ޖަމާއަތުގައި ނަމާދު ކުރުން ހުއްޓާލައި ގޭގައި ނަމާދުކުރަން އަންގައިފި
މާލެ، ހުލުމާލެ، ވިލިމާލެ ހިމެނޭ
އިސްލާމިކް މިނިސްޓަރ އަހުމަދު ޒާހިރު އަލީ
މާލެ ސަރަހައްދުގެ ހުރިހާ މިސްކިތްތަކާއި ރިސޯޓުތަކުގައި، ޖަމާޢަތުގައި ނަމާދުކުރުން މެދުކަނޑާލަން އިސްލާމިކް މިނިސްޓްރީން އަންގައިފިއެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި މިކަން އިޢުލާންކުރެއްވީ، އިސްލާމިކް މިނިސްޓަރ ޑރ. އަހުމަދު ޒާހިރު އަލީ އެވެ. މިނިސްޓަރ ވިދާޅުވީ، ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ވައިރަސް (ނޮވެލް ކޮރޯނާ ވައިރަސް) ރާއްޖެއިންފެނިފައިވާތީ، މިހާރުގެ ޙާލަތަށް ރިޢާޔަތްކޮށް، އިތުރަށް މިވައިރަސް ރާއްޖޭގައި ފެތުރުން ހުއްޓުވުމަށްޓަކައި އަޅާރައްކާތެރިކަމުގެ މުހިންމު ފިޔަވަޅެއްގެ ގޮތުން، އިސްލާމީ ފަތުވާދޭ އެންމެ މަތީ މަޖިލީހާއި ދީނީ ޢިލްމުވެރިންގެލަފާގެ މަތިން، 18 މާރޗް 2020 ވާ ބުދަ ދުވަހުގެ މެންދުރު ނަމާދުން ފެށިގެން 28 މާރޗް 2020 ވާ ހޮނިހިރުދުވަހުގެ އަޞްރު ނަމާދުގެ ނިޔަލަށް މާލެ، ހުޅުމާލެ، ވިލިމާލެ، އަދި ހުރިހާ ރިސޯޓްތަކެއްގައި ފަރުޟު ނަމާދުތަކާއި ހުކުރު ނަމާދުގެ ޖަމާޢަތް މިސްކިތުގައި ނުހެދުމަށް ނިންމާފައިވާތީ، އެގޮތަށް ޢަމަލުކުރެއްވުމަށް ދަންނަވާކަމަށެވެ.
އަދި ރަށަކަށް އަރާ ފޭބުން ސަރުކާރުން މަނާކޮށްފިނަމަ (ލޮކްޑައުން ކޮށްފިނަމަ)، އެރަށެއްގައި ވެސް އެ ޙާލަތު ދެމިއޮތްހާ ހިނދަކު ފަރުޟު ނަމާދުތަކާއި ހުކުރު ނަމާދުގެ ޖަމާޢަތް މިސްކިތުގައި ނުހެދުމަށް މިނިސްޓަރ ވަނީ އަންގަވާފައެވެ. މިޙާލަތުގައި މިސްކިތުގައި ހަމައެކަނި ބަންގިގޮވުމަށާއި، ބަންގީގެ ފަހުގައި އަރަބި ބަހުންނާއި ދިވެހި ބަހުން ހުރިހާ އެންމެން ގޭގައި ނަމާދު ކުރައްވާ!" މިފަދައިން 2 ފަހަރު ގޮވުމަށް އިމާމުންނަށް އަންގަވައިދެއްވުމަށް މިނިސްޓަރ ވަނީ ދަންނަވާފައެވެ.
މިދަނޑިވަޅުގައި މިސްކިތުގެ ޖަމާޢަތުގައި ނަމާދު ނުކުރި ނަމަވެސް ފަރުޟު ފަސް ނަމާދު ބަރާބަރަށްއަދާކުރުމަށާއި، ސުންނަތް ނަމާދު ގިނަކޮށް، ގިނަގިނައިން ދުޢާކޮށް، އިސްތިޣްފާރު ކުރުމަށް ހުރިހާ ރައްޔިތުންނަށް މިނިސްޓަރ ވަނީ ނަޞޭޙަތްތެރިވެ ވަޞިއްޔަތްކުރައްވާފައެވެ. އަދި ކަމާބެހޭ ފަރާތްތަކުން ދޭ އިރުޝާދުތަކާ އެއްގޮތަށް ޢަމަލުކުރުމަށާއި، ﷲގެ ރަޙްމަތުންމާޔޫސްނުވެ، ސަބަބު ތަކުގައި ހިފާ، ފުރިހަމައަށް ﷲއަށް ވަކީލުކޮށް އުޅުމަށް ވަނީ ނަސޭހަތްތެރިވެފައެވެ. މިއީ މިޙާލަތަށް ރިޢާޔަތްކޮށް އެޅިފައިވާ ފިޔަވަޅެއްކަމުގައިވާތީ، މި ޙާލަތު ބަދަލުވުމުން މިސްކިތުގެ ޖަމާޢަތުގައި ނަމާދުކުރުމާއި ހުކުރު ނަމާދުކުރުން ކުރިއަށް ގެންދިއުމަށް އަންގަވާނެކަމަށް މިނިސްޓްރީން ވަނީ ފާހަގަކޮށްފައެވެ.
މުސްލިމު ފިރިހެނުން ޖަމާޢަތުގައި ނަމާދުކުރުމަށް އިސްލާމްދީނުގައި ވަރަށްބޮޑަށް ބާރު އަޅާފައިވެއެވެ. ނަމަވެސް ނަމާދު ކުރުމަށް ޖަމާޢަތަށް ޙާޟިރު ނުވެވޭފަދަ ޝަރުޢީ ޢުޛުރެއް މެދުވެރިވެއްޖެނަމަ (މިސާލަކަށް ވާރޭވެހުން ނުވަތަ ބަލިވުން ނުވަތަ އެނޫންވެސް ނުރައްކާތެރި ބަލިމަޑުކަމެއް ނުވަތަ ބަލިވެއުޅޭ މީހުން މިސްކިތައް ދިއުމުގެ ސަބަބުން އެބަލި ބޮޑުވެދާނެކަމުގެ ބިރުހީވާ މީހުން) މިސްކިތަށް ޖަމާޢަތަށް ނުގޮސް އެމީހަކު ނުވަތަ އެބަޔަކު ތިބި ތަނެއްގައި ނަމާދު ކުރުމަކީ އިސްލާމްދީނުގައި ހުއްދަކަމެކެވެ.
ޖަމާޢަތުގައި ނަމާދުކުރުން ހުއްޓާލި ނަމަވެސް، މިސްކިތްތަކައް މީހުން އަރާ ނަމާދުކުރުން މަނާކޮށްފައެއް ނުވެއެވެ.
