ދަރުމަވަންތަ ހޮސްޕިޓަލްގައި މިހާރު ކުރިއަށްދަނީ އިކުއިޕްމަންޓް އިންސްޓޯލްކުރުމުގެ މަސައްކަތް: ރިޝްވާން
އިމާރާތުގެ އެތެރެ އާއި ބޭރުގެ ހުރިހާ މަސައްކަތެއް އެއްކޮށް ނިމިފައި
ދަރުމަވަންތަ ހޮސްޕިޓަލްގައި މިހާރު ކުރިއަށްދަނީ އިންޓީރިއާ މަސައްކަތް
ދަރުމަވަންތަ ހޮސްޕިޓަލްގެ އިންޓީރިއާ މަސައްކަތް ނިމި، މިހާރު ކުރިއަށްދަނީ އިކުއިޕްމަންޓް އިންސްޓޯލްކުރުމުގެ މަސައްކަތް ކަމަށް އައިޖީއެމްޗްގެ ޑެޕިއުޓީ ސީއީއޯ މުހައްމަދު ރިޝްވާން ވިދާޅުވެއްޖެއެވެ.
ރިޝްވާން ވިދާޅުވީ 25 ބުރީގެ އިމާރާތުގެ ކޮންސްޓްރަކްޝަން މަސައްކަތް މުޅިން ނިމިފައިވާއިރު، އިމާރާތުގެ އެތެރެ އާއި ބޭރުގެ ހުރިހާ މަސައްކަތެއް އެއްކޮށް ނިމިފައިވާ ކަމަށެވެ.
މިހާރު ކުރިއަށްދަނީ ހޮސްޕިޓަލަށް ބޭނުންވާ އިކުއިޕްމަންޓް ގަތުމާއި، އަދި ގެނެވިފައިވާ އިކުއިޕްމަންޓްތައް ބަހައްޓާ އިންސްޓޯލް ކުރުން ކަމަށް ރިޝްވާން ވިދާޅުވިއެވެ.
ދަރުމަވަންތަ ހޮސްޕިޓަލް ހުޅުވަން ނިންމާފައި އޮތީ އަންނަ އަހަރުގެ ފެބްރުއަރީ މަހުއެވެ.
ރިޝްވާން ވިދާޅުވީ ހޮސްޕިޓަލް ހުޅުވުމަށް ކުރިން ކަނޑައަޅާފައިވާ ތާރީޚަށް ހޮސްޕިޓަލް ހުޅުވޭނެ ކަމުގެ ޔަގީންކަން މިހާރު ނެތް ކަމަށެވެ.
ސަރުކާރު ބަދަލުވުމުގެ އިންތިގާލީ މަރްހަލާ މިހާރު ކުރިއަށްދާތީ، ހޮސްޕިޓަލްގެ ބައެއް މަސައްކަތްތައް ކުރުން މި ވަގުތު މަޑުޖައްސާލާފައިވާ ކަމަށް ރިޝްވާން ވިދާޅުވިއެވެ.
ސަރުކާރު ބަދަލުވުމުގެ އިންތިގާލީ މަރްހަލާގެ މަސައްކަތް ކުރުމަށްޓަކައި އެކުލަވާލެވިފައިވާ ޓްރާންސްސިޝަން ކޮމިޓީއާ އެކު ބައްދަލުވުންތައް ކުރިއަށް ގެންދެވި، ހޮސްޕިޓަލް ހުޅުވަން ކަނޑައެޅިފައިވާ ތާރީހުގައި ހޮސްޕިޓަލް ހުޅުވަން ދިމާވެފައިވާ ދަތިތަކާ ގުޅޭ ގޮތުން ގިނަ ބައްދަލުވުންތަކެއް ކުރިއަށް ދިޔައިރު، އެ ބައްދަލުވުންތައް ނިމިފައިވަނީ އިއްޔެ ކަމަށް ރިޝްވާން ވިދާޅުވިއެވެ.
ރިޝްވާން ވިދާޅުވީ ހޮސްޕިޓަލް ހުޅުވޭނެ ދުވަހެއް ކަނޑައަޅަން އެނގޭނީ އާ ރައީސް ރިޔާސީ ދައުރު ފެށިގެން ދިއުމުން ކަމަށެވެ.
އައިޖީއެމްޗްއާ ޖެހިގެން އަޅަމުންދާ 25 ބުރީގެ ދަރުމަވަންތަ ހޮސްޕިޓަލް ހުޅުވަން ކުރިން ކަނޑައަޅާފައި އޮތީ މި އަހަރުގެ ޖުލައިމަހު 26 ވަނަ ދުވަހުއެވެ.
ސިންގަޕޫރުގެ ޝެންހުއާ ކޮންސްޓްރަކްޝަނާ ހަވާލުކޮށްގެން ޖޫން، 5، 2016 ގައި، މަސައްކަތް ފެށި މި މަޝްރޫއަށް ދައުލަތުގެ ބަޖެޓުން 140 މިލިއަން ޑޮލަރު (2.1 ބިލިއަން ރުފިޔާ) ހޭދަކުރެއެވެ. މައުލޫމާތު ލިބިފައިވާ ގޮތުގައި އިމާރާތަށް ބޭނުންވާ ސާމާނު ގެންނަން ހަމަޖެހިފައި ވަނީ ވަކިންނެވެ.
އާ އިމާރާތް ހުޅުވަން ހަމަޖެހިފައި ވަނީ އޯޕީޑީ އާއި އެކްސްރޭ އާއި އެމްއާރުއައި، ފިޒިއޯތެރަޕީ، ސްޕޯޓްސް ތެރަޕީ، އީއެންޓީ އާއި ލޮލުގެ ބަލިތަކަށް ޚާއްސަ ޑިޕާޓްމެންޓާއި ޑެންޓަލް ޑިޕާޓްމެންޓަކާ އެކުގައެވެ. މީގެ އިތުރުން ހޮސްޕިޓަލްގެ ދެ ބުރި ހާއްސަކޮށްފައި ވަނީ މެޑިކަލް ކޮލެޖަށެވެ. މެޑިކަލް ކޮލެޖް ގާއިމުކުރަން ޕާކިސްތާނުން ވަނީ ހިލޭ އެހީ ދީފައެވެ.
ރާއްޖޭގެ އާބާދީގެ ގިނަ ބަޔަކު ފަރުވާ ހޯދާ އައިޖީއެމްއެޗުގެ މިހާރުގެ ޖާގައަކީ 350 އެނދެވެ. އާ އިމާރާތުގެ ޚިދުމަތް ފެށުމުން ޖާގަ 500 އެނދަށް އިތުރުވާނެ ކަމަށް ރިޝްވާން ވަނީ ވިދާޅުވެފައެވެ.
