މީގެފަހުން މެލޭޝިއާއިން އަންނަ ދިވެހިން 14 ދުވަހަށް ކަރަންޓީނު ފެސިލިޓީއަކަށް ފޮނުވޭނެ: އެޗްޕީއޭ

މެލޭޝިއާއިން ރާއްޖެ ރާއްޖެއަންނަ ހުރިހާ ދިވެހިން 14 ދުވަހުގެ ކަރަންޓީން ފެސިލިޓީއަކަށް ފޮނުވޭނެ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފި އެވެ.

އެޗްޕީއޭއިން ބުނީ، އަންގާރަ ދުވަހުގެ 18:00 ގެ ފަހުން، މެލޭޝިޔާއިން ދިވެހިރާއްޖެއަށް އަދި މެލޭޝިޔާ މަގުން ދަތުރުކުރުމަށްފަހު ރާއްޖެ އަންނަ އެންމެހާ ދިވެހިން 14 ދުވަހުގެ މުއްދަތަށް މޮނިޓަރ ކުރުމަށް ކަރަންޓީނު ފެސިލިޓީއަކަށް ފޮނުވޭނެ ކަމަށެވެ.

ކޮރޯނާވައިރަސް (ކޮވިޑް-19) ރާއްޖެއިން ފެނުމާއި ފެތުރެމުންދާތީ، ސަރުކާރާއި ދައުލަތުގެ ކަމާބެހޭ މުއައްސަސާތަކާއި ކަމާބެހޭ ބައެއް ޖަމްއިއްޔާ ޖަމާއަތްތައް ގުޅިގެން އުފައްދާފައިވާ، ނޭޝަނަލް އެމަޖެންސީ އޮޕަރޭޝަން ސެންޓަރ (އެންއީއޯސީ) އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ތަރުޖަމާނު މަބްރޫކް އަޒީޒު ވިދާޅުވީ މެލޭޝިޔާގެ އިތުރުން އިނގިރޭސިވިލާތުން ރާއްޖެއަށް މީހުން އައުން މަނާކޮށްފައިވާ ކަމަށެވެ.

މަބްރޫކު ވިދާޅުވީ އަންގާރަ ދުވަހުގެ އިރުއޮއްސި 18:00 އިން ފެށިގެން، މެލޭޝިޔާއިން ރާއްޖެއަށް މީހުން އައުން މަނާވާނެ ކަމަށެވެ. އަދި އިނގެރޭސިވިލާތުން މީހުން އައުން މަނާ ވާނީ މި މަހުގެ 19 ވަނަ ދުވަހުގެ 00:00 ފެށިގެން ކަމަށްވެސް މަބްރޫކް ވިދާޅުވި އެވެ.

ގިނަ އަދަދެއްގެ ދިވެހިން ދިރުއުޅޭ މެލޭޝިޔާގައި ހަލުވިކަމާއެކު ކޮވިޑް-19 ފެތުރެމުންދާތީ މުޅި މެލޭޝިއާ ވަނީ ލޮކްޑައުން ކޮށްފައެވެ. މެލޭޝިޔާގައި މިހާތަނަށް 673 މީހުން ވަނީ ބައްޔަށް ޕޮޒިޓިވްވެފައެވެ. އަދި ބަލީގައި މިހާތަނަށް ދެ މީހަކު މަރުވެފައިވާއިރު، އެ ދެމީހުން ވެސް މަރުވެފައިވަނީ ވޭތުވެދިޔަ 24 ގަޑިއިރުގެ ތެރޭގަ އެވެ.

އިނގެރޭސިވިލާތުން މިހާތަނަށް 1543 މީހަކު ބައްޔަށް ޕޮޒިޓިވް ވެފައިވާއިރު، 55 މީހަކު ވަނީ ބަލީގައި މަރުވެފައެވެ.

މެލޭޝިއާ އާއި އިނގިރޭސިވިލާތުގެ އިތުރުން، ކޮވިޑް-19 ފުރަތަމަ ފެނުނު ޗައިނާ އިންވެސް މީހުންއައުން ވަނީ މަނާކޮށްފަ އެވެ. އަދި މީގެއިތުރުން، އިރާންއާއި ސައުތު ކޮރެއާގެ ދެ ސަރައްހަދަކުންވެސް މީހުން އައުން މަނާކުރިއެވެ. އަދި އިޓަލީ އާއި ސްޕެއިން އިން ވެސް މީހުން އައުން ވަނީ މަނާކޮށްފައެވެ. އޭގެ އިތުރުން ޖަރުމަން އަދި ފްރާންސްގެ ބައެއް ސިޓީތަކުން ވެސް މީހުން އައުން ވަނީ މަނާކޮށްފައެވެ.

މިހާތަނަށް ރާއްޖެއިން 13 މީހަކު ކޮވިޑް-19 އަށް ޕޮޒިޓިވް ވެފައިވާއިރު، އެ 13 މީޙުންނަކީ ވެސް ބިދޭސީން ނެވެ. އެ އެންމެންގެ ހާލުވެސް ރަނގަޅު ކަމަށް ޑޮޓްޓަރުން ވަނީ ވިދާޅުވެފަ އެވެ.