އައި.ޖީ.އެމް.އެޗާއި ދަރުމަވަންތަ ހޮސްޕިޓަލުގެ ދޮރުމަތީގައި ކޮވިޑް-19 އަށް ސްކްރީން ކުރަން ފަށަނީ
18 މާރިޗު 2020 | ބުދަ 16:12.އޯ.ޕީ.ޑީ އަށް ޑޮކްޓަރަށް ދައްކަން އަންނަ ބަލިމީހުންވެސް ހުމާއި ރޯގާއަށް ސްކްރީން ކުރަން ފަށާނެ
އައި.ޖީ.އެމް.އެޗްް
އައި.ޖީ.އެމް.އެޗާއި ދަރުމަވަންތަ ހޮސްޕިޓަލުގެ ދޮރުމަތީގައި ސްކްރީން ކުރަން ފަށައިފިއެވެ.
އައިޖީއެމްއެޗް އިން ނެރުނު ނޫސްބަޔާނެއްގައި ބުނެފައިވަނީ ރާއްޖޭގައި ކޮވިޑް-19 ސަރވައިލެންސާއި ކޮންޓްރޯލް ކުރުމަށް ކުރާ މަސައްކަތުގައި އެ ހޮސްޕިޓަލުންދޭ ބައެއް ޚިދުމަތްތަކަށް ބަދަލު ގެނެސްފައިވާކަމަށެވެ. އައިޖީއެމްއެވް އިން ބުނީ އެބަދަލުތައް ގެނެސްފައިވަނީ ކޮވިޑް-19 ދިވެހިރާއްޖެއިންވެސް ފެނިފައިވާތީ، އެ ބަލި ކޮންޓްރޯލް ކުރުމަށް ސަރުކާރުން ކުރަމުންދާ މަސައްކަތްތަކަށް އެއްބާރުލުން ދިނުމުގެ ގޮތުން ކަމަށެވެ. އެގޮތުން އެ ބަދަލުތަކަށް އަމަލުކުރަން ފަށާނީ އާދިއްތައިން ފެށިގެން ހޮނިހިރު ދުވަހާއި ހަމަޔަށް ކަމަށެވެ.
ނޫސްބަޔާނުގައި ވަނީ އައި.ޖީ.އެމް.އެޗާއި ދަރުމަވަންތަ ހޮސްޕިޓަލަށް ވަންނަ ބަލިމީހުން ހުމާއި ރޯގާ ހުރިތޯ ބެލުމަށް ދޮރުމަތީގައި ސްކްރީން ކުރަން ފަށާނެ ކަމަށެވެ. އަދި .އޯ.ޕީ.ޑީ އަށް ޑޮކްޓަރަށް ދައްކަން އަންނަ ބަލިމީހުންވެސް ހުމާއި ރޯގާއަށް ސްކްރީން ކުރަން ފަށާނެ ކަމަށް ވެސް އައިޖީއެމްއެޗް އިން ބުންޏެވެ. އަދި އެއިން އެއްވެސް ހާލަތެއްގައި ހުމާއި ރޯގާގެ އަލާމާތްތައް ހުރިނަމަ ސެނަހިޔާގައި ހެދިފައިވާ ފްލޫ ކްލިނިކަށާއި މާލޭހިޔާ 2 ގައި(ސިނަމާލެ 2) ބިއްދޮށުގައި ހެދިފައިވާ ޓްރެވަލް ކްލިނިކަށް ދިއުމަށް އިރުޝާދު ދިނުމަށް ވެސް އެ ހޮސްޕިޓަލުން ވަނީ ނިންމާފައެވެ. އަދި ދުރާލާ ރާވައިގެން އާއްމުކޮށް ކުރަމުން އަންނަ އޮޕަރޭޝަންތައް އާދީއްތަ އިން ފެށިގެން ވަގުތީ ގޮތުން ހުއްޓާލުމަށް ވެސް ވަނީ ނިންމާފައެވެ. މީގެއިތުރުން އާއްމުކޮށް ހިނގަމުންދާ އޯ.ޕީ.ޑީ، އެކްސްރޭ، ސީ.ޓީ ސްކޭން، އެމް.އާރު.އައި، އަލްޓްރާ ސައުންޑް ސްކޭން އަދި ލެބޯޓްރީގެ ހިދުމަތްތައް ދެމުންގެންދާ ގަޑިތައް ހެނދުނު 8 އިން މެންދުރުފަހު 2:30 އަށް ބަދަލު ކުރުމަށް ވެސް އައިޖީއެމްއެޗް އިން ވަނީ ނިންމާފައެވެ.
އައިޖީއެމްއެޗް އިން ބުނީ ހޮސްޕިޓަލުގެ ޚިދުމަތްދޭ ގޮތްތަކަށް ވަގުތީ ގޮތުން ބަދަލުތަކެއް ގެނެސްފައިވަނީ އާއްމު ރައްޔިތުންނާއި ޞިއްޙީ ޚިދުމަތްތެރިންގެވެސް ސަލާމަތާއި ރައްކާތެރި ކަމަށްޓަކައި ކަމަށެވެ. އަދި މި ބަދަލުތައް ގެނައިކަމުގައި ވީނަމަވެސް ކުއްލި ހާލަތުގައި ފަރުވާ ހޯދަން ޖެހޭ ބަލިމީހުންނަށް އިމަރޖެންސީ ރޫމުން 24 ގަޑިއިރު ފަރުވާ ލިބެމުންދާނެ ކަމަށް ވެސް އެ ހޮސްޕިޓަލުން ބުންޏެވެ.
