އޭއެފްސީ ކަޕްގެ މެޗުތައް ފަސްކޮށްފި

މިހާރު ހަލުވިކަމާއިއެކު ފެތުރެމުންދާ ކޮރޯނާވައިރަސް (ކޮވިޑް-19) ގެ އޭއެފްސީ ކަޕްގެ މެޗުތައް ފަސްކުރުމަށް އޭޝިއަން ފުޓްބޯލް ކޮންފެޑެރޭޝަން (އޭއެފްސީ) އިން ނިންމައިފި އެވެ.

މީގެ ކުރިން އޭއެފްސީން ވަނީ އޭއެފްސީ ކަޕްގެ ވެސްޓް ޒޯނުގައި މިމަހު ކުޅެން ހަމަޖެހިފައި ހުރި މެޗުތައް ފަސްކޮށްފައެވެ. އެކަމަކު ބުދަ ދުވަހު އޭއެފްސީން ވަނީ މި މަހާއި އަންނަ އޭޕްރީލް މަހު އޭއެފްސީ ކަޕްގެ ހުރިހާ ސަރަހަދެއްގައި ކުޅެން ތާވަލުކޮށްފައި ހުރި މެޗުތައް ފަސްކޮށްފައެވެ. ދެން އެ މެޗުތައް ކުޅޭނެ ތާރީޚެއް އޭޕްރީލް މަހަށްފަހު ކަނޑައަޅާނެ ކަމަށް އޭއެފްސީން ވަނީ ބުނެފައެވެ.

އޭއެފްސީ ކަޕްގެ މެޗުތައް ފަސްކުރިއިރު، އަންނަ މަހު މި މުބާރާތުގައި ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަނާއި ޓީސީ ސްޕޯޓްސް ކްލަބު މާލޭގައި ދެ މެޗު ކުޅޭ ގޮތަށް އޮތީ ތާވަލުކޮށްފައެވެ. އެގޮތުން ފުރަތަމަ މެޗުގައި 14 ވަނަ ދުވަހު މާޒިޔާ ބަޝުންދަރާ ކިންގްސްއާ ބައްދަލުކުރަން އޮތްއިރު، 15 ވަނަ ދުވަހު ޓީސީ ބައްދަލުކުރަން ހަމަޖެހިފައި އޮތީ ޗެންނާއީ ސިޓީ އެފްސީ އާއެވެ.

މީގެ ކުރިން އޭއެފްސީން ވަނީ އޭއެފްސީ ޗެމްޕިއަންސް ލީގުގެ މެޗުތައް މެދުކަނޑާލާފައެވެ. އޭއެފްސީ ކަޕްގެ މެޗުތައް ފަސްކުރިއިރު، ކޮރޯނާވައިރަސް (ކޮވިޑް-19) ގެ ސަބަބުން ރާއްޖޭގައިވެސް ވަނީ ފުޓްބޯޅައިގެ ހުރިހާ ހަރަކާތްތަކެއް ހުއްޓާލާފައެވެ.

ދުނިޔޭގެ ގިނަ ގައުމުތަކަކުން ކޮރޯނާވައިރަސް (ކޮވިޑް-19) ފެނިފައިވާއިރު، ފުޓްބޯޅައިގެ އެންމެ ނަން މަޝްހޫރު ސަރަހައްދުތަކުގެ ލީގުތައް މިހާރު ވަނީ މެދު ކަނޑާލާފައެވެ. އެގޮތުން ޔޫރަޕްގެ އެންމެ ވަރުގަދަ ލީގުތައް ކަމަށްވާ އިނގިރޭސި ޕްރިމިއާ ލީގާއި، ސްޕެނިޝް ލީގާއި، އިޓާލިއަން ލީގާއި، ފްރެންޗް ލީގުގެ އިތުރުން ޖަރުމަން ލީގުގެ މެޗުތައް ވަނީ މެދުކަނޑާލާފައެވެ. އަދި ޔުއެފާއިން ވަނީ ޗެމްޕިއަންސް ލީގާއި ޔޫރޮޕާ ލީގުގެ މެޗުތައްވެސް މެދުކަނޑާލާފައެވެ.

އޭގެ އިތުރަށް މިއަހަރު ބޭއްވުމަށް ހަމަޖެހިފައި އޮތް ޔޫރޯ ފުޓްބޯޅަ މުބާރާތާއި ކޮޕަ އެމެރިކާ ފުޓްބޯޅަ މުބާރާތް ވަނީ އަންނަ އަހަރަށް ފަސްކޮށްފައެވެ.