މަޖިލީހުގެ ޖަލްސާތައް މެދުކަނޑާލައިފި: އިދާރީ މުވައްޒަފުން މަސައްކަތްކުރާނީ ގެއިން
މަޖިލީހުގެ މަސައްކަތްތަކަށް ހުއްޓުމެއް ނައިސް ކުރިއަށް ދާނެ: ރައީސް ނަޝީދު
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ރައްޔިތުންގެ މަޖިލީހުގެ ޖަލްސާތައް ވަގުތީ ގޮތުން މެދުކަނޑާލުމަށް ނިންމެވިކަން ރައްޔިތުންގެ މަޖިލީހުގެ ރައީސް މުޙައްމަދު ނަޝީދު އިޢުލާންކުރައްވައިފިއެވެ.
ބުދަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި މިކަން އިޢުލާންކުރައްވަމުން ރައީސް ނަޝީދު ވިދާޅުވީ މިއީ ކޮވިޑް-19 ގެ ނުރައްކަލާއި ގުޅިގެން ނިންމެވި ނިންމުމެއް ކަމަށެވެ. މަޖިލީހުގެ ޖަލްސާތައް މެދެކަނޑާލަން ނިންމެވީ، ރައްޔިތުންގެ މަޖިލީހުގެ ޤަވައިދުގެ 247 ވަަނަ މާއްދާގެ ދަށުން ރިޔާސާތައް ލިބިދޭ ބާރުގެ ތެރެއިންނެވެ.
ޖަލްސާތައް މި ވަގުތަށް މެދުކަނޑާލަން ނިންމެވި ނަމަވެސް، މަޖިލިސް ބަންދެއް ނުވާ ކަމަށާއި، މަޖިލީހުގެ މަސައްކަތްތައް ކުރިއަށް ދާނެ ކަމަށް ރައީސް ނަޝީދު ވިދާޅުވިއެވެ. އެގޮތުން ރައްޔިިތުންގެ މަޖިލީހުގެ މުވައްޒަފުން ގެއިން މަސައްކަތްކުރުމަށް ބޭނުންވާ އިންތިޒާމުތައް މަޖިލީހުގެ އިދާރާއިން ހަމަަޖައްސައި ދޭނެއެވެ.
ރައީސް ނަޝީދު އިތުރަށް ވިދާޅުވީ މިފަދަ ޙައްޞާޞް ދަނޑިވަޅެއްގައި ރައްޔިތުންގެ މަޖިލިސް ބަންދު ނުކުރެވޭނެ ކަމަށެވެ. އަދި މި ވަގުތު ރައްޔިތުންގެ މަޖިލީހުން ކުރަންޖެހޭ މުހިއްމު މަސައްކަތްތަކެއް ހުރިކަން ފާހަގަކުރެއްވިއެވެ.
މި ވަގުތު ރައްޔިތުންގެ މަޖިލީހުން ކޮންމެހެން ނިންމަންޖެހޭ މަސައްކަތްތަކުގެ ތެރޭގައި ކުރިއަށް އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު ފަސްކުރުމަށް ޤާނޫނީ ޙައްލެއް ހޯދުމާއި، އިންތިޚާބު ފަސްކުރުމާއި ގުޅިގެން މިހާރު އިންތިޚާބުކުރެވިފައިވާ ކައުންސިލްތަކުގެ ދައުރު އިތުރުކުރުން ހިމެނެއެވެ.
ޖަލްސާތައް މި ވަގުތަށް މެދުކަނޑާލަން ނިންމެވި ނަމަވެސް، މަޖިލީހުގެ ޖަލްސާއެއް ބާއްވަން ދަންނަވަން ޖެހިދާނެ ކަމަށް ރައީސް ނަޝީދު ވިދާޅުވިއެވެ. އަދި މިފަދަ ދެންނެވުމަކަށް ތައްޔާރުވެ ތިއްބެވުމަށް ރައްޔިތުންގެ މަޖިލީހުގެ މެންބަރުންނަށް އިލްތިމާސްކުރެއްވިއެވެ.
