މުހިންމު ބޭނުމެއްގައި މެނުވީ ތައިލެންޑަށް ދަތުރު ނުކުރައްވާ: އެމްބެސެޑަރ
ތައިލެންޑްގެ އެތެރޭގައި ވެސް، އެއް ތަނުން އަނެއް ތަނަށް، ދަތުރު ނުކުރެއްވާ
ދިވެހިރާއްޖެއިން ތައިލެންޑަށް ކަނޑައަޅުއްވާފައިވާ ސަފީރު މުހައްމަދު ޖިނާހް
މުހިންމު ބޭނުމެއްގައި ނޫން ގޮތަކަށް ތައިލެންޑަށް ދަތުރު ނުކުރެއްވުމަށާއި، ތައިލެންޑްގެ އެތެރޭގައި ވެސް، އެއް ތަނުން އަނެއް ތަނަށް، ދަތުރު ނުކުރެއްވުމަށް ދިވެހިރާއްޖެއިން ތައިލެންޑަށް ކަނޑައަޅުއްވާފައިވާ ސަފީރު މުހައްމަދު ޖިނާހް އެދިވަޑައިގެންފިއެވެ.
މިކަން ހާމަކޮށް އެމްބެސެޑަރ ނެރުއްވާފައިވާ ބަޔާނެއްގައި ބުނެފައިވަނީ، ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ބަލީގެ ޙާލަތު މި ވަގުތު ތައިލެންޑްގައި އޮތް ގޮތުގެމައްޗަށް ރިޢާޔަތްކޮށް، ތައިލެންޑްގައި ދިރިއުޅުއްވާ އަދި ޒިޔާރަތްކުރާއިރު މުހިންމު ބޭނުމެއްގައި ނޫން ގޮތަކަށް ތައިލެންޑަށް ދަތުރު ނުކުރެއްވުމަށެވެ. އަދި ތައިލެންޑްގެ އެތެރޭގައި ވެސް، އެއް ތަނުން އަނެއް ތަނަށް، ދަތުރު ނުކުރެއްވުން އެމްބެސެޑަރ ވަނީ އިލްތިމާސްކުރައްވާފައެވެ.
ތައިލެންޑުގައި ދިރިއުޅުއްވާ އަދި ޒިޔާރަތްކުރައްވާ ދިވެހި ރައްޔިތުންގެ ރައްކާތެރިކަމާއި ސަލާމަތަކީ، އެންމެ ބޮޑު މަސްއޫލިއްޔަތުކަމަށާއި އެއީ އެންމެ ބޮޑު އަހަންމިއްޔަތު ކަމެއް ދޭ ކަންތައްކަމަށް އެމްބެސެޑަރ ފާހަގަކުރެއްވިއެވެ. ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް ކުރަމުންދާ މަސައްކަތަށް އެއްބާރުލުންދެއްވުމުގެ ގޮތުން، ތައިލެންޑްގެ ސަރުކާރުގެ ކަމާ ބެހޭ ފަރާތްތަކުގެ އިރުޝާދާއި، އެންގެވުންތަކަށް ހުރިހާ ބޭފުޅުން ވެސް ސަމާލުކަން ދެއްވުމަށާއި، ފުރިހަމައަށް ޢަމަލުކުރެއްވުމަށް އެމްބެސެޑަރ ވަނީ އިލްތިމާސްކުރައްވާފައެވެ
ކޮވިޑް-19 ބައްޔާއި ބެހޭ ގޮތުން ތައިލެންޑްގެ ސަރުކާރުން ހާމަކުރައްވާ އެންމެ ފަހުގެ މަޢުލޫމާތުތަކާއި، އަންގަވާ އެންގެވުންތަކާއި، ދެއްވާ އިރުޝާދުތައް، ޑިޕާޓްމެންޓް އޮފް ޑިޒީޒް ކޮންޓްރޯލްގެ ވެބްސައިޓުން ލިބިވަޑައިގަންނަވާނެއެވެ. އަދިތައިލެންޑްގައި ހުންނަ ދިވެހިރާއްޖޭގެ އެމްބަސީގެ ފަރާތުން އިތުރު މަޢުލޫމާތު ނުވަތަ އެއްވެސް އެހީތެރިކަމެއް ބޭނުންފުޅުވާނަމަ، އެމްބަސީގެ ހޮޓްލައިން ނަންބަރު 44050709966+ ނުވަތަ01722499966+ އާ ގުޅުއްވުން އެމްބެސެޑަރ ވަނީ ވިދާޅުވެފައެވެ.
