މީހުން ޓްރެފިކްކުރުން ހުއްޓުވުން ވިލަރެސްކުރާ ކޮމެޓީއަށް ބަދަލުގެންނަނީ
18 މާރިޗު 2020 | ބުދަ 12:48މި ބިލު ސަރުކާރުގެ ފަރާތުން ހުށަހެޅުއްވީ ހިންނަވަރު ދާއިރާގެ މެމްބަރު ޖީހާން މަހުމޫދު
ރައްޔިތުންގެ މަޖިލިސް
މީހުން ޓްރެފިކްކުރުން ހުއްޓުވުމުގެ ކަންކަން ވިލަރެސްކުރާ ކޮމެޓީގެ މެމްބަރުންގެ އަދަދު ދިހަ އަކަށް ބަދަލުކުރުމަށް ރައްޔިތުންގެ މަޖިލީހުން ފާސްކޮށްފިއެވެ.
މި ބިލު ސަރުކާރުގެ ފަރާތުން ހުށަހެޅުއްވީ ހިންނަވަރު ދާއިރާގެ މެމްބަރު ޖީހާން މަހުމޫދެވެ. ޖީހާން ހުށަހެޅުއްވި ބިލުގައި އޮތީ ވިލަރެސް ކުރާ ކޮމެޓީގެ މެމްބަރުންގެ އަދަދު 14 އިން 8 އަކަށް ބަދަލުކުރާ ގޮތަށް އިސްލާހު ހުށަހަަޅާފައެވެ. ނަމަވެސް މި ބިލް ދިރާސާކުރި މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީން ނިންމާފައިވާގޮތަށް އެ ކޮމެޓީގެ މެމްބަރުންގެ އަދަދު 10 އަކަށް އިތުރު ކުރުމަށް މަޖިލީހުން ފާސްކުރީ 70 މެމްބަރުންގެ ވޯޓާއި އެކުއެވެ.
ރައްޔިތުންގެ މަޖިލީހުން ފާސްކުރި މި ބިލުގައިވާގޮތުން ވިލަރެސް ކޮމެޓީގައި ހިމެނެންވާނީ ހިއުމަން ޓްރެފިކިންގ ހުއްޓުވުމަށް ކުރަންޖެހޭ ކަންކަން ވިލަރެސް ކުރުމުގެ ޒިންމާ ހަވާލުވެފައިވާ މިނިސްޓްރީގެ މުވައްޒަފަކާއި އެޓަރނީ ޖެނެރަލް އޮފީހުގެ ޤާނޫނީ ވަކީލަކާއި ޑިޕާޓްމަންޓް އޮފް އިމިގްރޭޝަންގެ މުވައްޒަފެކެވެ. އަދި މޯލްޑިވްސް ކަސްޓަމްސް ސަރވިސްގެ މުވައްޒަފަކާއި މޯލްޑިވްސް ޕޮލިސް ސަރވިސްގެ އޮފިސަރަކާއި ލޭބަރ ރިލޭޝަންސް އޮތޯރިޓީގެ މުވައްޒަފެއް ވެސް އެ ކޮމެޓީގައި ހިމެނެއެވެ. މީގެއިތުރުން އެ ކޮމެޓީގައި މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ މުވައްޒަފަކާއި މިނިސްޓްރީ އޮފް ހޯމް އެފެއާޒުގެ މުވައްޒަފަކާއި މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް އިން ކަނޑައަޅާ އެ މިނިސްޓްރީގެ މުވައްޒަފެއްގެ އިތުރުން މީހުން ޓްރެފިކް ކުރުން ހުއްޓުވުމަށް މަސައްކަތްކުރާ އަމިއްލަ ޖަމްޢިއްޔާއަކުން އެ ޖަމްޢިއްޔާގެ މެންބަރެކެވެ.
މީހުން ޓްރެފިކްކުރުން ހުއްޓުވުމުގެ ޤާނޫނުނަށް އިޞްލާޙު ގެނައުމުގެ ޤާނޫނަށް ޢަމަލުކުރަން ފަށާ ތާރީޚުން ފެށިގެން ދިހަ ދުވަހުގެ ތެރޭގައި، ވިލަރެސް ކޮމިޓީ އެކުލަވާލަންޖެހެއެވެ. މި ޤާނޫނަށް ޢަމަލުކުރަން ފަށާނީ، މި ޤާނޫނު ފާސްވެ، ތަޞްދީޤްކޮށް، ދިވެހި ސަރުކާރުގެ ގެޒެޓްގައި ޝާއިޢުކުރާދުވަހުން ފެށިގެންނެވެ.
