ކިރިޔާ އަލާމާތެއް ފެނުނު ނަމަވެސް ކޮވިޑް-19 އަށް ޓެސްޓު ކުރެވޭނެ: ސަރުކާރު
މިގޮތަށް ނިންމާފައިވަނީ އަންގާރަ ދުވަހު
ކޮވިޑް-19 ޓްސްކްފޯރސްގެ ތަރުޖަމާން މަބްރޫކް އަޒީޒް
ކޮވިޑް-19ގެ ކިރިޔާ އަލާމާތެއް ހުރިކަމަށް ފާހަގަކުރެވުނު ނަމަވެސް ޓެސްޓުކުރެވޭނެކަމަށް ވައިރަހާއި ގުޅިގެން ސަރުކާރުން އެކުލަވާލާފައިވާ ޓްސްކްފޯރސްގެ ތަރުޖަމާން މަބްރޫކް އަޒީޒް ވިދާޅުވެއްޖެއެވެ.
މަބްރޫކް ވިދާޅުވީ ކޮވިޑް-19 އިން އަރައިގަތުމުގެގޮތުން އަޅާފައިވާ ފިޔަވަޅުތައް ވަނީ ހަރުދަނާ ކުރެވިފައިކަމަށެވެ. އެގޮތުން ސަރވެރިލެންސް ސާމްޕްލިންގްގެ މަސައްކަތް ވަރުގަދަކުރެވޭނެ ކަމަށާއި ކިރިޔާ ވައިރަހުގެ އަލާމާތެއް ހުރި ނަމަވެސް ޓެސްޓު ކުރެވޭނެ ކަމަށެވެ.
މިފަދައިން މަބްރޫކް ވިދާޅުވެފައިވާއިރު މި ބަލިން ރައްކާތެރިވުމަށްޓަކައި ދިވެހިރާއްޖޭގައި މިހާތަނަށް އަޅަމުންއައި ހުރިހާ ފިޔަވަޅުތައް ފުޅާކޮށް، ގައުމީ ފެންވަރުގައި ދައުލަތުގެ ހުރިހާ އިދާރާތަކެއް ގުޅިގެން، މިހާރުން ފެށިގެން މިކަމާ ދުރާލާ ތައްޔާރުވުމުގެގޮތުން އެކިއެކި މަސައްކަތް ކުރެވެމުން ދާކަމަށް އެންޑީއެމްއޭ އަދި އެޗްޕީއޭއިން ވަނީ މީގެކުރިން ބުނެފައެވެ. ރާއްޖެއިން ކޮވިޑް-19 ފެނުމާ ގުޅިގެން، ބަލި ކޮންޓްރޯލް ކުރުމަށް ހާލަތަށް ބަލައި އަޅަންޖެހޭ ފިޔަވަޅުތައް އަޅުއްވަމުންގެންދަވާނެ ކަމަށް ރައިސުލްޖުމްހޫރިއްޔާވެސް ވަނީ ވިދާޅުވެފައެވެ.
