަ ބަލަން ބްރޯޑްކާސްޓިން ކޮމިޝަން (ބްރޮޑްކޮމް) އަށް ހުށައަޅާފައިވާ ކަމަށް މޯލްޑިވްސް ފޮލިސް ސަރވިސް އިން ބުނެފިއެވެ.
ރާއްޖެ.އެމްވީ އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ، ބުދަ ދުވަހުގެރޭ އެކި ފަރާތްތަކުން އެ ޓީވީ ޗެނަލްގެ މައްސަަލަ ފުލުހަށް ހުށައަޅާފައިވާ ކަމަށެވެ. އެފަދަ ކަންކަން ބެލުމުގައި އިލްތިމާސް އޮންނަނީ ބްރޮޑްކޮމްއަށްވަތީވެ އެ މައްސަލަ އެ ކޮމިޝަނަށް ހުށައަޅާފައިވާ ކަމަށް ފުލުހުން ބުންޏެވެ. އެކަމަކު އެއީ ކޮން ޗެނަލްއެއް ކަމެއް ފުލުހުން ހާމައެއް ނުކުރައެވެ.
ޗެނަލް 13 ބުދަ ދުވަހުގެރޭ ދެއްކި ''މަޑިސީލަ'' ޕްރޮގްރާމްގައި ރާއްޖޭގައި ކޮވިޑް-19 އަށް ދިވެއްސަކު ޕޮޒިޓިވްވެފައިވާ ކަމަށާއި، އެމީހާ އަށް ދަރުމަވަންތަ ހޮސްޕިޓަލުގައި ފަރުވާދެމުންދާ ކަމަށް ވަނީ ބުނެފައެވެ. ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފައިވާގޮތުން ކޮވިޑް-19 އަށް ރާއްޖެއިން ޕޮޒިޓިވްވި އެންމެންނަކީވެސް ބިދޭސީންނެވެ.
''މަޑިސީލާ'' ޕްރޮގްރާމްގެ މައްސަލަތަކެއް ބްރޮޑްކޮމުން ވަނީ މީގެކުރިންވެސް ބަލާފައެވެ. ޗެނަލް 13 އިން އެގޮތަށް ރިޕޯޓްކޮށްފައިވާތީ ގިނަ ބައެއްގެ ފާޑުކިޔުން ވަނީ އެ ޗެނަލަށް އަމާޒުވެފައެވެ. ރައްޔިތުންގެ މަޖިލީހުގެ މެމްބަރުންވެސް ވަނީ ދޮގު ހަބަރު ނުފެތުރުމަށް އެ ޗެނަލްގެ ޕްރެޒެންޓަރަށް ގޮވާލައްވާފައެވެ.
ކޮވިޑް-19 އާ ގުޅިގެން ރައްޔިތުންގެ ހިތު ތެރޭގައި ބިރުވެރިކަން އުފެދޭ ހަބަރުތައް ނުފެތުރުމަށް ކަމާއިބެހޭ އިދާރާތްތަތަކުން ދަނީ ކެނޑިނޭޅި ގޮވާލަމުންނެވެ.
