ޝާހިދަކީ ދުނިޔެ ދުށް އެންމެ މޮޅު ފޮރިން މިނިސްޓަރ: ދޮންބިލެތް ހަލީމް
އެމްޑީޕީގެ ވެރިކަމެއް މި ދަނޑިވަޅުގައި އޮތުމުން އުފާކުރަން
ފޮރިން މިނިސްޓަރ އަބްދުﷲ ޝާހިދް އަދި މަޖިލީހުގެ ރައީސް
ދިވެހިރާއްޖޭގެ ފޮރިން މިނިސްޓަރ އަބްދުﷲ ޝާހިދަކީ ފަހުގެ ތާރީހެއްގައި ދުނިޔެ ދުށް އެންމެ މޮޅު ފޮރިން މިނިސްޓަރ ކަމަށް ރައްޔިތުންގެ މަޖިލީހުގެ ބިލެތްދޫ ދާއިރާގެ މެމްބަރު އަހުމަދު ހަލީމް (ދޮންބިލެތް) ވިދާޅުވެއްޖެއެވެ.
ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރާއްޖެއިން ފެނުމާއި ގުޅިގެން ސަރުކާރުން އަޅުއްވަމުން ގެންދަވާ ފިޔަވަޅުތަކަށް ތައުރީފްކުރައްވައި ދޮންބިލެތް ވިދާޅުވީ މިފަދަ ހައްސާސް ދަނޑިވަޅެއްގައި ރައްޖޭގެ ރައްޔިތުންގެ ހިމާޔަތުގައި މިކަމުން އަރައިގަތުމަށް އެމްޑީޕީގެ ވެރިކަމެއް އޮތުމުން ރައްޔިތުން ޝުކުރުވެރިވާކަމަށެވެ.
ދޮންބިލެތް ހަލީމް ވިދާޅުވީ، ކުރީ ސަރުކާރުން ރާއްޖޭގައި ބަލިމަޑުކަމެއް ފެތުރުނަސް ރައްޔިތުންނަށް ސިއްރުކުރާކަމަށާއި މި ސަރުކާރުން އިސްކުރާނީ ރައްޔިތުންގެ މަސްލަހަތުކަމަށެވެ. އަދި ރާއްޖެއިން ބޭރުން މިކަމާއި ގުޅިގެން ވެދެއްވާ ކޮންމެ އެހީއެއް ވަކި ގައުމެއް އިސްތިސްނާވުމެއްނެތި ސަރުކާރުން ގަބޫލުކުރައްވާނެކަމަށް ދޮންބިލެތް ވިދާޅުވިއެވެ.
އިތުރަށް ވާހަކަދައްކަވަމުން އޭނާ ވިދާޅުވީ، މިފަދަ ހައްސާސް ދަނޑިވަޅެއްގައިވެސް އިދިކޮޅު ފަރާތްތަކުން ރައްޔިތުންގެ މެދުގައި ނުތަނަވަސްކަން އުފެއްދުމަށްޓަކައި މަސައްކަތް ކުރަމުންދާކަމަށެވެ. އެގޮތުން ނައިފަރު ދާއިރާގެ މެމްބަރ ޝިޔާމު، ޗައިނާގެ ސަރުކާރުން ދިން ހިލޭ އެހީ މި ސަރުކަރުން ގަބޫލުނުކުރި ކަމަށް ކުރި ތުހުމަތުތަކަށް ދޮންބިލަތް ވަނީ ހޫނު ރައްދުތަކެއް ދެއްވާފައެވެ.
މި ވާހަކަތަކާއި ގުޅިގެން ނެންގެވި ނިޒާމީ ނުކުތާއެއްގައި ނައިފަރު ދާއިރާގެ މެމްބަރު ޝިޔާމް ވިދާޅުވީ، ސަރުކާރުން ނޫނެކޭ ނުބުނާ ކަމަށް ޗައިނާ ސަފީރު ވިދާޅުވި ނަމަވެސް، އާނއެކޭ ބުނިކަމަކަށް ވެސް ވިދާޅެއް ނުވާ ކަަމަށެވެ.
ޝިޔާމް ކުރެއްވި ތުހުމަތުތަކާއި ގުޅިގެން ޗައިނާ ސަފީރު ވިދާޅުވީ މަޝްވަރާތައް ކުރިއަށްދާ ކަމަށެވެ. އަދި ދެ ގައުމުގެ ގުޅިގެން އެކުގައި މަސައްކަތްކުރެވޭނެ ދާއިރާތައް ދެނެގަތުމަށް މަޝްވަރާތައް ކުރަމުންދާ ކަމަށް ވެސް ޗައިނާ ސަފީފު ވިދާޅުވިއެވެ.
އޭގެ އިތުރުން، ދުނިޔޭގެ ތަހުޒީބީ ގައުމުތަކުން ކުދި ގައުމުތަކަށް އެހީވުމަށްޓަކައި މިލިއަނުން އެހީ ދިނުމަށް ނިންމާފައިވާކަމަށާއި ރާއްޖޭގެ ހާރިޖީ ސިޔާސަތު ވަރުގަދަކަމާއެކު ސަރުކާރު އިނދަ ނުޖެހޭ ވަރުގެ މާލީ އެހީތެރިކަން ލިބޭނެކަމަށް ގަބޫލުކުރައްވާކަމަށް ދޮންބިލެތް ހަލީމް ވިދާޅުވިއެވެ. އަދި ފޮރިން މިނިސްޓަރާއި ރައްޔިތުންގެ މަޖިލީހުގެ ރައީސް އަދި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ގުޅިގެން ގައުމަށް ލިބިފައިވާ ގެއްލުމުން އަރައިގަނެވޭނެކަމާއި މެދު ޝައްކުނުކުރައްވާކަމަށް ވިދާޅުވިއެވެ.
